1 Te bong aei e botaki aia kauntira ni kabuta ake uangaun ma aman ibonga aika rietata n ana auti Iotebwa Timiti te Ataei, man te kaotioti, ao ni waaki ni bairea te kauntira ae rietata n ana ekaretia Kristo, are e na kaainaki irouia tengaun ma uoman ibonga aika rietata, ao temanna ke teniman te beretitenti n aron are kainnanoaki n te bwai are riki.

2 Te kauntira ae rietata e rineaki man te kaotioti ibukin te kaantaninga are na katoki kangaanga aika kakawaki ake a na kona n riki n te ekaretia, are a aki kona ni katokaki iroun te ekaretia ke ana kauntira te bitiobi nakon raun nanoia aomata ake a irekereke iai.

3 Iotebwa Timiti te Ataei, Sidney Rigdon ao Frederick G. Williams boni ngaiia beretitenti ake a tia ni kariaiakaki man bwanaan te kauntira; ao Joseph Smith te Ikawai, John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, ao Luke Johnson, ibonga aika rietata, a rineaki bwa kaain te kauntira aika teimatoa ibukin te ekaretia, man bwanaan te kauntira ae nano teuana.

4 Kaain te kauntira ake atongaki araia i eta a manga titirakinaki ngkana a butimwaea rineakiia, ao ngkana a na mwakuri n te nakoa anne ni kaineti nakon tuan karawa, are ngaia ni kabane a kaeka bwa a butimwaea rineakiia, ao ni karaoa nakoaia ni kaineti nakon ana akoi te Atua are e kaaki i aoia.

5 Te mwaiti are e karika te kauntira, are a rinerine n aran ao ibukin te ekaretia n rineakiia kaain te kauntira ake a atongaki araia i eta aika angaun ma teniman, n aron aei: ruaman ibonga aika rietata, tengaun ma itiman unimwaane, aman ibonga, ao tengaun ma teniman kaain te ekaretia.

6 A rinerine: bwa te kauntira ae rietata e aki kona n iai mwaakana ni mwakuri ngkana akea itiman kaain te kauntira ake atongaki araia i eta, ke naake a rineaki raoi bwa taan onomwii.

7 Itiman aikai a na iai mwaakaia n rineia tabeman ibonga aika rietata, are a taku bwa a tau ao ni konabwai ni mwakuri n onea mwiin kaain te kauntira are aki roko.

8 A rinerine: bwa ngkana e riki te mwaawa man te mate, te kamwaing man te nakoa ibukin riaoan te tua, ke te kamwaing man ana tautaeka te ekaretia n te aono aei, nakon temanna kaain te kauntira are atongaki araia i eta, e na kanoaki man ana rinerine te beretitenti ke taian beretitenti, ao ni kariaiakaki man bwanaan aia kauntira ni kabuta ibonga aika rietata, are teweaki ibukin anne, bwa e na mwakuri n aran te ekaretia.

9 Te beretitenti n te ekaretia, are ngaia naba te beretitenti n te kauntira, e rineaki man te kaotioti, ao ni kamatoaaki n ana mwakuri man bwanaan te ekaretia.

10 Ao e boni kaineti ma kakawakin nakoana bwa e na tararua ana kauntira te ekaretia; ao bon tibwangana bwa e na buokaki irouia uoman riki beretitenti, ake a rineaki n aron naba are e rineaki iai.

11 Ao n te tai are e aki kaoti temanna ke uoman mai i buakoia ake a rineaki bwa a na buokia, iai mwaakana n tararua te kauntira n akea ana tia ibuobuoki; ao n te tai are e aki ngaia roko, beretitenti ake tabeman iai mwaakaia n tararua ibukina, ngaia uoman ke temanna mai i buakoia.

12 N taai nako are te kauntira ae rietata n ana ekaretia Kristo e baireaki, n aron te banna are e a tia n taekinaki, e na riki bwa tabeia kauntira ake tengaun ma uoman bwa a na rinei taian ware, ao man anne a ataia bwa antai irouia tengaun ma uoman ae e na taetae moa, ni moa man te ware ae teuana ao ni karokoa te ware ae tebwi ma uoua.

13 N taai nako are te kauntira aei e teweaki bwa e na waaki i aon te bwai are e riki, kaain te kauntira ake tengaun ma uoman a na taraia bwa e kangaanga ke e aki; ngkana e aki, tii uoman kauntira aika a na taetae i aona, ni kaineti nakon te banna are e koreaki i eta.

14 Ma ngkana e iangoaki bwa e kaangaanga, aman aika a na rineaki; ao ngkana e a kaangaanga riki, onoman; ma akea te tai are a na rineaki ae riaon onoman bwa a na taetae.

15 Te aomata are e bukinaki, ni bwaai ni kabane are a riki, iai inaomatana bwa iteran te kauntira, a na totokoa te kamatauninga ke te motibuaka.

