1 Ere chiney e napʼan ni rungʼag fare pilung e pi thin ney, me gaʼar ngakʼ fapi priest rokʼ: Mu chuweged e chaʼaney, mi gimed liiʼ nge yimʼ; fa mang rogon ngodaed, ya ke aliliy.

2 Ma ranoed ngakʼ ni kar nomeaged ni ngar koeled; machane deyog ngoraed, me gaʼar ngoraed:

3 Dab mmath gaed ngog, ya ra liiʼmed Got ni faʼan gimed ra koleg, ya dawor gog fare mulwol niʼir e ke lʼugeg Somoel ni nggu weliy; ma ku dawor gog ngomed fare nʼen ni kamoeged ni nggu weliy ngomed; ere, Got e dabi pag ni ngan liiʼeg ko ngiyalʼ ney.

4 Machane thingar gu muguʼuliy fapi motochiyel niʼir e ke chiyliy Got ngog; nge bachan e kugog ngomed e tin riyulʼ ma kam damomuw gaed ngog. Ma ku bayay, bachan e kug weliy e thin rokʼ Got ere kam lemniged ni kug aliliy.

5 Ere chiney e yibi buch u tomuren ni ke muʼ Abinadi i weliy e pi thin ney, ma fapi gidiiʼ rokʼ fare pilung i Noah e daki thog roraed ni ngar koeled, ya fare Kan ni Thothup rokʼ fare Somoel e ke yib ngakʼ; ma oewchen e ke gaelgael raʼen, ni boed rogon ni rinʼ Moses u napʼan ni bay ko fare burey nu Sinai, u napʼan ni benon ngakʼ Somoel.

6 Ere non u dakean gelingin nge matʼawon ni yib rokʼ Got; ma ki ʼulʼul ko thin rokʼ ni gaʼar:

7 Kam guyed ni dariy gelingmed ni ngam liiʼed gag, ere nggu muʼ i yoeg e mulwol rog. Arragon, ma gum nangfan ni bay i kaen ko gumʼirchaʼ romed ni bachan e gube yoeg ngomed e tin riyulʼ ni morngaʼagen e dodow ko pi denen romed.

8 Arragon, nge pi thin rog e ke ginaenʼmed ngay make balyangaenʼmed ngay, make kʼaring e damomuw ngomed.

9 Machane gura muʼ i yoeg e mulwol rog; ma arame demutrug e gin ni gura yaen ngay, ni faʼanra kug thap.

10 Machane baʼaray banʼen ni thingar gu weliy ngomed, nʼen ni gimed rarinʼ ngog, u tomuren e biney, e ireram e miti nʼen nge miti gagyeg ni bay yib.

11 Ere chiney e nggu biʼeg ngomed e tin kubay ko fapi motochiyel rokʼ Got, ya gumnang ni dawori rich nga lan gumʼirchaʼmed; Gumanang ni kam filed kam nanged ma kam filed iyaen e ngongol ni denen u lan e gin gaaʼ ko yafos romed.

12 Ere chiney, e ngam tayed u wunʼmed ni kugog faram ngomed: Dab mu ngongoliyed e liyos, ara yaʼan e pinʼen ni bay u tharmiy, ara tin ni bay u fayleng u tane butʼ, ara tin ni bay u fithikʼ e raen u tane butʼ.

13 Nge ku bayay: Ma dab mu siroʼ gaed ngoraed, ara mu pigpig gaed ngoraed; ya gag fare Somoel ni Got romed e gub Got ni guma talyeg nag e gidiiʼ rog, ni kugra gechig nag e piʼin bitir ni bachan e pi denen rokʼ e pi chitamangraed, nge yaeni madaʼ ko bin dalip nge bin aningeg e mfen rokʼ e piʼin ni yaed ma fananikayeg;

14 Ma bay gu dag e murnguy rog ngakʼ yu biyuʼ i yaed e piʼin ni gub tʼuf roraed ma yaed mafol ko pi motochiyel rog.

15 Dabi un fithingan fare Somoel ni Got romed u lʼugunmed ni dariy fan; ya fare Somoel e dabi tay ni dariy thibngin e chaʼ ni ke un fithingan u lʼugun ni dariy fan.

16 Mu tayed u wunʼmed fare rran ni madnom, ni ngam tayed nib thothup.

17 Nelʼ e rran ni ngam muruwel gaed riy, ni ngam rinʼed gubin e muruwel romed.

18 Machane bin medilip e rran ngay, e fare madnom rokʼ fare Somoel ni Got romed, ni dab mu rinʼed e muruwel riy, gimed, ara pagael ni fakmed, ara ppin ni fakmed, pumoʼon ni tapigpig romed, ara ppin ni tapigpig romed, ara gamanman romed, ara ba milekag ni bay u lan e yoror romed;

19 Ya lan nelʼ e rran ma fare Somoel e ngongoliy e tharmiy nge fayleng riy, nge day, nge gubin banʼen ni bay u fithikʼ; ere fare Somoel e yibliy fare rran ni madnom, me thothup nag.

