Dagiti Balikas ni Mormon

1 Ket ita siak, ni Mormon, gapu ta dandanin yawatko ti kasuratan nga ar-aramidek kadagiti ima ti anakko a ni Moroni, kitaen naimatangak ti dandani amin a pannakadadael dagiti tattaok, dagiti Nephita.

2 Ket adu a ginasut a tawen kalpasan ti yaay ni Cristo nga iyawatko dagitoy a kasuratan kadagiti ima iti anakko a lalaki; ket pagarupek a maimatangannanto ti intero a pannakadadael dagiti tattaok. Ngem ipaay koma ti Dios a malasatanna pannakadadaelda, tapno maisuratna a sangkabassit ti maipanggep kadakuada, ken sangkabassit ti maipanggep ken ni Cristo, ta bareng no pakairanudandanto iti masungad nga aldaw.

3 Ket ita, agsaoak a sangkabassit ti maipanggep iti naisuratkon; ta kalpasan ti panangyababak kadagiti pinanid ni Nephi, agingga iti panagturay daytoy nga ari a Benjamin, a nasao ni Amaleki, sinukimatko dagiti kasuratan a naipaima kaniak, ket natakuatak dagitoy a pinanid, a naglaon iti bassit a pakaammuan kadagiti propeta, manipud ken ni Jacob agingga iti panagturay daytoy nga ari a Benjamin, kasta met ti adu a balikas ni Nephi.

4 Ket naay-ayoak kadagiti balikas a nailanad kadagitoy a pinanid, gapu kadagiti padto iti yaay ni Cristo; ken ti pannakaammo dagiti ammak nga adun kadagitoy ti natungpal; wen, ket ammok met a kas iti kaadu ti naipadto maipanggep kadakami agingga ita nga aldaw ti natungpalen, ket pudno a mapasamakto ti kas kaadu pay iti masanguanan nga aldaw—

5 Gapuna, pinilik dagitoy a bambanag, a mangileppas ti kasuratak kadagitoy, ta adawek ti nabati iti kasuratak manipud kadagiti pinanid ni Nephi; ket saanko a maisurat ti apagkasangagasut a paset dagiti bambanag dagiti tattaok.

6 Ngem kitaen, alaekto dagitoy a pinanid, a naglaon kadagitoy a pammadto ken pammaltiing, ket itiponko ida iti nabati iti kasuratak, agsipud isuda ti kasayaatan para kaniak; ken ammok a kasayaatanto kadagiti kakabsatko.

7 Ket aramidek daytoy iti nainsiriban a panggep; ta kasta ti nayarasaas kaniak, kas mayannurot kadagiti aramid ti Espiritu ti Apo nga adda kaniak. Ket ita, saanko nga ammo amin a bambanag; ngem ammo ti Apo ti amin a bambanag a dumtengto; gapuna, iturongnak nga aramidek ti mayannurot iti pagayatanna.

8 Ket maipanggep kadagiti kakabsatko ti kararagko iti Dios, tapno maammuanda manen ti Dios, wen, ti pannubbot ni Cristo; tapno agbalinda manen a makaay-ayo a tattao.

9 Ket ita siak, ni Mormon, intuloyko nga ileppas ti kasuratak, nga inadawko kadagiti pinanid ni Nephi; ket inaramidko a mayannurot iti pannakaammo ken pannakaawat nga inted kaniak ti Dios.

10 Gapuna, napasamak a kalpasan ti panangyawat ni Amaleki kadagitoy a pinanid ken ni ari Benjamin, innala ken intiponna ida kadagiti sabali a pinanid, a naglaon kadagiti kasuratan nga impaima dagiti ari, kadagiti nagsasaruno a kaputotan agingga kadagiti aldaw ni ari Benjamin.

11 Ket naipaimada manipud ken ni ari Benjamin, iti nagsasaruno a kaputotan agingga a nakadanonda kadagiti imak. Ket siak, ni Mormon, ikararagko iti Dios a mataginayonda manipud ita. Ket ammok a mataginayondanto; agsipud ta adu dagiti naindaklan a bambanag a naisurat kadakuada, ta manipud kadagitoy a makednganto dagiti tattaok ken dagiti kakabsatda iti naindaklan ken maudi nga aldaw, a mayannurot iti naisurat a balikas ti Dios.

12 Ket ita, maipanggep iti daytoy nga ari Benjamin—naaddaan ti sangkabassit a panagsisinnupanget dagiti bukodna a tao.

13 Ket napasamak met a dimteng dagiti buyot dagiti Lamanita manipud iti daga ti Nephi, a makigubat maibusor kadagiti taona. Ngem kitaen, inummong ni ari Benjamin dagiti buyotna, ket nakirupak kadakuada; ket nakiranget iti pannakausar iti pigsa ti takiagna, iti pannakausar ti espada ni Laban.

14 Ket iti bileg ti Apo kinasupangetda dagiti kabusorda, agingga a nakapapatayda iti rinibu a Lamanita. Ket napasamak a nakisupangetda kadagiti Lamanita agingga a napapanawda ida iti amin a daga a tawidda.

15 Ket napasamak a kalpasan ti kaadda dagiti ulbod a Cristo, ken nakaem dagiti ngiwatda, ken nangdusada a mayannurot iti naaramidda a krimen;

16 Ket kalpasan ti kaadda dagiti ulbod a propeta, ken ulbod a mangaskasaba ken mannursuro kadagiti tattao, ket nadusan amin dagitoy a mayannurot kadagiti naaramidda a krimen; ken kalpasan ti adu a panagsusupanget ken adu ti timmalikud a kimmamang kadagiti Lamanita, kitaen, napasamak a ni ari Benjamin, iti tulong dagiti nasantuan a propeta nga adda kadagiti taona—

17 Ta kitaen, nasantuan a tao ni ari Benjamin, ket inturayanna dagiti taona babaen ti kinalinteg; ket adu ti nasantuan a tattao iti daga, ket imbagada ti balikas ti Dios nga addaan iti bileg ken turay; ken nagaramatda iti kinainget gapu iti kinasukir dagiti tattao—

18 Gapuna, iti tulong dagitoy, impasdek manen ni ari Benjamin ti kappia iti daga babaen ti panangaramatna iti amin a pigsa ti bagina ken ti kabaelan ti amin a kararuana, kasta met dagiti propeta.