Fapi Thin ku Mormon

1 Ma chiney e gag, Mormon, e gube yaen ni nggu piiʼ fapi chep ni ir faram e kuʼug falʼeg nga lan paʼ ba pagael ni fakag i Moroni, musap gaed, kuʼug guy ni badake gubin e pi mogothgoth ni aw ko gidiiʼ rog, ni fapi Nephites.

2 Ma rib yoʼor miriʼay e duw nga tomuren e wub rokʼ Kristus nug piiʼ e pi chep ney nga lan paʼ fakag; ma gube lemnag nra guy chirogon e gafgow nra tay e gidiiʼ rog. Machane manga yigi flaenʼ Got ni nge yog nra pired ni dabra mʼaed, ni nge yog ni yoloey boech banʼen ni morngaʼagraed, nge boech banʼen ni morngaʼagen Kristus, ni gomanga yigi yog ni rebo rran me yib falʼngin ngoraed.

3 Ere chiney, nggu weliy boech banʼen ni morngaʼagen e pinʼen ni kug yoloey; ya tomuren ni kug ngochngoch nag i yoloey e nʼen ni bay ko fapi plates rokʼ Nephi, ni yibi madaʼ nga butʼ ko ngiyalʼ nibe yoeg fare pilung ni Benjamin lungun, niʼir e weliy Amaleki morngaʼagen, mug gay u fithikʼ fapi chep niʼir e kan tay nga lan paʼag, ma aram mug pirʼeg e tiney e plates, niʼir e bay riy e chuʼuw ney e babyor ni morngaʼagen fapi profet, ni aram rokʼ Jacob iyib nge madaʼ ko ngiyalʼ ni ke suwey fare pilung i Benjamin e lung, nge ku boch fapi thin rokʼ Nephi nib yoʼor.

4 Nge fapinʼen niʼir e bay u dakean e pi plates ney e rib mʼagaenʼug ngay, ya bachan e pi prophecy ni morngaʼagen e wub rokʼ Kristus; nge pi chitamag e yaed manang ni tin yoʼor riy e ke muguʼul; arragon, nge kugag ma gumnang ni oren e pinʼen ni kan prophesy nag ni morngaʼagmaed iyib nge madaʼ ko biney e rran e ke muguʼul, ma oren e pinʼen ni bay nga tomuren e biney e rran e rra yibi buch—

5 Ere, kug melʼeg e tiney, ni nggu muʼ nag e chep rog nga dakean, ni ireram e tin ni ke magaey ko chep rog ni bay gufek ko fapi plates rokʼ Nephi; ere dabiyog ni nggu yoloey taʼbuchi raʼay guruy u morngaʼagen e gidiiʼ rog.

6 Machane musap gaed, bay gufek e tiney e plates, niʼir e bay riy e tiney e prophecy nge yiʼiy, nggu dachuguy raed ko fatin ni ke magaey ko fapi chep rog, ya ireram e tin nib mʼaganʼug ngay; ma gumnang ni ireram e tin nra mʼagaenʼ pi walageg ngay.

7 Ma gube rinʼ e rennʼey ni fan nga ba muruwel nib gonop; ya ke kathkath nag ngog, u rogon e muruwel ko fare Kan ni Thothup rokʼ Somoel ni bay rog. Ere chiney, gag e dagnang urngin banʼen; machane fare Somoel e ire manang urnign banʼen ni bay yib; ere, ire be gagyeg nigeg ni nggu rinʼ nrogon ni baʼadag.

8 Ere meybil rog ngakʼ Got e fan ngakʼ pi walageg, ni gomanga yog bayay nra suloed ko llowaenʼ rokʼ Got, arragon, fare bayul rokʼ Kristus; ni gomanga yog bayay nra manged gidiiʼ ni yib adag dakeanraed.

