Fare Babyor ku Mosiah

1 Ere chiney e dakuriy e maleʼeg thin u lan farengi nam ni poloʼ nu Zarahemla, u fithikʼraed ni gubin e gidiiʼ nib mang ngakʼ fare pilung ni Benjamin, ere fare pilung i Benjamin e pirʼeg e gapas u lan gubin e pi rran rokʼ ni ke magaey.

2 Me yibi buch ni immoy dalip i pagael ni fak; me pining fithingraed ni Mosiah, nge Helorum, nge Helaman. Me guy rogon ni ngan fil ngoraed gubin e pi thin rokʼ e pi chitamangin, ni gomanga yog ni ngar manged gidiiʼ nib tamilang laniyaenʼraed; ni gomanga yog nra nanged morngaʼagen fapi yiʼiy niʼir e kiiʼ i weliy e pi chitamangraed morngaʼagen, niʼir e thap ngoraed u paʼ fare Somoel.

3 Ma ki fil ngoraed morngaʼagen fapi chep niʼir e kan ker nga dakean fapi plate ni brass, ni be gaʼar: Pi fakag ni pumoʼon, gu baʼadag ni thingar mu tayed u wunʼmed ni manga boech ni gathi bachan e yungi plates ney, niʼir e bay riy e pi chep ney nge pi motochiyel ney, ma dabisiy ni kad gafgow gaed u fithikʼ e minaenʼ, ni aram rogon iyib nge madaʼ ko ngiyalʼ ney, ni dab dannanged e tin riyulʼ rokʼ Got nib miith.

4 Ya dariy liyiben ma rayog rokʼ e chitamangdaed, i Lehi, ni nge tay u waenʼ gubin e pinnʼey, ni nge fil ngakʼ e pi bitir rokʼ, ni faʼan gomanga dariy e ayuw ko pi plates ney riy; ya ire ni fil ngakʼ e thin ko Egyptian ere rayog rokʼ ni nge poey e pi yol ney ni kan ker, me fil ngakʼ e pi bitir ni fak, ni nge yog nra filed ngakʼ e pi bitir roraed, ere arame muguʼul e pi motochiyel rokʼ Got, ni aram rogon iyib nge madaʼ ko ngiyalʼ ney.

5 Gube yoeg ngomed, pi fakag, manga boech ni gathi bachan e pinnʼey, ni kan ayuweg ma kan chaʼariy nga paʼ Got, ni nge yog ni ngad poeyed ma gaed nang fan e tin riyulʼ rokʼ nib miith, me yog ni nga i paer ni gubin e ngiyalʼ e pi motochiyel rokʼ u pʼoewchdaed, ma ku aram rogon ngakʼ e pi chitamangdaed ni ku rayog ni ngar malog gaed ko mich, ma ku rayog ni ngad boeded fa piʼin walagdaed, ni fapi Lamanites, ni yaed e dariy banʼen ni yaed manang u morngaʼagen e pinnʼey, ara ku aram rogon ni de mich u wunʼraed ni un machib nag ngoraed, ya bachan e pi yalen rokʼ e pi chitamangraed, ni dematʼaw.

6 O gimed e pi pumoʼon ni fakag, gu baʼadag ni thingar mu tayed u wunʼmed ni pi thin ney e bariyulʼ, nge ku arragon e pi chep ney nib riyulʼ. Ere musap gaed, ku arragon ko fapi plates rokʼ Nephi, niʼir e bay riy fapi chep nge pi thin rokʼ e pi chitamangdaed ni aram ko ngiyalʼ nra chuw gaed u Jerusalem nge madaʼ ko chiney, ma bogi banʼen nib riyulʼ; ma gadaed manang nib riyulʼ ya bay rodaed u pʼoewchdaed.

7 Ere chiney, gimed e pumoʼon ni fakag, gu baʼadag ni thingar mu tayed u wunʼmed ni ngam yulʼyulʼ gaed ngay i poey, ni gomanga yog ni felʼ rogmed riy; ma gu baʼadag ni thingar mu fol gaed ko fapi motochiyel rokʼ Got, ni gomanga yog ni ngam monʼog gaed u dakean farengi nam nrogon fapi michmich ni tay Somoel ngakʼ e pi chitamangdaed.

8 Ma kub yoʼor boech banʼen ni fil fare pilung i Benjamin ngakʼ fapi pagael ni fak, ni dan yoloey nga langgin e biney e babyor.