16 Ao kaain te kauntira a rineaki bwa a na taetae i matan te kauntira a riai ni kaota te bwai are e riki, i mwiin rinanoakin te kakoaua, ni koauan arona i matan te kauntira; ao ni kabane aomata a riai n taetae ni kaineti ma te riai ao te motiraoi.

17 Kauntira ake a anai waare aika toaraoi, n aron, 2, 4, 6, 8, 10, ao 12, ngaia ake a na tei ibukin te tia bukinaki, ao n totokoa te kamatauninga ao te aki motiraoi.

18 Ni bwaai ni kabane aika riki te tia bukibuki ao te tia bukinaki a na iai inaomataia n taetae i bon ibukiia imatan te kauntira, i mwin ongoraeakinan taian kakoaua ao kauntira ake a tia n rineaki bwa a na taetae i aon te bwai are e uotaki rake a tia n anga aia taeka.

19 I mwin ongoraeakinan taian kakoaua, ao i mwin tiaia n taetae kaain te kauntira, te tia bukibuki ao te tia bukinaki, te beretitenti e na anga ana baire ni kaineti nakon ootana are iai ibukin te bwai are e riki, ao ni weteia kauntira ake tengaun ma uoman ni boutokaa te baire anne man aia rinerine.

20 Ma ngkana nikiraia kauntira, ake a aki taetae, ke temanna mai i buakoia, i mwin ongoraeakinan bwaai ni kakoaua ao bubuti n akea te inanonano, a kunea te kairua n ana baire te beretitenti, a kona ni kaotia, ao te bwai are e riki e na manga ongoraeakinaki.

21 Ao ngkana, i mwin manga ongoraeakinana raoi, iai riki koaua ae a oti ibukin te bwai are e riki, te baire e na bitaki ni kaineti ma anne.

22 Ma ngkana akea riki te koaua ae kaotaki, te moan baire e na tei, ao kaain te kauntira ae riaon iteran mwaitiia iai mwaakaia ni karaoa aia baire i aon naba anne.

23 Ngkana iai te kangaanga ni kaineti nakon te reirei ke te tua, ngkana e aki tau are koreaki ni kaotaa raoi te bwai are e riki n ana iango te kauntira, te beretitenti e kona ni bubutia ao ni karekea ana iango te Uea man te kaotioti.

24 Ibonga aika a rietata, ngkana a nakon te aba teuana, iai mwaakaia ni wetea ao ni bairea te kauntira n aron te banna are e a tia ni baireaki, ni katoki taian kangaanga, ngkana naake a irekereke ke temanna mai i buakoia a na tangiria.

25 Ao aia kauntira ibonga aika rietata anne a na iai mwaakaia n rinea temanna mai i buakoia n tararua te kauntira n te tai moa anne.

26 E na tabenna te kauntira anne ni uota, n te tai ae tawe, katootongan aia waaki, ma rongorongon te kakoaua ae bwanin are raonaki ma aia baire, nakon te kauntira ae rietata n ana tabo te Moan Beretitentii n te Ekaretia.

27 Ngkana naake a irekereke ke temanna mai i buakoia e aki kukurei ma ana baire te kauntira anne, a kona n tangitang nakon te kauntira ae rietata nakon te Moan Beretitentii n te Ekaretia, ao ni manga ongoraeakinaki riki, are e na wakinaki, ni kaineti nakon te banna are e a kaman koreaki, bwa aongkoa akea te baire ae e a tia ni karaoaki.

28 Aia kauntira ibonga ae rietata aei n te aba teuana e tii teweaki ibukin bwaai ake a riki ake a rangi ni kangaanga n te ekaretia; ao akea te bwai ae riki ae kabuta ke ae bon tataneiai te aba iai ae na tau ibukin tewean te kauntira aei.

29 Ibonga ake a mwamwananga ke a maeka n te aba teuana iai mwaakaia n taekinna bwa e riai n teweaki te kauntira anne ke e aki.

30 Iai te kaokoro imarenan te kauntira ae rietata ke ibonga aika rietata ake a mwamwananga nakon aaba tabeua, ao te kauntira ae rietata ae a mwamwananga are e kaainaki irouia abotoro ake tengaun ma uoman, n aia baire.

31 Man aia baire naake te moan e kona ni iai te manga tang; ma man aia baire naake te kauakoraki akea te manga tang.

32 Te kauakoraki e ti kona ni weteaki n titirakinaki irouia mataniwi ni kabuta n te ekaretia ngkana e irekereke ma riaoan te tua.

33 E motikaki: bwa te beretitenti ke taian beretitenti n ana tabo te Moan Beretitentii n te Ekaretia a na iai mwaakaia ni motikia bwa bwaai ake a riki, are a kona ni manga tang, e bon tau nakon te manga ongoraeakinaki, i mwin rinanoakinan te manga tang ao taian kakoaua ao rongorongo ake a raonna.

34 Kauntira ake tengaun ma uoman ngkanne a waaki n tau timoi, n nooria raoi bwa antai ae a na taetae moa, ao aio te reke, aei araia: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith te Ikawai; 11, John Smith; 12, Martin Harris.I mwin te tataro e bwara te maungatabu.