1 Ere chiney e yibi buch ni Zeniff e piiʼ fare lung ngakʼ Noah, ni reb fapi pagael ni fak; ere Noah e ire yinʼ luwan; ma deyaen u woʼen e chitamangin.

2 Ya musap gaed, defol ko pi motochiyel rokʼ Got, iyaen nibe leak e ʼarʼar u gumʼirchaʼen. Mab yoʼor pi leʼengin nge pi tugruw rokʼ. Me guy rogon ni gidiiʼ rokʼ e ngar denen gaed, mar rinʼed e pinʼen ni riʼir e thʼabi kireb u mit Somoel. Arragon, mar rinʼed e ngongol ni galong nge gubin mite denen.

3 Me dugliy e tax ni ngar piiʼed ni taʼab guruy u lal guruy ko gubin e pinʼen ni bay roraed, nge buguruy u lal guruy ko gol roraed nge silber roraed, nge buguruy u lal guruy ko wasey ni ziff roraed, nge wasey ni copper roraed, nge wasey ni brass roraed nge wasey roraed; nge buguruy u lal guruy ko pi gamanman roraed nib bitir mab sugsug; nge ku buguruy u lal guruy ko gubin e awoch roraed.

4 Ma gubin e pinnʼey ni fek e nge felʼ rogon riy, nge pi leʼengin nge pi tugruw rokʼ; nge kupi priest, nge pi leʼengiraed nge pi tugruw roraed; aray rogon ni thilyeg e yalen ko fare lung.

5 Ya ke chuweg fapi priest ni bangbeng nagraed e chitamangin, me fek boech nib biʼech nge bangbeng nagraed nga luwraed, ni piʼin ni kar nʼufed yaed ngalang ko ufʼuf u gumʼirchaʼraed.

6 Arragon, ma aray rogon ni kan yuʼ nag e gabin ngoraed nga fithikʼ e malmal roraed, nge liyoer roraed ko liyos, nge pi ngongol roraed nib galong, u dakean e tax ni ke dugliy fare pilung i Noah nga dakean e gidiiʼ rokʼ, ere aray rogon ni muruwel fapi gidiiʼ nib gel ni ngar ayuweged e gidiiʼ ni kireb.

7 Arragon, ma kur manged gidiiʼ nib ta meybil ko liyos, ni bachan e ke ban nagraed fare pilung nge fapi priest ko sabaenbaen nge falʼfalʼ thin roraed; ya yaed e ra nonaed ngoraed u fithikʼ e falʼfalʼ thin.

8 Me yibi buch ni pilung i Noah e toey e naʼun ni rib felʼ mab gagangʼ; me falʼeg yaʼan ko rean ni kan ngongoliy ni thʼabi felʼ, nge gubin mite banʼen nib felʼ yaʼan, nge gol, nge silber, nge wasey, nge wasey ni brass, nge wasey ni ziff, nge wasey ni copper;

9 Me ki toey ni fan ngakʼ ba tafen e pilung nib gaaʼ, nge ba chiya ni tagilʼilungun nga lulukungun e re naʼun nem; mar gubin ma kan falʼeg ko gol nge silber nge tin falelʼ banʼen.

10 Ma ki guy rogon ni gidiiʼ nibe muruwel rokʼ e ngar ngongoliy gubin yalen e muruwel nib felʼ u baʼan langgin fare temple, ni ngan falʼeg ko rean nib felʼ, nge copper, nge brass.

11 Nge pi chiya ni kan kiiʼeg ni fan ko fapi priest, ma kan tay nib tolang ko gubin e chiya, e ki achey ko gol; me yoeg ni ngan ngongoliy ba yoror nga mʼon ko pi chiya nem, ni nge yog ni ngar toffan gaed ngay ma yaed be tay paʼraed nga dakean u napʼan ni yaed be morngaʼag ni yigoʼ baen ma dariy fan ngakʼ e gidiiʼ rokʼ.

12 Me yibi buch ni toey ba gilʼedamit nga taʼaben fare temple; arragon, ba gilʼedamit ni rib tolang, ni rib tolang u napʼan ni yira sakʼiy nga pʼebugul me yaen e changar u gaʼangin yang farengi binaw nu Shilom, nge ku fare binaw nu Shemlon, niʼir e ke suwey fapi Lamanites; ma kura guy dakean gubin yang e binaw nib liyegraed.

13 Me yibi buch ni guy rogon ni ngan toey e naʼun nib yoʼor nga lan fare binaw nu Shilom; me yoeg ni ngan toey ba gilʼedamit nib gaaʼ nga dakean bangi falang ni bay nga leluʼoch ko fare binaw nu Shilom, niʼir e ke mang tagilʼ e gapas rokʼ fapi gidiiʼ rokʼ Nephi ko fare ngiyalʼ i nʼen nra chuw gaed u lan fare binaw; ere ireray e nʼen ni rinʼ ko fapi falaʼab ni fek ko tax ni yib u paʼ e gidiiʼ rokʼ.

14 Me yibi buch ni ke tay gumʼirchaʼen ko pi falaʼab rokʼ, me yunʼuy e paer rokʼ ko paer u fithikʼ e wagagaey ni yaed e pi leʼengin nge pi tugruw rokʼ; nge ku arragon ngakʼ fapi priest ni kur yunʼuyed e paer roraed ko paʼan gathar.

15 Me yibi buch ni yung e grape u gaʼangin yang farengi binaw; me ngongliy fen e mongongol waeyin, me falʼeg e waeyin nib yoʼor; ma arame e mang beeʼ nib taʼunum e waeyin, nge ku arragon nge gidiiʼ rokʼ.

