Tasal 106
K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Kirtland, Ohio, 25 Noviembre 1834. Li k’utb’esinb’il na’leb’ a’in b’eresinb’il re laj Warren A. Cowdery, jun ras laj Oliver Cowdery.
1–3, Laj Warren A. Cowdery nab’oqe’ jo’ jun jek’inb’il aj k’anjel; 4–5, Eb’ li ralal xk’ajol li saqen ink’a’ te’tawe’q xb’aan li xkab’ xk’ulunik li Qaawa’ chanchan jun aj elq’; 6–8, Li nimla osob’tesink nachal xb’aan k’anjelak chi tiik sa’ li Iglees.
1 A’an rajom inch’ool naq lin moos aj Warren A. Cowdery taaxaqab’amanq ut taak’ojob’amanq choq’ jun jolominel taqenaqil aj tij sa’ xb’een lin iglees, sa’ li ch’och’ Freedom ut eb’ li na’ajej sa’ xsutam;
2 Ut naq tixjultika lin evangelio li junelik nakana, ut tixtaqsi xyaab’ xkux ut tixtijeb’ li tenamit, moko ka’aj ta wi’ sa’ tz’aqal lix na’aj a’an, sa’eb’ ajwi’ b’an li condado li wankeb’ chixk’atq;
3 Ut chixq’axtesi chixjunil lix kutan choq’ re li taqenaqil ut santil b’oqok a’in, li nink’e re anajwan, ut chixsik’ rik’in yalok q’e li awa’b’ejihom re choxa ut lix tiikilal, ut chixjunil li k’a’aq re ru na’ajman taak’ehe’q choq’ xtz’aqob’; xb’aan naq laj k’anjel xk’ulub’ lix tojb’al.
4 Ut jo’kan wi’chik, chi yaal ninye eere, lix k’ulunik li Qaawa’ taanach’oq chaq, ut taatawe’q li ruchich’och’ xb’aan, chanchan jun aj elq’ chi q’eq—
5 Jo’kan ut, b’ak’omaq lee yiitoq, re naq laa’exaq li ralal xk’ajol li saqen, ut re naq moko textawe’q ta xb’aan li kutan a’an chanchan jun aj elq’.
6 Ut jo’kan wi’chik, chi yaal ninye eere, kiwan sahil ch’oolejil sa’ choxa naq lin moos aj Warren kixkub’si rib’ chiru lin xuq’, ut kixjach rib’ rik’in lix b’alaq’il k’anjeleb’ li winq;
7 Jo’kan ut, osob’tesinb’il lin moos aj Warren, xb’aan naq laa’in tinwuxtaana ru; ut us ta wan xmajelal xch’ool, laa’in tinwaklesi a’ yaal jo’ tixtuulanob’resi rib’ chiwu.
8 Ut tink’e re a’an li usilal ut xk’ojob’ankil lix ch’ool li taaruuq taawanq wi’ chi xaqxo; ut wi toj tiik chi paab’ank jo’ aj yehol nawom ut jo’ saqen chiru li iglees laa’in xinkawresi jun koroon choq’ re sa’eb’ li rochoch lin Yuwa’. Chi jo’kan. Amen.