20 Mu liyoer ko chitamam nge chitinam, ni gomanga yog ni nʼuw napʼan e pi rran rom u dakean e nam ni ke piiʼ fare Somoel ni Got rom ngom.

21 Dab mu liiʼ beeʼ nge yimʼ.

22 Dab mu pirew beeʼ ni gathi mabgol rom. Dab mu moroʼroʼ.

23 Dab mu tʼaer e thin nga dakean e bugul yoror rom.

24 Dab mu chogow nag e naʼun ko bugul yoror rom, dab mu chogow nag leʼengin e bugul yoror rom, ara pumoʼon ni tapigpig rokʼ, ara ppin ni tapigpig rokʼ, ara garbaw rokʼ, ara donkey rokʼ, ara demutrug banʼen nib milsuwon ngakʼ e bugul yoror rom.

25 Me yibi buch u tomuren ni ke muʼ Abinadi i yoeg e pinnʼey me gaʼar ngoraed: Kam filed ko pi gidiiʼ ney ni thingar rinʼed gubin e pinnʼey ni nge yog ni ngar fol gaed ko pi motochiyel ney?

26 Gube gaʼar ngomed, Dawor; ya faʼanra kam rinʼed, ma fare Somoel e dabi lʼugeg ni nga gub gu prophesy nag e kireb ni morngaʼagen e pi gidiiʼ ney.

27 Ma chiney e kamoeged ni fare thap e rayog u dakean fare motochiyel rokʼ Moses. Ere gube yoeg ngomed ni rib tʼuf ni ngam fol gaed ko fare motochiyel rokʼ Moses e ngiyalʼ ney; machane gube yoeg ngomed, ni bay e ngiyalʼ ni bayi taw ngay ma dab ki tʼuf ni ngan fol ko fare motochiyel rokʼ Moses.

28 Nge ku boech, gube yoeg ngomed, ni fare woʼen e thap e gathi kemus ni yigoʼ fare motochiyel e rayog u dakean; ya manga boech ni gathi bachan fare bayul, ni Got ni riʼir e nge rinʼ ni fan ko pi denen nge ngongol ni kireb ko gidiiʼ rokʼ, ma ri yaedra yimʼ ni dabi siy, ni yug aram rogon ni kubay fare motochiyel rokʼ Moses.

29 Ere chiney e gube yoeg ngomed ni ngiyalʼ nem e rib tʼuf ni ngan piiʼ ba motochiyel ngakʼ fapi gidiiʼ ku Israel, arragon, ni ba motochiyel nib gel; ya yaed bogi gidiiʼ nib gellaenʼ, ni yaed ba papay ni ngar rinʼed e ngongol ni kireb, ma ba sasagaʼal iyib ngaenʼraed fare Somoel ni Got roraed;

30 Ere immoy ba motochiyel nni piiʼ ngoraed, arragon, ba motochiyel ko muruwel nge gamʼing, ba motochiyel ni thingar rafol gaed riy u rebo rran ngo rebo rran, ni ngar fol gaed riy nib pug uran ngoraed Got nge muruwel roraed ngakʼ.

31 Machane musap gaed, gube yoeg ngomed, ni gubin e pinnʼey ma bogi pow u bogi banʼen ni bayi buch.

32 Ere chiney, gulley ur nanged fan fare motochiyel? Gube yoeg ngomed, Dangay, gathi yaed gubin ma ra nanged fan fare motochiyel; ni bachan e ʼelʼel u gumʼirchaʼraed; ya dar tamilang laniyaenʼraed riy ni dariy beeʼ nra thap ma kemus nu dakean e bayul rokʼ Got.

33 Ya musap gaed, gathi prophesy Moses ngoraed ni morngaʼagen fare wub rokʼ fare Messiah, nge Got ni ra bayuliy e gidiiʼ rokʼ? Arragon, nge gubin e pi profet ni kar prophesy gaed ni kaʼaram ko sommʼon ni sum e fayleng—dawor ra weliyed nib yoʼor ara buchʼuw morngaʼagen e pinnʼey?

34 Dawor roeged ni Got e ire ra yib nga butʼ nga fithikʼ e gidiiʼ, me yibi sum ni boed yaʼan beeʼ nib moʼon, me iyaen u fithikʼ ba gelingin u dakean e fayleng?

35 Arragon, ma ku dawor roeged nra yib nag e foskoyamʼ, ma ire, ra un gafgow nag?