Guruy Ni 19
Gideon e gay fare pilung i Noah ni nge liiʼ—Fapi Lamanites e rabaed ko farengi binaw—Pilung i Noah e gafgow me yimʼ ko nifiy—Limhi e igagyeg ni boed e pilung u tanpaʼ e Lamanites. Napʼan 145–121 M.K.
1 Me yibi buch ni fapi salthaw rokʼ fare pilung e ra suloed, ni rib mʼay fan e magow ni kar tayed ngakʼ fapi gidiiʼ rokʼ Somoel.
2 Ere chiney e musap gaed, fare ulung i salthaw rokʼ fare pilung e rib achig, ya kar lichlich gaed u tane mael, ere arame tabab ba daar nga fithikʼ fapi gidiiʼ.
3 Ere bin nib achig e ulung e tabab i kʼaring e murus ngakʼ fare pilung ko thin, ma arame tabab e maleʼeg thin nib almarin nga fithikʼraed.
4 Ere ngiyalʼ ney e immoy beeʼ nib moʼon u fithikʼraed ni fithingan e Gideon, ma beeʼ nib moʼon nib yargael ma toʼogor rokʼ fare pilung, ere girngiy e sayden rokʼ, me micheg u fithikʼ e damomuw rokʼ nra liiʼ fare pilung nge yimʼ.
5 Me yibi buch ni arame ra cham gow fare pilung; ma napʼan ni guy fare pilung ni arame nge gel Gideon ngakʼ, me miil nge yaen ko fare gilʼedamit ni bay u taʼaben fare temple.
6 Ere Gideon e lʼoelʼoeg iyaen me chugur nga taban fare gilʼedamit ni arame nge liiʼ fare pilung, ma faʼani sap fare pilung ko gin ni bay fare binaw nu Shemlom riy, me guy, fare ulung i salthaw ko Lamanites ni kar taw gaed nga mathil ko binaw.
7 Ere ngiyalʼ ney e fare pilung e tolul nag amthun e yafos rokʼ, ni gaʼar: Giedon, dabmu liiʼeg nggumʼ, ya fapi Lamanites e kar baed ngodaed, ma yaedra liiʼdaed; arragon, yaedra liiʼ e gidiiʼ rog ngar mʼaed.
8 Ma ngiyalʼ ney e fare pilung e gathir be rus nag e gidiiʼ rokʼ ni boed rogon ni be rus nag e birokʼ e yafos, machane yug aram rogon me pag Gideon ni de liiʼ nge yimʼ.
9 Ere fare pilung e yoeg ko fapi gidiiʼ ni ngar miil gaed rokʼ fapi Lamanites, ma ire yaen nib mʼon roraed, mar miil gaed nga lan wuruʼ e binaw, ni yaed pi leʼengiraed nge pi bitir roraed.
10 Me yibi buch ni fapi Lamanites e ra lʼoelʼoeged yaed, mar koeled yaed, mar tabab gaed i liiʼraed ngar mʼaed.
11 Ere ngiyalʼ ney e yibi buch ni fare pilung e yoeg ngoraed ni yaed gubin ma ngar digeyed e pi leʼengiraed nge pi bitir roraed, ngar miil gaed rokʼ fapi Lamanites.
12 Ere chiney e boʼor i yaed e dabi pag leʼengin nge bitir rokʼ, ku yaed baʼadag ni yaedra paer ngan liiʼraed ngar mʼaed u taʼabang. Ma tin kubay e ra paged pi leʼengiraed nge pi bitir roraed ngar miil gaed.
13 Me yibi buch ni piʼin nra pired rokʼ pi leʼengiraed nge pi bitir roraed e roeged ngakʼ e pi rugod nib pidorang ni fakraed ni ngar kan gaed nga mʼon ni ngar wenig gaed ko fapi Lamanites ni nga dabra liiʼed yaed.
14 Me yibi buch ni fapi Lamanites e wurengaenʼraed ngoraed, ya kar digow niged e pidorang ko pi ppin roraed.
15 Ere fapi Lamanites e dar liiʼed yaed ngar mʼaed, ere rafeked yaed ni kalbus ngar suloed ko fare binaw ku Nephi, min piiʼ matʼaw raed ni ngar pired ko binaw, u taen e pi mʼag ni ngar koeled fare pilung i Noah ngar piiʼed nga paʼ fapi Lamanites, ma ngar piiʼed e chugum roraed, ni balaey ko urngin e chugum ni bay roraed, nge balaey ko gol roraed, nge silber roraed, nge gubin e pinʼen ni rib gaʼfan ngoraed, ma aray rogon ni ngar piiʼed e tax ko fare pilung ko Lamanites u rebe duw ngo reb.
