1 Chiney e immoy bangi banʼen u Shemlon ni ma yaen e pi ppin ni fak fapi Lamanites ngay nga ur tang gaed, ma yaed be churuʼ, ma yaed be falfalaenʼ.

2 Me yibi buch ni immoy rebo rran ni mukun ini yaed nga ur tang gaed ma yaed be churuʼ.

3 Ere chiney e fapi priest rokʼ fare pilung i Noah, e kar tamraʼ gaed ni ngar suloed ko fare binaw ku Nephi, arragon, ma kuyaed be rus ni yira liiʼraed, ere dakir thog rograed ni ngar suloed ngakʼ e pi leʼengiraed nge pi bitir roraed.

4 Ma bachan e kar pired u lan wuruʼ e binaw, nge bachan e kar pirʼeged fapi ppin ni fak fapi Lamanites, ere ramith gaed nga ur yaliyed yaed;

5 Ma napʼan ni kar guyed ni kar mukun gaed nga taʼabang ni yaed bbuchʼuw ni ngar churuʼ gaed, mar baed nga tamilang ko fagin ni yaed be miith riy ngar koeled raed mar feked raed nga lan wuruʼ e binaw; arragon, ma riliwʼ nge aningeg fapi ppin ni fak fapi Lamanites nra feked nga lan wuruʼ e binaw.

6 Me yibi buch u napʼan ni fapi Lamanites e ra pirʼeged ni fapi ppin ni fakraed e dakur moyed, mar damomuw gaed ngakʼ fapi gidiiʼ rokʼ Limhi, ya kar lemniged ni fapi gidiiʼ rokʼ Limhi e kar iringed raed.

7 Ere ra lʼoeged e salthaw roraed; arragon, ni mus ko fare pilung me un ko yaen ni bay nga mʼon ko gidiiʼ rokʼ; ma ranoed ko fare binaw ku Nephi ni ngar liiʼed fapi gidiiʼ rokʼ Limhi.

8 Ere chiney e Limhi ni bay ko fare gilʼedamit e sap me guyraed, nri guy ni kar feked gubin mite tatlin e mael; ere kunuy e gidiiʼ rokʼ nga taʼabang, ma ranoed ra mith gaed ngar soen niged raed u lan e pi yungi rad ngo fithikʼ e garger.

9 Me yibi buch u napʼan ni yib fapi Lamanites, me og fapi gidiiʼ rokʼ Limhi ngoraed, ko gin ni yaed be miith riy, mar tabab gaed i liiʼraed.

10 Me yibi buch nri almarin e mael, ya racham gaed ni boed e layon ni yaed be cham nag garaed.

11 Me yibi buch ni fapi gidiiʼ rokʼ Limhi e ra tabab gaed i tuluf fapi Lamanites; machane de taʼareb urngiraed ko fapi Lamanites. Machane racham gaed ni fan ko yafos roraed, nge pi leʼengiraed, nge pi bitir roraed, ere ur athamgil gaed mar cham gaed ni boed rogon e dragon.

12 Me yibi buch nra pirʼeged fare pilung ko Lamanites u fithikʼ e piʼin ni kar mʼaed; machane dawori yimʼ, make madʼad ma kan digey u butʼ, ere rib papay ni miil e gidiiʼ rokʼ.

13 Ere rafeked ngar taflay niged e madʼad u doew, mar feked iyaen ngakʼ Limhi, mar gaʼar gaed: Musap, baʼaray fare pilung ko fapi Lamanites; bachan e ke madʼad make mul nge aw nga fithikʼ e piʼin ni kar mʼaed, mar paged nga ranoed; ere musap, kug feked iyib ngom; ngam pagmaed nggu liiʼed ngemʼ.

14 Machane Limhi e gaʼar ngoraed: Dab mu liiʼed ngemʼ, machane mu feked ngaray ni nge yog nug guy. Ere rafeked iyaen ngakʼ. Me gaʼar Limhi ngakʼ: Mang tapgin ni ngam baed ni mael ngakʼ e gidiiʼ rog? Musap, gidiiʼ rog e dawor ra thʼaebed fare michmich ni kug tay ngom; ere, mangfan ni ngam thʼaeb e michmich ni kam tay ko gidiiʼ rog?

