1 Me yibi buch u tomuren ni ke gaman lʼagruw e duw napʼan ni ke yaen me yibi mʼug Abinadi u fithikʼraed, ma dar nanged ni ir, me tabab ko prophecy u fithikʼraed, nibe gaʼar: Baʼaray rogon ni motochiyel fare Somoel ngog, nibe gaʼar—Abinadi, mman ngan prophecy ngakʼ e pi gidiiʼ rog ney, ya kar ʼelʼel niged gumʼirchaʼraed ko thin rog; dawor ra kalgaed ngaenʼraed ko pi ngongol roraed nib kireb; ere, bay gub ngoraed u fithikʼ e damomuw rog, arragon, u fithikʼ e damomuw rog nib maʼangech e bay ggechig nagraed riy ko pi denen roraed nge pi ngongol roraed nib kireb.

2 Arragon, gafgow ngakʼ e biney e mfen! Ma fare Somoel e gaʼar ngog: mu kʼiyeg paʼam nga mʼon ngam prophecy, ni gabe gaʼar: Ri aray rogon niki yoeg fare Somoel, bay yibi buch ni biney e mfen, e bay ni koelraed ngan fekraed nga kalbus, ni bachan e re dodow ko denen ni kar taw gaed ngay, ma bay un bat nag linglingiraed; arragon, ma bayi tuluf raed e gidiiʼ ma yibe piiʼ e muruwel ngoraed nib gel, ma bay un liiʼraed ngar mʼaed, nge pi archeʼ ni malonguy e gamanman, nge pi pilis, arragon, nge pi gamanman nib malboch, e bay ra longuyed raed.

3 Ma bay yibi buch ni yafos rokʼ fare pilung i Noah e ra yaeni boed rogon nʼumngin i napʼan e mad nibe yikʼ u mite e nifiy; ma bayi nang ni gag fare Somoel.

4 Ma bay yibi buch ni bay gu pag e pi gidiiʼ rog ney nge awe gafgow ngoraed ni ubchiyaʼ, arragon, ni uyngol nge mʼar ni ubchiyaʼ; ma bay gguy rogon ngar gelʼgelʼ gaed ko gafgow ni poloʼ e rran.

5 Arragon, ma bay gguy rogon e chugum ni totomal ngan mʼag nga dakean i keruʼ raed; ma bay un lang raed ni boed ba donkey nib maʼay.

6 Ma bay yibi buch ni bay gu piiʼ e nʼuw ni ayis nge yib nga fithikʼraed, me liiʼraed; ma kug ra gechig nagraed ko fare nifeng ni ngek nib gowael ni ma malikʼ nag e gabin; nge chachngeg ni kura gatheay e binaw roraed, mar longuyed e grain roraed.

7 Ma bay gu gechig nagraed ko mʼar ni ubchiyaʼ—ma gubin e pinnʼey e gura rinʼ ni bachan e pi denen roraed nge pi ngongol roraed nib kireb.

8 Ma bay yibi buch ni faʼanra dabra kalgaed ngaenʼraed ma bay gu gatheayraed mug chuwegraed u dakean e fayleng; machane bay ba chep ni yaedra digey nga tomur, ma bay gu chaʼariy ni fan ngakʼ boech e gidiiʼ ni bay ra pired ko farengi binaw; arragon, ni biney e gura rinʼ ni fan ko nge yog nug dag e pi ngongol ni kireb ko tiney e gidiiʼ ngakʼ yug boech e gidiiʼ. Ma bayoʼor bogi banʼen ni prophecy nag Abinadi nib togopluw ngakʼ e pi gidiiʼ ney.

9 Me yibi buch nra puwaenʼ gaed ngakʼ; mar koeled ngar feked ni kan mʼag nga pʼoewchen fare pilung, mar gaʼar gaed ngakʼ fare pilung: Musap, kug feked beeʼ nib moʼon iyib nga pʼoewchem nibe prophecy nag e kireb ni morngaʼagen e gidiiʼ rom, me yoeg ni Got e ra gatheayraed.

