Vaega 108
Faaaliga na tuuina mai e ala mai ia Iosefa Samita le Perofeta, i Katelani, Ohaio, i le aso 26 o Tesema, 1835. O le vaega lenei na maua i le talosaga a Lyman Sherman, o lē na faauuina muamua o se fitugafulu ma o lē na sau i le Perofeta ma se talosaga mo se faaaliga e faailoa mai ai lona tiute.
1–3, Ua faamagaloina Lyman Sherman i ana agasala; 4–5, O le a faitauina o ia faatasi ma toeaina taitai o le Ekalesia; 6–8, Ua valaaulia o ia e talai atu le talalelei ma faamalosi atu i ona uso.
1 E moni ua faapea ona fetalai mai o le Alii ia te oe, la’u auauna Lyman: Ua faamagaloina oe i au agasala, ona ua e usiusitai i lou sau i luga nei i le taeao nei e maua atu fautuaga mai ia te ia o lē ua Ou tofia.
2 O lea, ia tuu atu i lou agaga ia mapu e faatatau i lou tulaga faaleagaga, ma aua le toe tetee i lo’u leo.
3 Ma ia tulai i luga ma faaeteete atili atu mai lenei taimi ma le agai i luma i le tausiga o au tautoga, ia ua uma ona e faia ma faia, ma o le a faamanuiaina oe i faamanuiaga e matua silisili lava.
4 Faatalitali ma le onosai seia talo le faapotopotoga paia o a’u auauna, ona manatua lea o oe faatasi ma a’u toeaina muamua, ma maua le aiā e ala i le faauuga faatasi ma le vaega e totoe o a’u toeaina o e ua Ou filifilia.
5 Faauta, o le folafolaga lenei a le Tamā ia te oe pe afai e te faamaoni pea.
6 Ma o le a faataunuuina i ou luga i le aso lena o le a e maua ai le aiā e talai atu ai la’u talalelei i soo se mea o le a Ou auina atu i ai oe, mai le taimi nei mai lena taimi.
7 O lea, ia faamalosi atu i ou uso i au talanoaga uma, i au tatalo uma, i au apoapoaiga uma, ma i au mea uma e fai.
8 Ma faauta, ma tagai, ua Ou faatasi ma oe e faamanuia oe ma laveai oe e faavavau. Amene.