1 Me yibi buch ni Amulon e mʼagaenʼ fare pilung ko Lamanites ngakʼ; ere, fare pilung ko fapi Lamanites e piiʼ matʼawon nge pi walagen ni ngan dugliy raed ni ngar manged sensey ko gidiiʼ rokʼ, arragon, ko pi gidiiʼ ni ur moyed u lan fare binaw nu Shemlon, ngo lan fare binaw nu Shilom, ngo lan fare binaw nu Amulon.

2 Ya fapi Lamanites e kar suweyed gubin e pi binaw ney; ere, fare pilung ko fapi Lamanites e ke dugliy e pilung ko gubin yang e pi binaw ney.

3 Ere chiney e fithingan fare pilung ko Lamanites e Laman, ni kan tunguy fithingan e chitamangin ngakʼ; ere yima pining ni pilung i Laman. Ere beeʼ nib pilung rokʼ buʼulung i gidiiʼ nib yoʼor.

4 Me dugliy e pi sensey u fithikʼ pi walagen Amulon u lan gubin yang e binaw ni i paer e gidiiʼ rokʼ riy; ma arame ni tabab i fil fare thin rokʼ Nephi u fithikʼ gubin e pi gidiiʼ rokʼ fapi Lamanites.

5 Ere yaed bogi gidiiʼ nra pired nib felʼ thilraed ngoraed; machane dar nanged Got; ara pi walagen Amulon e rafiled ngoraed banʼen ni morngaʼagen fare Somoel ni Got roraed, ara fare motochiyel rokʼ Moses; ara rifiled ngoraed fapi thin rokʼ Abinadi;

6 Machane rafiled ngoraed ni ngar chaʼariyed e chep roraed, ni nge yog nra yol gaed ngoraed.

7 Ere aray rogon ni tabab e falaʼab ngakʼ fapi Lamanites iyaen, mar tabab gaed ko folchuwayʼ u thilraed mar monʼog gaed nib almarin, mar manged bogi gidiiʼ nib salap ko sabaenbaen nge gidiiʼ nib sogogonop, ko gonop nu fayleng, arragon, bogi gidiiʼ ni rib salap ko sabaenbaen, ma yaed baʼadag gubin mit e ngongol nib kireb nge matgael, ma kemus ni yigoʼ fithikʼ i pi walagraed e darur rinʼed banʼen riy ni aram rogon.

8 Ere chiney e yibi buch ni Amulon e tabab i gagyeg nag matʼawon u dakean Alma nge pi walagen, me tabab i gafgow nag, me guy rogon ni pi bitir rokʼ e nge gafgow nag pifakraed.

9 Ya Amulon e manang Alma, ni immoy ni ir reb fapi priest rokʼ fare pilung, ma ire chaʼ ni mich u waenʼ fapi thin rokʼ Abinadi min tuluf nge chuw u pʼoewchen fare pilung, ere ri damomuw ngakʼ; ya bay nga tanpaʼ fare pilung i Laman, machane be gagyeg nag matʼawon u dakeanraed, me piiʼ e muruwel ngoraed, me tay e chaʼ ni ma guy e muruwel ni nge guy raed.

10 Me yibi buch nri gel e gafgow nge kirbaenʼ ngoraed mar tabab gaed ko meybil nib noemow ngakʼ Got.

11 Ma Amulon e yoeg ngoraed ni ngar tileged e pi mayoer roraed; me tay e matanag ni nge matangiyraed, ni chaʼan ni ngan pirʼeg ni be meybil ngakʼ Got e ngan liiʼ ngemʼ.

12 Ere Alma nge gidiiʼ rokʼ e dakur meybil gaed ngakʼ fare Somoel ni Got roraed nibe yaen lamraed, machane ur meybil gaed u laniyaenʼraed ngakʼ; ma ire manang e tafnaey ko pi gumʼirchaʼ roraed.

