1 Ere chiney e yibi buch ni Ammon nge fare pilung i Limhi e ra weliyew ko fapi gidiiʼ rogon ni ngar rinʼed me yog ni ngar chuw gaed u kalbus; ma rruguyew rogon ni gubin fapi gidiiʼ ni ngar mukun gaed nga taʼabang; ma rinʼew e biney ni nge yog ni taʼareb lungun fapi gidiiʼ u morngaʼagen fare miil ni ngar tayed.

2 Me yibi buch ni dar pirʼeged rogon woʼen ni ngar miil gaed u kalbus, ma kemus ni ngar feked e ppin roraed nge bitir roraed, nge gamanman roraed, nge yuʼ ulung i garbaw roraed, nge tent roraed, ngar ranoed nga lan wuruʼ e binaw; ya fapi Lamanites e riyaed boʼor, ma ribe math liyiben ko fapi gidiiʼ rokʼ Limhi ni ngar togopluw gaed ngoraed, ni gomanga ngar fineyed ni ngar chuw gaed u kalbus u dakean e cham ko sayden.

3 Ere chiney e yibi buch ni Gideon e yaen nge yaeni sakʼiy nga pʼoewchen fare pilung, me gaʼar ngakʼ: Chiney O pilung, gur e kam motoyil ko thin rog ni ke yoʼor yay u napʼan ni gadaed be togopluw ngakʼ pi walagdaed, ni fapi Lamanites.

4 Ere chiney O pilung, faʼanra dawor mu pirʼegeg ni guba tapigpig ni dariy angin, ara faʼanra ku aram i yib ke madaʼ ko ngiyalʼ ney ni gabe motoyil ko thin rog ni demutrug rogon, ma be mʼug nib gaʼfan ngom, ere ku arragon ni gubaʼadag ni ngam motoyil ko thin rog e chiney, ma bay gumang tapigpig rom nggu fek e pi gidiiʼ ney nggu chuwegraed u kalbus.

5 Ere fare pilung e piiʼ matʼawon ni nge non. Ere me gaʼar Gideon ngakʼ:

6 Gamnang, bay bangi nʼen nib mab u tabgul nga wuruʼ e binaw, nib mab nga wuruʼ e rungrung ko yoror u tabgul, u baʼan tabgul ko farengi binaw. Ma fapi Lamanites, ara fapi matanag ko Lamanites, e ranepʼ ma yaed ma chingnag; ere mman ngad weregew e thin nga fithikʼ gubin e pi gidiiʼ ney ni ngar kunuyed nga taʼabang e pi gamanman roraed nge yuʼ ulung i garbaw roraed, ni nge yog nra wawliyedraed nga wuruʼ e binaw ni ke nepʼ.

7 Ma bay guwaen nggu rinʼ nrogon ni kam chiyliy ngog ma nggu piiʼ e waeyin ngakʼ fapi Lamanites ko yan tomur, ma bay ra unumed ngar ching gaed; ma gaed yaen u baʼani gilaeyʼ ko gin ni yaed ma paer riy ko farengi nʼen nib miith morngaʼagen nib mab nga wuruʼ e binaw u napʼan ni kar ching gaed ma yaed be mol.

8 Ma aray rogon ni gadaed ra yaen, ni gadaed e pi ppin rodaed nge pi bitir rodaed, nge gamanman rodaed, nge pi yuʼ ulung i garbaw roraed nga lan wuruʼ e binaw; ma gadaed milekag ngad liyeged fare binaw nu Shilom.

9 Ere yibi buch ni fare pilung e motoyil ko thin rokʼ Gideon.

10 Ere pilung i Limhi e yoeg ni fapi gidiiʼ rokʼ e ngar kunuyed e gamanman roraed nga taʼabang; me piiʼ e waeyin ni oren ni yima piiʼ ngan fek iyaen ngakʼ fapi Lamanites; ma ki piiʼ boech e waeyin nib yoʼor nib tawaʼath ngoraed; mar unumed fapi waeyin ni rib puf rograed ngay niʼir e ke malʼog fare pilung i Limhi kan piiʼ ngoraed.

11 Ere yibi buch ni fapi gidiiʼ rokʼ fare pilung i Limhi e ranoed ni ke nepʼ nga lan wuruʼ e binaw ni yaed nge pi gamanman roraed, nge pi yuʼ ulung i garbaw roraed, ma ranoed ngar liyeged fare binaw nu Shilom u lan wuruʼ e binaw, mar puluweged ko fare binaw nu Zarahemla, ni be powiʼiyraed Ammon nge pi walagen.

12 Ma kar feked gubin e gol nge silber roraed, nge pinʼen nib gaʼfan ngoraed, ni tin nra yog ni ngar feked, nge ku arragon nge ggan roraed, nra feked nga lan wuruʼ e binaw; mar ʼulʼul gaed ko milekag roraed.

13 Ma tomuren ni ke yoʼor e rran yaed u lan wuruʼ e binaw mar taw gaed nga lan fare binaw nu Zarahemla, mar cheag gaed ko gidiiʼ rokʼ Mosiah, mar pired ni kar mʼing gaed nga tanpaʼ.

14 Me yibi buch ni Mosiah e thapegraed u fithikʼ e falfalaenʼ; ma ki thapeg e pi chep roraed, nge ku fapi chep ni faʼani pirʼeg fapi gidiiʼ rokʼ Limhi.

15 Ere chiney e yibi buch u napʼan ni fapi Lamanites e kar pirʼeged ni fapi gidiiʼ rokʼ Limhi e kar chuw gaed u lan fare binaw ni ke nepʼ, mar lʼoeged ba ulung i salthaw nga lan wuruʼ e binaw ni ngar lʼoelʼoeged yaed;

16 Ma tomuren ni kar lʼoelʼoeged yaed u lan lʼagruw e rran, ma dakiyog nra laeked abraed; ere ra malog gaed u lan wuruʼ e binaw.