9 Me yibi buch u tomuren ni ke muʼ fare pilung i Benjamin i machib nag fapi pagael ni fak, ma be pilibthir iyaen, ma arame guy ni dab ki nʼuw napʼan make yimʼ min upnguy e butʼ nga oewchen; ere, lemnag nib mʼag ni thingari piiʼ e lung ngakʼ reb fapi pagael ni fak.

10 Ere, min fek Mosiah iyib ngakʼ; ma baʼaray e pi thin ni weliy ngakʼ, ni gaʼar: Fakag, gu baʼadag ni ngam wereg e thin u dakean gaʼangin e gi nam ney u fithikʼ gubin e pi gidiiʼ ney, ara pi gidiiʼ nu Zarahemla, nge pi gidiiʼ rokʼ Mosiah niʼir e be paer ko gi nam ney, ni nge yog nra mukun gaed nga taʼabang; ya ra gabul ma bay guweliy ko pi gidiiʼ rog ney ni gur e pilung nge mitethin ko pi gidiiʼ ney, ni gur e, fare Somoel ni Got rodaed e ke piiʼem ngomaed.

11 Nge ku arragon, ni gura piiʼ ko pi gidiiʼ ney ba ngachol, ni nge kiiʼeg raed ko gubin fapi gidiiʼ ni chuwegraed Somoel ni Got ko farengi nam nu Jerusalem; ma gube rinʼ e pinnʼey ni bachan e kar pired ni yaed bogi gidiiʼ nib yulʼyulʼ ko pi motochiyel rokʼ Somoel.

12 Ma kug piiʼ ngoraed ba ngachol ni dabi mʼay biʼid, ma kemus nu dakean e pi denen e ra mʼay riy.

13 Arragon, nge ku arragon ni gube yoeg ngom, ni faʼanra pi gidiiʼ ney ni rib tʼuf rokʼ Somoel e yaedra mul nga fithikʼ e denen, mar manged gidiiʼ ni kireb nge taʼiling, ma fare Somoel e ra pagraed, ni aram riy ni yaedra moʼowaer ni boed pi walagraed; ma arame dab ki ayuwegraed u dakean gelingin nib maʼangʼang ma dariy e puluw riy, ni boed ni aram iyib ni i ayuweg e pi chitamangdaed.

14 Ya gube yoeg ngom, ni faʼanra da i kʼiyeg paʼ nibe ayuweg e pi chitamangdaed mar dabi siy ni kar mulgaed nga lan paʼ fapi Lamanites, ngar manged e pi ldoew ko fananikan roraed.

15 Ere yibi buch u tomuren ni ke muʼ fare pilung i Benjamin i yoeg e pinnʼey ngakʼ fak, me piiʼ ngakʼ matʼawon ni nge gagyeg nag gubin i morngaʼagen e pi gamʼing u lan fare lung.

16 Nge ku arragon, niki piiʼ ngakʼ matʼawon ni nge gagyeg nag fapi chep ni kan ker nga dakean fapi plates ni brass; nge ku fapi plates rokʼ Nephi; nge ku, farengi sayden rokʼ Laban, nge fare batʼ ara tapowoʼ, niʼir e powiʼiy e pi chitamangdaed iyaen u lan wuruʼ e binaw, niʼir e falʼeg Somoel nga paʼ ni nge yog nni powiʼiyraed riy, ni yaed gubin u rogon e fol nge yulʼyulʼ roraed ngakʼ.

17 Ere, ngiyalʼ ni dar fol gaed e daki felʼ rograed ma da kiyog ni monʼog e milekag roraed, ma arame ur suloed nga tomur, madaʼ ki flaenʼ Got ngoraed; Me ere yibi awe uyngol nge gafgow ni ubchiyaʼ ngoraed, ni nge pug uran ngoraed e muruwel roraed.

18 Ere chiney, yibi buch ni Mosiah e yaen nge yaen i rinʼ ni boed ni ke motochiyel nag e chitamangin ngakʼ, me yoeg ngakʼ gubin fapi gidiiʼ ni yaed ma paer u dakean e buutʼ nu Zarahemla ni ngar kunuyed yaed nga taʼabang, nga ranoed ko temple ngar rungʼaged fapi thin, niʼir e nge weliy e chitamangin ngoraed.