1 Emi Zeniff, aber a wɔkyerɛkyerɛɛ me Nephifo hɔn kasaa nyinara wiei no, na minyaa nyimdzee wɔ Nephi asaase ho anaadɛ asaase a ɔyɛ hɛn egyanom hɔn egyapadze a odzi kan ho no, wɔsomaa me dɛ menkɛhyɛ Lamanfo mu ama meehu mbrɛ hɔn nsordaafo hɔn dodow tse ama hɛn nsordaafo aakɛsɛɛ hɔn—mbom ber a muhun dɛ adze bi a oye wɔ hɔn mu no, mammpɛ dɛ wɔbɛsɛɛ hɔn.

2 Dɛm ntsi, menye mo nuanom no dzii aper wɔ sar no do, osiandɛ mepɛɛ dɛ hɛn hen no nye hɔn bedzi ahyɛmu; naaso ɔnam dɛ ɔyɛ nyimpa a n’asɛm yɛ dzen na ɔpɛ bɔgyasɛm ntsi ɔhyɛɛ dɛ wonku me; na mbom mifii nsa na bɔgya pii gui; osiandɛ egya nye egya kõe, na nuabanyin nye nuabanyin dzii esi, kesii dɛ hɛn nsordaafo no mu pii wuwui wɔ sar no do; na hɛn a yefii nsa no saan hɛn ekyir kɔr Zarahemla asaase do kɔbɔɔ amandzɛɛ kyerɛɛ hɔn yernom na hɔn mba.

3 Na dɛ emi minyaa pɛ mbordo dɛ me nsa bɛkã hɛn egyanom asaase no ntsi moboaboaa dɔm dodowara a wonyaa pɛ dɛ wɔbɔkɔ akɛgye asaase no ano, na yɛhyɛɛ hɛn akwantu ase bio kɔr sar no do dɛ yɛrokɔ asaase no do; na mbom ɔkɔm hyeew hɛn ara ma yehun amandze ara yie; osiandɛ yɛyɛɛ nyaa wɔ Ewuradze hɛn Nyame ne nkae ho.

4 Naaso, yekyinkyiin sar no do nda pii ekyir no, yesisii hɛn ntamadan wɔ bea a wokum hɛn nuanom no; bea no bɛn hɛn egyanom hɔn asaase no.

5 Na ɔbaa dɛ menye mo nkorɔfo no hɔn mu baanan kɔr kurow kɛse no mu, yɛkɔr ɔhen no hɔ kyerɛ dɛ, yebohu mbrɛ ɔhen no n’adwen tse ama meehu dɛ ɔsɛ dɛ menye mo nkorɔfo kɔ na yɛkɛgye asaase no asomdwee mu.

6 Na mokɔr ɔhen no nkyɛn, na ɔnye me dzii ahyɛmu ama maakɛgye Lehi-Nephi asaase nye Shilom asaase no so.

7 Na ɔhyɛɛ no nkorɔfo no dɛ womfi asaase no do, na emi nye mo nkorɔfo kɔr dɛ yɛrekɛgye asaase no.

8 Na yɛhyɛɛ ase sisii adan, na yɛyɛɛ kurow no n’afasu no yie, nyew, Lehi-Nephi kurow kɛse n’afasu no, nye Shilom kurow kɛse no.

9 Na yɛhyɛɛ ase dɔɔw asaase no, nyew, na yeduaa aba ahorow, yeduaa eburow, ewifua, nye atoko, nye nea na sheum nye nduadzewa ahorow pii n’aba na yɛhyɛɛ ase dɔree na yɛyɛɛ prɔmprɔm wɔ asaase no do.

10 Afei saana iyi yɛ ɔhen Laman ne ndaadaa kwan a ɔpɛ dɛ ɔfa do dze twe mo nkorɔfo kɔ nkowaasom mu ntsi na ogyaa asaase no mu maa hɛn dɛ yɛnkɛfa no.

11 Dɛm ntsi ɔbaa dɛ, yɛtsenaa asaase no do bɛyɛ mfe duebien ekyir no, ɔhen Laman hyɛɛ ase suroo dɛ annhwɛ a mo nkorɔfo no ho bɛyɛ dzen na worunntum nnya hɔn do tum mmfa hɔn mmba nkowaasom ase.

12 Afei, dɛm nkorɔfo yi yɛ enyihawfo nye abosonsɔrfo; dɛm ntsi wɔpɛɛ dɛ wɔdze hɛn kɔ nkowaasom mu, ama woeedua hɛn nsaano edwuma do amee; nyew, ama woenya hɛn anyɛmbowa akyer awe.

13 Dɛm ntsi ɔbaa dɛ ɔhen Laman hyɛɛ ase nunuu no nkorɔfo no dɛ wɔnye mo nkorɔfo no nyɛ basabasa; dɛm ntsi akõkoekõ na wentwiwentwi hyɛɛ ase wɔ asaase no do.

14 Na m’ahendzi wɔ Nephi asaase do ne mfe duebiasa mu no, wɔ Shilom asaase n’anaafo afamu, ber a mo nkorɔfo rema hɔn nguankuw nsu na edziban, na wɔrodɔw hɔn kwã no, Lamanfo dɔmtutuw baa bɔtoaa hɔn na wɔhyɛɛ ase dɛ worukuku hɔn, na wɔrekyekyer hɔn nguankuw, na worububu hɔn haban mu eburow so.

15 Nyew, na ɔbaa dɛ woguanee, hɔn mu dodowara a nsa annkã hɔn no guanee baa Nephi kurow kɛse no mu, na wɔsee me dɛ mo mbɔ hɔnho ban.

16 Na ɔbaa dɛ mobɔɔ hɔn ntoa na memaa hɔn egyen, nye egyen-menaba, nkrantsee, nye mpea, nye mpotsibaa, nye totowabo na akodze ahorow pii a yebotum ayɛ, na menye mo nkorɔfo no kɔree kɔkõe tsiaa Lamanfo no.

17 Nyew, wɔ Ewuradze n’ahoɔdzen mu na yɛkɔree kɔkõe tsiaa Lamanfo no; na menye mo nkorɔfo sũu dzendzenndzen frɛɛ Ewuradze dɛ ɔngye hɛn mfi hɛn atamfo nsamu; na yɛkaa ɔgye a ɔdze gyee hɛn egyanom no.

18 Na Nyame tsiee hɛn sufrɛ na ɔyɛɛ hɛn ebisadze maa hɛn; na yɛkɔree wɔ n’ahoɔdzen mu; nyew, yɛkɔr Lamanfo do, na wɔ dafua kor na n’adzesaa mu no yekum nyimpa mpemebiasa eduanan-ebiasa; yekum hɔn araa kesii dɛ yɛpaam hɔn fii hɛn asaase no do.

19 Na emi mankasa medze me nsa boaa hɔn ma wosiee hɔn ewufo. Na hwɛ, hɛn awerɛhow nye kwadwom a yetwae nye dɛ hɛn enuanom ahaebien eduosuon akron na wokum hon.