9 Ere chiney e gag, Mormon, e nggu muʼ nag e chep rog, niʼir e kug fek ko fapi plates rokʼ Nephi; mug falʼeg u rogon fare llowaenʼ nge fare tamilngaenʼ ni piiʼ Got ngog.

10 Ere, me yibi buch u tomuren ni Amaleki e ke piiʼ e pi plates ney nga lan paʼ pilung i Benjamin, me fek nge dachuguy nga boech e plates, niʼir e bay riy e pi chep niʼir e ke af i af u paʼ e pi pilung, u rebo mfen ngo rebo mfen nge madaʼ ko pi rran rokʼ pilung i Benjamin.

11 Me af iyib nga butʼ u paʼ fare pilung i Benjamin, u rebo mfen ngo rebo mfen nge madaʼ ko ngiyalʼ ni ke thap nga lani paʼag. Me gag, Mormon, e gube meybil ngakʼ Got ni nge yog ni chaʼariy ko ngiyalʼ ney iyaen nga mʼon. Ma gumnang ni yira chaʼariy; ya bay bogi banʼen riy ni kan yoloey ni rib gaʼfan, niʼir e pi gidiiʼ rog nge pi walagraed e yira pufthin nagraed riy ko fabin nib gaaʼ ma bin tomur e rran, ni boed rogon fare thin rokʼ Got ni kan yoloey.

12 Ere chiney, e re pilung ney i Benjamin—e bay boech banʼen rokʼ ni morngaʼagen e maleʼeg thin u fithikʼ e gidiiʼ rokʼ.

13 Me yibi buch ni fapi yuʼ ulung i salthaw rokʼ fapi Lamanites e kur baed nga wuruʼ fare binaw ku Nephi, ni ngar mael gaed e pi gidiiʼ rokʼ. Machane musap gaed, pilung ni Benjamin e kunuy nga taʼabang e pi salthaw rokʼ, me sakʼiy ni ngar mael gaed fapi Lamanites; me cham u gelingin i paʼ, ko farengi sayden rokʼ Laban.

14 Ma, u dakean gelingin fare Somoel mar cham gaed e pi toʼogor roraed riy, nge madaʼ ko ngiyalʼ ni kar liiʼed nib yoʼor e biyuʼ fapi Lamanites. Me yibi buch ni arame ra chamgaed fapi Lamanites nge madaʼ ko ngiyalʼ ni kar tulufed raed nga wuruʼ gubin e pi binaw ni suwraed.

15 Me yibi buch u tomuren ni ke yib e pi Kristus ni baen, ma kan ning lʼugun raed, ma kan gechig nagraed u rogon e pi kireb roraed.

16 Ma tomuren ni ke yib e pi profet ni baen, nge tamachib nge sensey ni baen nga fithikʼ fapi gidiiʼ, ma yaed gubin ma kan gechig nagraed u rogon e pi kireb roraed; nge tomuren ni ke yoʼor e maleʼeg thin ma kar chuw gaed ka ranoed ngakʼ fapi Lamanites, ere musap gaed, yibi buch ni pilung i Benjamin, nge pi ayuw rokʼ fapi profet nib thothup niʼur moyed u fithikʼ e gidiiʼ rokʼ—

17 Ya musap gaed, pilung ni Benjamin e beeʼ nib moʼon nib thothup ni immoy, ni yoeg lungun u dakean e gidiiʼ rokʼ u fithikʼ e tin nib matʼaw; ma kub yoʼor e gidiiʼ nib thothup ni immoy u lan farengi nam, ma ur weliy yed fare thin rokʼ Got u dakean e gelingin nge matʼawon; ma roeged e thin nib kunkun ni bachan fini ʼelʼel laniyaenʼ fapi gidiiʼ—

18 Ere, dakean e ayuw roraed, ma pilung ni Benjamin, e muruwel u poloʼ i gelingin dugren nge gelingin e tafnaey rokʼ, nge fapi profet, mar tabolingin niged bayay e gapas nga lan farengi nam.