1 Ac tukun ma inge tukun tohkohsrah Limhi el ahksahfye sramsram lal nuh sin mwet lal, tuh el sruhmuhn ma pucspucs nuh selos ac kuhtuh na sin ma inge nga suhmuhslah lun puk se inge, el fahk nuh sin mwet lal ma nuhkwewa ke mwet wiyaclos suc oasr fin acn Zarahemla.

2 Ac el oruh tuh Ammon elan tuyak ye muhtuhn mwet ah, ac kalweni nuh selos ke ma nuhkwewa ma sikyak nuh sin mwet wiyaclos ke pacl se ma Zeniff el som liki acn ah finne e ke pacl se pacna ma el tuhkuh liki acn we.

3 Ac el oacyacpac kalweni nuh selos kahs sahflah suc tohkohsrah Benjamin el lotwelos kac, ac ahkuhtweyac ma inge nuh sin mwet lal tohkohsrah Limhi, tuh elos in kuh in kahlwem ke kahs nuhkwewa suc el sruhmuhn ah.

4 Ac tukun ma inge tukun el oruh ma inge nuhkwewa, tuh tohkohsrah Limhi el suhpwaclihk mwet ah in fahsrelihk, ac oruh tuh elos in fohlohkwelihk kais sie nuh in lohm sel sifacna.

5 Ac tukun ma inge el oruh tuh plwet suc nwacack ma sihmlac luhn mwet lal ke pacl se ma elos som liki acn Zarahemla ah, in utuck uh nuh yohrohl Ammon, tuh elan kuh in riti.

6 Inge, ke pacl se na Ammon el ritelah ma sihmlac ah, tohkohsrah el siyuck sel in etuh fin el kuh in lweng kahs, ac Ammon el fahk nuh sel lah el tiac kuh.

7 Ac tohkohsrah el fahk nuh sel: In ahsor ke kweok luhn mwet luhk, nga oruh tuh angngaul ac tolu sin mwet luhk in som fuhfahsryucsr nuh innimac, tuh ohinge elos in kuh in konwacack acn Zarahemla, tuh kuht in kuh in kwacfe sin mwet wiyacsr in uskuhtlac liki srohoh.

8 Ac elos tuhlac ke innimac ke lusen lwen pucspucs, ohinge elos kwacfeacng, ac konwacack tiac acn Zarahemla a elos fohlohk nuh ke acn se inge, fuhfahsryucsr ke acn ma puhkantwen kof we, konwacack sie acn suc afyucflac ke sri in mwet, ac ke kosro lwemnak, ac oacyacpac nwacnwaclah ke muhsah ke kain in muhsah pucspucs, konwacack sie acn suc oasr mwet we suc puhkantwen oacna mwet Israel.

9 Ac nuh ke sie luhlahlfongi in fahkwack tuh ma elos fahk pwacye elos us tuhkuh plwet longoul ahkosr suc nwacnwaclah ke tuhfahlfahl, ac ma inge oreklac ke kol na pwacye.

10 Ac liye, oacyacpac, elos us tuhkuh mwe lang, suc yohk, ac ma inge oreklac ke prahs ac copper, ac arulacna wo atac.

11 Ac sifilpac, elos us tuhkuh katlas, fung kac wacngihnlac, ac plwet kac sahfihtlac ke ras; ac wacngihn mwet fin acn we kuh in luhngas kahs kuh sihm ma oan ke plwet ah. Ohinge nga fahk nuh sum: Kom kuh in lweng?

12 Ac nga sifil pac fahk nuh sum: Kom etuh ke oacna sie mwet ma kuh in lweng? Tuh nga kena tuh ma sihmlac inge in lwenglah nuh ke kahs lasr; tuh, sahp, ma inge ac use nuh sesr etwacack ke un mwet luhlah suc kuhnausyucklac, ke acn se ma sihmlac inge tuhkuh we me; kuh, sahp, ma inge ac sang etwacack ke mwet inge suc kuhnausyucklac; ac nga kena etuh lah meac oruh elos kuhnausyucklac inge.

13 Inge Ammon el fahk nuh sel: Nga kuh in fahk na pwacye nuh sum, O tohkohsrah, ke sie mukul ma kuh in luhngas ma sihmlac inge; tuh el kuh in liye, ac luhngaslah nohfohn ma sihmlac ma mahtuh; ac ma inge sie mwe sang sin God. Ac ma se inge pahngpahng mwe lweng, ac wacngihn sie mwet kuh in ngwet nuh kac in liye sahyacn sapkihnyuck nuh sel, na el ac fin ngwet nuh kac a el tiac enenuh in oruh na el tuhlac. Ac el suc sapkihnyuck nuh se in ngwet nuh kac, na el pahngpahng mwet liyactwen.

14 Ac liye, tohkohsrah luhn mwet suc oasr fin acn Zarahemla pa sie mukul ma sapkihnyuck nuh sel in oruh ma inge, ac oasr sel mwe sang fuhlwact se sin God inge.

15 Ac tohkohsrah el fahk lah sie mwet liyactwen el fuhlwact liki sie mwet pahluh.

16 Ac Ammon el fahk lah sie mwet liyactwen pa sie mwet in fahkwack ac oacyacpac sie mwet pahluh; ac sie mwe sang suc fuhlwact ma wacngihn mwet kuh in oasr la, sahyacn el sruok kuh luhn God, suc wacngihn mukul kuh in oasr la; tuhsruhk sie mwet kuh in eis kuh yohk ituckyang nuh sel sin God.

17 Tuhsruhk sie mwet liyactwen kuh in etuh ke ma suc somlah, ac oacyacpac ke ma suc ac fah tuhkuh, ac kac fah ma nuhkwewa ahkkahlwemyeyuck, kuh, fin tiac, ma lukmac fah ahkkahlwemyeyuck, ac ma wihklac fah tuhkuh nuh ke kahlwem, ac ma suc tiac etweyuck fah orek in etweyuck selos, ac oacyacpac ma uh fah orek in etweyuck selos ma tiac kuh in etweyuck fin tiac ohinge.

18 Ohinge God El sang sie ohiyac tuh mukul uh, ke luhlahlfongi, kuh in oruh ma usrnguck yohk; ohinge el eklac in mwe kahsruh yohk nuh sin mwet wiyacl.

19 Ac inge, ke Ammon el ahksahfye in sruhmuhn kahs inge tohkohsrah el engan yohk, ac sang kuloh nuh sin God, fahk: Tiac suhlahlahlfongi lah ma lukmac yohk oasr ke plwet inge, ac wacngihn suhlahlahlfongi lah mwet lweng inge ahkolah ke srihpac in ikacslah ma lukmac nuhkwewa nuh sin tuhlihk nuhtin mwet.

20 O fuhkah wolacna ke orekma luhn Leum, lusac kac Elac kweok wi mwet Lal; ahok; fuhkah kun ac lohsriyacn kahlwem luhn tuhlihk nuhtin mwet; tuh elos tiac suk lahlmwetmwet, kuh elos tiac kena tuh elan nuhnuhnkuh nuh faclos.

21 Ahok, elos oacna un sip lwemnak ma som liki mwet shepherd, ac maelihk, ac lihllihllac, ac mongolac sin kosro lwemnak suhlallacl ke insack uh.