10 Ma ki prophecy nag e kireb ni morngaʼagen e yafos rom, me yoeg ni yafos rom e boed e mad nibe gowael u tafen e nifiy.

11 Nge ku bayay, ke yoeg ni gur e gara boed e pan ni mororoy, nri boed e pan ni mororoy nib malikʼ u dakean e falang, nibe miil e gamanman u dakean ma yibe yitʼ nga butʼ ngan yaen u dakean.

12 Nge ku bayay, ke yoeg ni gur e gara boed e floras ko nochi ke gakʼiy nib sug e rachangal riy, nra taw nga, napʼan ni ke felʼ fini mororoy, ma faʼanra thoey e nifeng, me aw nga butʼ nga i yanu butʼ iyaen u dakean e binaw. Ma be dake susun e Somoel e ke yoeg. Ma ke yoeg ni gubin e pinnʼey e ra buch rom ma kemus ni faʼan gara kalnganʼum, ma pinnʼey e aray rogon ni bachan e pi denen rom.

13 Ma chiney, O pilung, ri mang e re kireb ni kam rinʼ, ara ri mang e pi kireb ni ke rinʼ e pi gidiiʼ rom, ni nge gechig nagdaed Got ara nge pufthin nagdaed e re moʼon ney riy?

14 Ere chiney, O pilung, musap, dariy thibngimaed, nge gur, O pilung, e dawor mu denen; ere, re moʼon ney e ke baen ni morngaʼagem, make prophesy ni yigoʼ baen.

15 Ma musap, gadaed ba gel, dabiyog ni nga daroed nga kalbus, ara fek daed e pi toʼogor rodaed ni gadaed e kalbus; arragon, nge gur e ke felʼ rogom u lan fare binaw, ma kura felʼ rogom.

16 Musap, baʼaray fare moʼon, kug piiʼed ngom nga lan paʼam; gur e ngam muguy ko mang e ngam rinʼ ngakʼ ni gabaʼadag.

17 Me yibi buch ni pilung i Noah e guy rogon ni Abinadi e nga ninʼ nga kalbus; me yoeg ni fapi priest e ngar kunuyed yaed nga taʼabang ni nge yog nra moʼolung gaed ngar puruyʼ niged ko mang e nge rinʼ ngakʼ.

18 Me yibi buch nra gaʼar gaed ngakʼ fare pilung: Mu fek ngaray ni nge yog ni ngad duwriyed; me yoeg fare pilung ni ngan fek iyib nga pʼoewchraed.

19 Ma arame ra tabab gaed i duwriy, ni gomanga yog ni chel nge non niʼir e ba togopluw ngakʼ, ni ireram e gin ni gomanga rayog riy ni nga roeged ni bay banʼen nib kireb riy; machane i fulweg ngoraed ni rib tamilang, me thang e thin roraed ko gubin e pi duwer roraed, arragon, ma ri balyangaenʼraed; ya ri thang e thin roraed ko gubin e pi duwer roraed, ma ri athukuy laniyaenʼraed u gubin e pi thin roraed.

20 Me yibi buch ni bay bagyaed ni gaʼar ngakʼ: Mang e be yipʼ fan fapi thin ni kan yoloey, ma ire kiiʼ i fil e pi chitamangmaed ngomaed ni yaed be gaʼar:

21 Rib felʼ usun u dakean e pi burey, rifrifanʼay e chaʼ nibe yib nag e pi thin nib mangilʼ; niʼir e ma aw nag e gapas; niʼir e ma fek iyib e thin nib felʼ ni morngaʼagen ni tin nib felʼ; niʼir e weliy morngaʼagen woʼen e thap; ni gaʼar ngakʼ Zion, Got romed e ir suwon e lung;

22 Matanag rom e yaedra non nib gaaʼ lamraed u fithikʼ e falfalaenʼ; ma bay ra tang gaed ni taʼab lamraed u taʼabang; ya yaedra guy nga oewchraed u napʼan ni fare Somoel e bay yib nag bayay e Zion;

23 Mar tolul gaed u fithikʼ e falfalaenʼ; ni yaed be tang u taʼabang ni yaed be gaʼar, gimed e pi yungi nʼen ni kan gatheay nu Jerusalem; ya fare Somoel e ke falʼeg laniyaenʼ e gidiiʼ rokʼ, make bayuliy yu Jerusalem;

24 Fare Somoel e ke dag falʼngin i paʼ nib thothup u mit gubin e pi nam, ma gubin e gidiiʼ ko tin tomur e rran u fayleng, e yaedra guy fare thap rokʼ e Got rodaed?

