1 Ere chiney e fare pilung i Mosiah e yoeg ni gubin fapi gidiiʼ ma ngar moʼolung gaed nga taʼabang.

2 Ngiyalʼ ney e deyoʼor fapi Nephites, ara boʼor e piʼin ni pifak Nephi, ni woed urngin fapi gidiiʼ nu Zarahemla, ni yaed pifak Mulek, nge piʼin ni kar uned ngakʼ nga lan wuruʼ e binaw.

3 Ma deyoʼor fapi gidiiʼ ku Nephi nge fapi gidiiʼ ku Zarahemla ni woed urngin fapi Lamanites; arragon, de chuchugur ni nge taʼareb urngiraed.

4 Ere chiney e gubin fapi gidiiʼ ku Nephi mar moʼolung gaed nga taʼabang, nge gubin fapi gidiiʼ nu Zarahemla, mar moʼolung gaed nga taʼabang ni lʼagruw ulung.

5 Me yibi buch ni Mosiah e biʼeg, me yoeg ni ngan biʼeg, fapi chep rokʼ Zeniff ngakʼ e gidiiʼ rokʼ; arragon, me biʼeg fapi chep rokʼ fapi gidiiʼ ku Zeniff, u napʼan nra chuw gaed ko fare binaw nu Zarahemla nge madaʼ ko ngiyalʼ ni kar suloed bayay.

6 Ma ki biʼeg fare babyor ku Alma nge pi walagen, nge gubin e pi gafgow roraed, u napʼan nra chuw gaed ko fare binaw nu Zarahemla nge madaʼ ko ngiyalʼ ni kar suloed bayay.

7 Ma chiney, e napʼan ni muʼ Mosiah i biʼeg fapi chep, ma gidiiʼ rokʼ e rapired u lan fare binaw ni ke ginaenʼraed me balyangaenʼraed.

8 Ya dar nanged ko mang e ngar lemniged; ya napʼan ni kar guyed fa piʼin ni kan chuwegraed u kalbus mar falfalaenʼ gaed ni rib gel.

9 Ma bayay, napʼan nra lemniged morngaʼagen e pi walagraed ni ke liiʼraed fapi Lamanites mari kirbaenʼraed, ere riyoer niged e kirbaenʼ.

10 Ma bayay, napʼan nra lemniged falʼngin Got, nge gelingin ni chuweg Alma nge pi walagen u tanpaʼ fapi Lamanites ngu kalbus, mar meybil gaed ngakʼ mar oged e magaer ngakʼ Got.

11 Ma bayay, napʼan nra lemniged fapi Lamanites, ni yaed pi walagraed, nge pi denen roraed nge rangi dodow ni kar taw gaed ngay, me amith laniyaenʼraed ni fan ko paer ko yaʼel roraed.

12 Me yibi buch ni piʼin bitir rokʼ Amulon nge pi walagen, ni yaed e kar laʼengiyed fapi ppin ni fak fapi Lamanites, e defalaenʼ raed ko ngongol rokʼ e pi chitamangraed, ma kar dubuyed ni ngan pining fithingan e pi chitamangraed ngoraed, ere rafeked nga dakeanraed fithingan Nephi, ni gomanga yog nni piningraed ni bitir ku Nephi min uneg raed ko mathaʼeg ngakʼ e piʼin ni kanoeg e Nephites ngoraed.

13 Ere chiney e gubin fapi gidiiʼ nu Zarahemla e ni uneg raed ko mathaʼeg ngakʼ fapi Nephites, ma biney e nrinʼ ni bachan e fare lung e dariy beeʼ ni kan dugliy nga dakean ma kemus ni piʼin pifak Nephi.

14 Ere chiney e yibi buch u napʼan Mosiah e muʼ ko numon nge biʼeg babyor ko fapi gidiiʼ, me yoeg ni baʼadag ni Alma e ngki non boech ko fapi gidiiʼ.

15 Ere Alma e non ngoraed, u napʼan ni kar kunuyed yaed nga taʼabang ni yuʼ ulung nib gaaʼ suwon u butʼ, me yanu rebo ulung ngo reb, ni be machib nag ngakʼ fapi gidiiʼ e kalngaenʼ nge michaenʼ ngakʼ fare Somoel.

16 Ere ning chilen ngakʼ fapi gidiiʼ ku Limhi nge pi walagen, ni gubin e piʼin ni kan chuwegraed u kalbus, ni ngar tayed u wunʼraed ni fare Somoel e ire chuwegraed u kalbus.

17 Me yibi buch u tomuren ni Alma e ke fil boʼor banʼen ko fapi gidiiʼ, make muʼ i weliy ngoraed, ma fare pilung i Limhi e baʼadag ni ngan tawfe nag; nge ku gubin e pi gidiiʼ rokʼ ni yaed baʼadag ni ngan kun tawfe nagraed boech.

18 Ere, Alma e yaen nga fithikʼ e raen nge tawfe nagraed; arragon, i tawfe nagraed ni boed rogon ni tawfe nag pi walagen u lan farengi raen ku Mormon; arragon, ma gubin e piʼin ni tawfe nagraed e ra manged gidiiʼen fare galasia rokʼ Got; ma biney e buch ni bachan e mich roraed ko fapi thin rokʼ Alma.

19 Me yibi buch ni pilung i Mosiah e piiʼ matʼawon Alma ni nge yarmiy e pi galasia u gaʼangin yang fare binaw nu Zarahemla; me piiʼ gelingin ni nge yibliy e pi priest nge pi sensey ni nge paer ko pi galasia ni gubin.

20 Chiney e nrinʼ e biney ni bachan e kaygi yoʼor fapi gidiiʼ ni dab kiyog ni nge gagyeg nagraed taʼareb e sensey; ara yog ni yaed gubin mar rungʼaged fare thin rokʼ Got u lan taʼab ulung;

21 Ere ra kunuyed yaed nga taʼabang nib yoyoʼor ulung u butʼ, ni kanoeg ni galasia; ni gubin e galasia nra reb ma bay e priest nge sensey riy, ma rareb e priest ma be machib nag fare thin u rogon ni yoeg Alma.

22 Ere aray rogon, ni yug aram rogon nib boʼor e galasia machane yaed taʼab galasia, arragon, ni fare galasia rokʼ Got; ya dariy banʼen ni yibe machib nag u langgin gubin e pi galasia nem ma kemus ni kalngaenʼ nge michaenʼ ngakʼ Got.

23 Ere chiney e medilip e galasia ni bay u lan fare binaw nu Zarahemla. Me yibi buch ni piʼin ni baʼadag ni ngar feked fithingan Kristus nga dakeanraed, ara fithingan Got, e yaedra un ko galasia rokʼ Got;

24 Ma yaed gubin nni piningraed ni gidiiʼ rokʼ Got. Ma fare Somoel e piiʼ fare Kan ni Thothup rokʼ nga dakeanraed, min falʼeg waʼathraed, mar monʼog gaed u lan fare binaw.