13 Me yibi buch ni yib laman fare Somoel ngoraed u fithikʼ e pi gafgow roraed, ni be gaʼar: Mu puged oewchmed ngalang ma nge pagaenʼmed, ya gumnang fare mʼag ni kam tayed u thildaed; ma gura falʼeg ba mʼag u thilmaed e gidiiʼ rog mug chuwegraed u kalbus.

14 Ma kubay gu baʼudeg e pi muruwel ni yibe tay nga dakean poemed, nri dab kum thamiyed u dakean keruʼmed, ni ku mus ko ngiyalʼ ni gimed bay u kalbus; ma biney e nggu rinʼ ni nge yog ni ngam manged mich rog u tomuren e ngiyalʼ ney, ma nge yog ni ngam nanged nib dugil ni gag, fare Somoel ni Got, e guma ayuweg e gidiiʼ rog u fithikʼ e pi gafgow roraed.

15 Ere chiney e yibi buch ni fapi muruwel ni kan piiʼ ngakʼ Alma nge pi walagen e ni baʼudeg ngoraed; arragon, fare Somoel e piiʼ gelingraed ni nge moem e pi muruwel roraed ngoraed, mar fol gaed u fithikʼ e falfalaenʼ nge gumʼaenʼ ko gubin e pinʼen ni baʼadag fare Somoel.

16 Me yibi buch ni rib gele mich roraed nge gumʼaenʼ roraed ni arame ki yib fare lam rokʼ fare Somoel ngoraed bayay, nibe gaʼar: Nge pagaenʼmed, ya gabul e gura chuwegmed u kalbus.

17 Me gaʼar ngakʼ Alma: Gur e ngam powiʼiy e pi gidiiʼ ney, ma bay gu mʼon nggu powiʼiyem ngam chuweg e pi gidiiʼ ney u kalbus.

18 Ere chiney e yibi buch ni Alma nge gidiiʼ rokʼ e nepʼ mar kunuyed e gamanman roraed nga taʼabang, nge awoch roraed; arragon, ni poloʼ e nepʼ nra kunuyed e gamanman roraed nga taʼabang.

19 Me yaeni kadbul riy ma fare Somoel e musur nag fapi Lamanites, arragon, ma gubin e piʼin ma guy e muruwel ma kan musur nagraed.

20 Ere Alma nge gidiiʼ rokʼ e ra chuw gaed nga ranoed nga lan wuruʼ e binaw; ma napʼan ni kar milekag gaed ni poloʼ e rran mar nʼufed e pi tent roraed u lan ba loway, mar tunguyed fithingan e re loway nem ni Alma, ni bachan e ire powiʼiyraed nga lan wuruʼ e binaw.

21 Arragon, ma lan fare loway ku Alma e ra oged e magaer riy ngakʼ Got ni bachan e runguy rokʼ ngoraed, ma ke baʼudeg e pi muruwel roraed, ma ke chuwegraed u kalbus; ya ur moyed u kalbus, ma dariy beeʼ ni yog rokʼ ni nge chuwegraed ma kemus ni fare Somoel ni Got roraed.

22 Ere ra oged e magaer ngakʼ Got, arragon, gubin e pumoʼon roraed, nge gubin e ppin roraed, nge gubin e bitir roraed nra yog ni nge non mar nonaed ni yaed be oge magaer ngakʼ e Got roraed.

23 Ere chiney e fare Somoel e gaʼar ngakʼ Alma: Mu gur nigem ngam chuw nge pi gidiiʼ ney u lan e re binaw ney, ya fapi Lamanites e kar od gaed ma yaed be lʼoelʼoegmed; ere mu chuw gaed u lan e re binaw ney, ma bay gu tileg fapi Lamanites u lan e re loway ney ni nga dab kur lʼoelʼoeged e pi gidiiʼ ney.

24 Me yibi buch ni arame ra chuw gaed ko fare loway, mar milekag gaed nga lan wuruʼ e binaw.

25 Ma tomuren ni kar pired u lan wuruʼ e binaw ni ragag nge lʼagruw e rran mar taw gaed nga lan fare binaw nu Zarahemla; ma fare pilung i Mosiah e ki fekraed u fithikʼ e falfalaenʼ.