16 Me yibi buch ni fapi Lamanites e ra tabab gaed i liiʼ e gidiiʼ rokʼ, ko pi ulung nib lich gidiiʼen, min liiʼraed u dakean e pi yungi falang roraed, u napʼan ni yaed be matangiy e gamanman roraed.

17 Nge fare pilung i Noah e lʼoeg e pi matanag rokʼ ngar liyeged farengi binaw ni nga dab kiyog nra baed ngay; machane de lʼoeg e matanag nib gaman, ere fapi Lamanites e rabaed ngoraed ngar liiʼed yaed ngar mʼaed, mar tulufed e gamanman roraed nib yoʼor nga wuruʼ farengi binaw; ere aray rogon ni fapi Lamanites e tabab i liiʼraed, mar daged e fananikan roraed ngoraed.

18 Me yibi buch ni pilung i Noah e lʼoeg e salthaw rokʼ ngoraed, min tuluf raed ngar suloed, ara ra tulufed yaed ngar suloed u boechi ngiyalʼ; ere, ra chel gaed ngar suloed ni kar falfalaenʼ gaed ko nʼen ni ke yog ngoraed.

19 Ere chiney, e rib chane kar gel gaed ko mael mar nʼufed yaed ngalang ko ufʼuf u lan gumʼirchaʼraed; kar ufanthin gaed nga gelingraed, ni yaed beyoeg ni wugem i yaed e rayog ni ngar liiʼed bukun e biyuʼ ko fapi Lamanites; ma aray rogon ni kar ʼuf gaed, ma kar falaenʼ gaed i fek e pogofan, nge puʼoeg rachaʼen pi walagraed, mar rinʼed e biney ni bachan e ngongol ni kireb rokʼ e pilung roraed nge fapi priests roraed.

20 Me yibi buch ni immoy beeʼ nib moʼon u fithikʼraed ni fithingan e Abinadi; me yaen u fithikʼraed iyaen, me tabab ko prophesy ni be gaʼar: Musap gaed, baʼaray rogon ni yoeg fare Somoel, ma baʼaray rogon ni motochiyel ngog, nibe gaʼar, Ngam man iyaen, nga moeg ngakʼ e pi gidiiʼ ney, ni aray rogon ni ke yoeg fare Somoel—Nge buch waʼathan e pi gidiiʼ ney, ya kug guy e pi ngongol roraed nib kireb, nge pi denen roraed, nge pi ngongol roraed nib galong; ma faʼanra dabra kalgaed ngaenʼraed ma bay gub ngoraed u fithikʼ e damomuw rog.

21 Ma faʼanra dabra kalgaed ngaenʼraed mar sap gaed ngakʼ fare Somoel ni Got roraed, ma musap gaed, gura piiʼraed nga lan paʼ e pi toʼogor roraed; arragon, yira fekraed nga kalbus; ma yaedra gafgow nga paʼ e pi toʼogor roraed.

22 Ma bay yibi buch ni bay ra nanged ni gag fare Somoel ni Got roraed, ma gub Got ni guma talyeg nag e gidiiʼ rog, ma guma gechig nag e gidiiʼ rog ko kireb roraed.

23 Ma bay yibi buch ni faʼanra dabi kalngaenʼ e pi gidiiʼ ney mar sap gaed ngakʼ fare Somoel ni Got roraed, ma bay ni fekraed nga kalbus; ma dariy beeʼ ni rayog ni nge chuwegraed, ma kemus ni fare Somoel ni Got ni Gubin ma ra yog rokʼ.

24 Arragon, ma bay yibi buch u napʼan ni bay ra yoer gaed ngog ma gura sasagaʼal i rungʼag e mayoer roraed; arragon, ma bay gupagraed nge gafgow nagraed e pi toʼogor roraed.

25 Ma faʼanra dabra kalngaenʼgaed mar chuw gaed nga mad ni tutuw man bangbangeg e awat nga dakean loelugraed, mar meybil gaed nib almarin ngakʼ fare Somoel ni Got roraed, ma arame dabgu piiʼ e fulweg ko meybil roraed, ara guchuwegraed u fithikʼ e pi gafgow roraed; ma aray rogon ni yoeg fare Somoel, ma aray rogon ni motochiyel nag ngog.

26 Ere chiney e yibi buch u napʼan ni Abinadi e ke yoeg e pi thin ney ngoraed mar damomuw gaed ngakʼ, mar gayed rogon ni ngar feked e yafos rokʼ; machane fare Somoel e chuweg u paʼraed.

27 Ere chiney e napʼan ni fare pilung i Noah e ke rungʼag fapi thin ni ke weliy Abinadi ngakʼ e gidiiʼ rokʼ, maki damomuw; me gaʼar: Miniiʼ Abinadi, ni gag nge gidiiʼ rog e nge pufthin nagmaed, ara miniiʼ e re Somoel, ni ra yib nag e gafgow ni rib gel nga dakean e gidiiʼ rog?

28 Gube yoeg ngomed ni ngam maroed mu feked Abinadi e ngaray, ni nge yog ni nggu liiʼ nge yimʼ, ya ke yoeg e pinnʼey ni nge yog ni kʼaring e gidiiʼ rog ngar damomuw gaed ngoraed, ma nge yog ni sum e maleʼeg thin nga fithikʼ e gidiiʼ rog; ere nggu liiʼ nge yimʼ.

29 Chiney e rib maʼew oewchen fapi gidiiʼ; ere ra ʼelʼel niged gumʼirchaʼraed ko fapi thin rokʼ Abinadi, ma arame ra gayed rogon e ngiyalʼ innʼem iyaen ni ngar koeled. Ma pilung i Noah e ʼelʼel nag gumʼirchaʼen nge togopluw ko thin rokʼ fare Somoel, ma de kalngaenʼ ko pi ngongol rokʼ ni kireb.