15 Ma arame chiney e fare pilung e gaʼar: Kug thʼaeb fare michmich ya bachan e gidiiʼ rom e kar feked bogi ppin ni fak e pi gidiiʼ rog; ere u fithikʼ e damomuw rog mugog ko gidiiʼ rog ni ngar baed ni mael ngakʼ e gidiiʼ rom.

16 Ere chiney e Limhi e dariy banʼen ni ke rungʼag ni morngaʼagen e tiney e paʼ; ere me gaʼar: Bay gu duwriy u fithikʼ e gidiiʼ rog ma chaʼ ni yira pirʼeg ni ke rinʼ e biney ma yira liiʼ ngemʼ, Ere tuʼog ba magow ni nge yaen u fithikʼ e gidiiʼ rokʼ.

17 Ere chiney e napʼan ni Gideon e rungʼag e pinnʼey, niʼir e kapten ku pilung, me yaeni gaʼar ngakʼ fare pilung: Gube siroʼ nag ngom ni ngam soen, dab mugow u fithikʼ e pi gidiiʼ ney, ma dab mudugliy banʼen nga dakeanraed.

18 Ya dakir yib nganʼum fapi priest rokʼ e chitamam, ni faʼan igay e pi gidiiʼ ney ni ngar liiʼed yaed? Ma gathi yaed bay faram u lan wuruʼ e binaw? Ere gathi yaed e piʼin ni kar iringed fapi ppin ni fak e Lamanites?

19 Ere chiney, e musap, nga moeg ngakʼ fare pilung morngaʼagen e pinnʼey, ni nge yog ni yoeg ko gidiiʼ rokʼ ni nge yog ni wurengaenʼraed ngodaed; ya musap kar muʼ gaed i falʼeg rograed ni ngar baed ngodaed ko mael; ma musap ri gadaed bbuchʼuw.

20 Ere musap, yaedra yib ni yaed boʼor ulung; ma fare pilung e faʼanra dabi piiʼ e gapas nga laniyaenʼraed ma thingar damʼaed.

21 Ya gathi ke muguʼul fapi thin rokʼ Abinadi, ni faʼani prophesy nag nib togopluw ngodaed—ma gubin e pinnʼey e ke buch ni bachan e dadfol gaed ko fapi thin rokʼ Somoel, ma gadaed keruʼuy e pi denen rodaed?

22 Ere chiney e mmarow ngad falʼeged laniyaenʼ fare pilung, ma gadaed ayliy fare michmich ni kad tayed ngakʼ; ya kub felʼ ni ngad manged sib ko bin ni ngad dar gaed e yafos rodaed; ere, mmarow ngad tileged e puʼoeg rachaʼ ni yoʼor.

23 Ere chiney e Limhi e yoeg ko fare pilung gubin fapinʼen ni morngaʼagen e chitamangin, nge fapi priest ni kar miil gaed nga lan wuruʼ e binaw, me yinʼ e kireb riy nga dakeanraed ni kar iringed e pi ppin ni fakraed.

24 Me yibi buch ni fare pilung e wurengaenʼ ngakʼ e gidiiʼ rokʼ Limhi; me gaʼar ngoraed: Marow nga daroed ngad guyed e gidiiʼ rog, ni dariy e talin e cham rodaed; ma gube dugliy ngomed u dakean e michmich roeg ni gidiiʼ roeg e dabra liiʼed gimed.

25 Me yibi buch ni ra leaked fare pilung, ma ranoed ni dariy e talin e cham roraed ni ngar madaʼ gaed fapi Lamanites. Ere yibi buch ni arame ra madaʼ gaed fapi Lamanites; ma fare pilung ko Lamanites e yibi siroʼ ngoraed, me wenig nag fapi gidiiʼ rokʼ Limhi.

26 Ma napʼan ni guy fapi Lamanites ni fapi gidiiʼ rokʼ Limhi e dariy talin e cham roraed, me kirebaenʼ raed ngoraed me wurengaenʼraed ngoraed, mar suloed e pilung roraed u fithikʼ e gapas ko binaw roraed.