25 Ere chiney e gaʼar Abinadi ngoraed: Gimed e pi priest, ni gimed be dake fil banʼen ngakʼ e pi gidiiʼ ney, ma gimed be dake gimed manang fan fare nangaenʼ ko prophesy, ere ka gimed baʼadag ni nggog ngomed fan ko mang e pinnʼey?

26 Gube yoeg ngomed, ni nge buch waʼathmed ya kam thilyeged fapi yalen rokʼ Somoel! Ya faʼanra gimed be nang fan e pinnʼey meʼere dawor mu filed iyaen; ere, kam thilyeged fapi yalen Somoel.

27 Dawor mu tayed gumʼirchaʼmed ngay ngam nanged fan; ere, da ʼum gonop gaed. Ere, mang e kam filed ko pi gidiiʼ ney?

28 Mar gaʼar gaed: Gamaed be fil iyaen fare motochiyel rokʼ Moses.

29 Nge ku bayay i gaʼar ngoraed: Faʼanra gimed be fil iyaen fare motochiyel rokʼ Moses meʼere mangfan ni damur fol gaed riy? Mangfan ni kam dugiliyed e gumʼirchaʼ romed nga dakean e falaʼab nu fayleng? Mangfan ni gimed be rinʼ e tin ba galong ma gimed tay gelingmed ko paʼan gathar, arragon, kam kʼaringed e pi gidiiʼ ney kar denen gaed, ni aram fan ni fare Somoel e ke lʼugeg ni nggu prophesy nib togopluw ko pi gidiiʼ ney, arragon, ni rib ngongol nib kireb nib togopluw ngakʼ e pi gidiiʼ ney?

30 Damur nanged nug be weliy e tin riyulʼ? Arragon, gimed manang ni gube weliy e tin riyulʼ; ere thingar mu tʼon gaed u pʼoewchen Got.

31 Ma bay yibi buch ni bayi liiʼmed nga fithikʼ e kireb romed, ya kamoeged ni gimed be fil iyaen fare motochiyel rokʼ Moses. Ma, mang e gimed manang u morngaʼagen fare motochiyel rokʼ Moses? Rayog ni ngan thap u dakean fare motochiyel rokʼ Moses? Ere mang e nga moeged?

32 Mar fulweged nga roeged ni woʼen e thap e yib u dakean fare motochiyel rokʼ Moses.

33 Machane chiney e gaʼar Abinadi ngoraed: Gu manang ni faʼan gimed rafol ko fapi motochiyel rokʼ Got ma gimed ra thap; arragon, ni faʼanra gimed rafol ko fapi motochiyel ni fare Somoel e piiʼ ngakʼ Moses u dakean fare burey nu Sinai, ni gaʼar:

34 Gag fare Somoel ni Got romed, niʼir e fekmed nga wuruʼ fare binaw nu Egypt, nga wuruʼ fare naʼun ni tafen e kalbus.

35 Gur e dakuriy reb e Got ni ngam tay ni nge mʼon rog.

36 Dab mu ngongoliy ba liyos, ara yaʼan banʼen ni bay u tharmiy, ara pinʼen ni bay u fayleng ngu tane butʼ.

37 Ere chiney e Abinadi e gaʼar ngoraed, Kam rinʼed gubin e pinnʼey? Gube gaʼar ngomed, Dawor, dawor mu rinʼed. Ma kam filed ko pi gidiiʼ ney ni ngar rinʼed e pinnʼey? Gube gaʼar ngomed, Dawor, dawor mu rinʼed.