16 Ma chiney e immoy reb fapi pagael ni fak fare pilung u fithikʼ fa piʼin ni kan koelraed, ni fithingan e Limhi.
17 Ere chiney e Limhi e baʼadag ni dab ni liiʼ e chitamangin; yug aram rogon, machane Limhi e manang e pi ngongol nib kireb rokʼ e chitamangin, ni bachan e ir beeʼ nib mangil.
18 Me yibi buch ni Gideon e lʼoeg e pumoʼon nga lan wuruʼ e binaw nib mamith, ni ngar gayed fare pilung nge piʼin ni yaed bay rokʼ. Me yibi buch ni ra madaʼ gaed fapi gidiiʼ u lan wuruʼ e binaw, ni yaed gubin ma kemus ni fare pilung nge fapi priest rokʼ e dar madaʼ gaed.
19 Chiney e pichaʼaney e kar thʼaebed i micheg u lan gumʼirchaʼraed ni ku yaedra sul ko fare binaw ku Nephi, ma faʼan rachey ni kan liiʼ pi leʼengiraed nge pi bitir roraed, nge ku piʼin nra magaey gaed roraed, ma yaedra cham ni falbiy, ngar uned ngoraed ko yamʼ.
20 Ma fare pilung e yoeg ngoraed ni dabra suloed; ere ra damomuw gaed ngakʼ fare pilung, mar guyed rogon ni nge gafgow, nge madaʼ ko ngiyalʼ ni ke yimʼ ko nifiy.
21 Ma ku ranoed ni ngar feked fapi priest ni ngar liiʼed yaed, mar miil gaed roraed.
22 Me yibi buch ni arame ke yaen ni ngar suloed ko fare binaw ku Nephi, mar madaʼ gaed fapi gidiiʼ rokʼ Gideon. Ma fapi gidiiʼ rokʼ Gideon e roeged ngoraed gubin e pinʼen ni ke buch rokʼ pi leʼengiraed, nge pi bitir roraed; nge fapi Lamanites e kar piiʼed matʼawraed ni ngar pired ko binaw u dakean e wup tax ngakʼ fapi Lamanites ni balaey ko gubin e chugum roraed.
23 Ma fapi gidiiʼ e roeged ko fapi gidiiʼ rokʼ Gideon ni kar liiʼed fare pilung, ma fapi priest rokʼ e kar miil gaed kar kan gaed boech nga lan wuruʼ e binaw.
24 Me yibi buch u tomuren ni kar muʼ gaed ko morngaʼag, mar suloed ko fare binaw ku Nephi, u fithikʼ e falfalaenʼ, ni bachan e pi leʼengiraed nge pi bitir roraed e kuyaed baey ni dan liiʼraed; ma roeged ngakʼ Gideon ko mang e kar rinʼed ngakʼ fare pilung.
25 Me yibi buch ni fare pilung ko Lamanites e michmich ngoraed, ni pi gidiiʼ rokʼ e dabra liiʼed yaed.
26 Nge ku arragon ngakʼ Limhi, ni bachan e ir fak fare pilung, ma bachan e fapi gidiiʼ e ra dugiliyed ko fare lung, ere michmich ngakʼ fare pilung ko fapi Lamanites ni fapi gidiiʼ rokʼ e yaedra piiʼ e tax ngakʼ, ni balaey ko gubin e chugum roraed.
27 Me yibi buch ni Limhi e tabab i oge lung me sunmiy e gapas nga fithikʼ e gidiiʼ rokʼ.
28 Ma fare pilung ko fapi Lamanites e ra tayed e matanag nge liyeg farengi binaw, ni nge yog ni tay fapi gidiiʼ rokʼ Limhi u lan farengi binaw, ni nga dab ranoed nga lan wuruʼ e binaw; ma be ayuweg e pi matanag rokʼ ko pinʼen nibe yog ngakʼ u paʼ fapi Nephites.
29 Ere chiney e fare pilung i Limhi e ki ululiy e gapas u lan gilʼilungun u langgin lʼagruw e duw, ni arame fapi Lamanites e dakur gafgow niged raed ara ragayed rogon ni ngar liiʼed yaed.