1 Chiney e yibi buch u tomuren fapi pagael ni fak Mosiah e kar rinʼed gubin e pinnʼey, mar feked ini yaed ngar suloed ngakʼ e chitamangraed, ni fare pilung, ya yaed baʼadag ni nge pagraed, nge piʼin baʼaram ni kar melʼeged, ni ngar uned ngoraed nga ranoed ko fare binaw rokʼ Nephi ni gomanga yog nra machib niged fapinʼen ni kar rungʼaged, ni gomanga yog nra weliyed fare thin rokʼ Got ngakʼ e pi walagraed, ni fapi Lamanites—

2 Ni gomanga yog nra feked raed iyaen ko fare tamilang ni morngaʼagen fare Somoel ni Got roraed, mar micheged ngaenʼraed morngaʼagen fare denen ko pi chitamangraed; ma sana gomanga rayog ni ngar chuweged e fananikan roraed ngakʼ fapi Nephites, ni gomanga yog ni pigaenʼraed ngar falfalaenʼ gaed ngakʼ fare Somoel ni Got roraed, ni gomanga yog ni felʼ thilraed ngoraed, ni nge yaeni aw ni dakuriy e togopluw u dakean gaʼangin yang farengi nam niʼir e piiʼ fare Somoel ni Got roraed ngoraed.

3 Chiney e ur athpeged ni ngan weliy morngaʼagen e thap ngakʼ gubin e gidiiʼ, ya dabitaw u gumʼirchaʼraed ni ngar pired ngar guyed e gidiiʼ ni ngemʼ; arragon, ya mus ni ngan lemnag beeʼ ni nge paer u fithikʼ e gafgow ni dariy nʼumngin i napʼan ma be kʼaring e daʼadaʼ, nge tʼon ni murus ngoraed.

4 Ere aray rogon ni yib fare Kan ni Thothup rokʼ Somoel i muruwel u dakeanraed, ya yaed e ur moyed ni bogi tadenen ni ubchiyaʼ. Ma fare Somoel e guy nib mʼag u lan e murnguy rokʼ ni nge tay raed ni dabra mʼaed; yug aram rogon machane ra gafgow gaed ni amithngin e kirbaenʼ ni bachan e pi denen roraed, ma kar mʼaed ko gafgow nge murus nib gel ni richey min chuwegraed ni dab kur suloed biʼid.

5 Me yibi buch ni ur wenig gaed ngakʼ e chitamangraed nib yoʼor e rran ni nge pagraed nga ranoed ko fare binaw ku Nephi.

6 Me yaen fare pilung i Mosiah nge meybil nge fith Somoel riy ko ba mangil fa ba kireb ni nge pag fapi pagael ni fak nga ranoed nga fithikʼ fapi Lamanites ni ngar machib niged fare thin.

7 Ma fare Somoel e gaʼar ngakʼ Mosiah: Mu pagraed nga ranoed, ya boʼor e piʼin nra michaenʼ ko thin roraed, ma ra yog ngoraed e yafos ni gubinfen; ma gura chuweg e pi pagael nir ni fakam u paʼ fapi Lamanites.

8 Me yibi buch ni Mosiah e piiʼ matʼawraed ni nga ranoed ngar rinʼed ni boed rogon ni yaed be yoeg.

9 Mar milekag gaed iyaen nga lan wuruʼ e binaw ni nga ranoed ra machib niged fare thin nga fithikʼ fapi Lamanites; me gag e bay fin gupiiʼ bbabyor ni morngaʼagen e pinʼen ni ur rinʼed u tomuren e tiney.

10 Chiney e fare pilung i Mosiah e dariy beeʼ nra piiʼ gilʼilungun ngakʼ, ya dariy reb fapi pagael ni fak nra mʼagaenʼ ngay ni nge fek lungun gilʼilungun.

11 Ere fek fapi chep ni kan ker nga dakean fapi yungi plate ni brass, nge ku fapi plates ku Nephi, nge gubin banʼen niki ʼi chaʼariy ma be ayuweg u rogon e pi motochiyel rokʼ Got, u tomuren ni ke muʼ i piliyeg e thin riy me yoeg ni ngan yoloey e pi chep ni bay ko fapi plate ni gol niʼir faram e pirʼeg fapi gidiiʼ rokʼ Limhi, niʼir e thil u paʼrow Limhi;

12 Ma pinnʼey e rinʼ ni bachan e magafaenʼ ko pi gidiiʼ rokʼ; ya ka yigi pag rogon ni yaed baʼadag ni ngar nanged morngaʼagen fapi gidiiʼ ni kar mʼaed u tane mael.

13 Ere chiney e piliyeg e thin riy, ko fagal rabaʼ i malang ni kan mʼag ko fagal lay i silber nib bug.

14 Chiney e pinnʼey e ni tʼaer midlean aram ko tabolngin, min piiʼ ke af iyib nga butʼ u rebo mfen ngo rebo mfen, ni fen e piliyeg thin ko pi thin;

15 Maki i chaʼariy ma be ayuweg Somoel, ni nge yog ni nang gubin e gidiiʼ nra paer ko fare binaw, e pi denen nge ngongol ni kireb ko gidiiʼ rokʼ;

16 Ma chaʼ ni bay e pinnʼey rokʼ e kanoeg ni beeʼ nib tathogthog banʼen u dakean, ni woed rogon ni kakrom.

17 Ere tomren ni ke muʼ Mosiah i piliyeg e thin ko pi chep ney, ma amsap gaed, me piiʼ bbabyor ni morngaʼagen bogi gidiiʼ ni kar mʼaed, aram ko fare ngiyalʼ i nʼen nni gatheayraed, ni fare ngiyalʼ i nʼen nni gatheayraed nge sul nge madaʼ ko ngiyalʼ ni un toey e wulyang ni ngan yaen riy nga tharmiy, ko fare ginnʼem ni fare Somoel e athkuy e thin ko gidiiʼ riy mar garar gaed u dakean gubin yang u fayleng, arragon, ma aram ko ngiyalʼ nem nge sul nga tomur nge madaʼ ko ngiyalʼ ni sum Adam.

18 Ere chiney e re babyor ney e ri kʼaring e kirbaenʼ ni rib gel ngakʼ fapi gidiiʼ rokʼ Mosiah, arragon, ra sug gaed ko kirbaenʼ; machane ke piiʼ ngoraed e tamilang nib gaaʼ, niki falfalaenʼ raed ngay.

19 Ma re babyor ney e bay ni yoloey u tomuren e tiney; ya musap gaed, rib tʼuf ni gubin e gidiiʼ ma nge nang e pinʼen ni kan yoloey nga langgin e re babyor ney.

20 Ere chiney, e woed ni kugog ngomed faram, u tomuren ni ke muʼ fare pilung i Mosiahʼ i rinʼ e pinnʼey, me fek fapi plate ni brass, nge gubin e pinʼen niki i chaʼariy, nge piiʼ ngakʼ Alma, ni ir beeʼ nib pagael ni fak Alma; arragon, gubin e pi chep nge fapi mamaʼen e piliyeg thin, ma npiiʼ ngakʼ, me chiyliy ngakʼ ni nge chaʼariy me kol ayuwngin, ma ngki chaʼariy rebe chep ni morngaʼagen pi gidiiʼ ney, ma ngan piiʼ u rebo mfen ngo reb, ni boed rogon ni afu paʼay iyib nga butʼ ko ngiyalʼ ni chuw Lehi u Jerusalem.