Benneg 108
Paltiing a naited babaen ni Joseph Smith a Propeta, iti Kirtland, Ohio, idi 26 ti Disiembre 1835 (History of the Church, 2:345). Naawat daytoy a benneg iti dawat ni Lyman Sherman, a kaor-orden laeng iti kallabes a nangato a saserdote ken pitopulo ken immasideg iti Propeta a nangdawat iti paltiing a mangipakaammo iti pagrebbenganna.
1–3, Napakawan ni Lyman Sherman kadagiti basolna; 4–5, Maibilang kadagiti kangrunaan nga elder ti Simbaan; 6–8, Matudingan a mangikasaba iti ebanghelio ken mangpatibker kadagiti kabsatna.
1 Pudno kastoy ti kuna ti Apo kenka, katulongak a Lyman: Napakawankan kadagiti basolmo, gapu ta tinungpalmo ti timekko iti yaaymo ditoy iti daytoy nga agsapa nga umawat iti balakad ti tinudingak.
2 Ngarud, paginanaem ti kaunggam maipanggep iti naespirituan a sasaadem, ket saanmon a supringen pay ti timekko.
3 Ket bumangonka ket yad-addam ti agannad manipud ita iti panangtungpalmo kadagiti karim, nga inaramidmo ken ar-aramidem, ket mabendisionankanto iti aglaplapusanan a bendision.
4 Aganuska nga aguray agingga nga angayen dagiti katulongak ti sagrado a panagtitipon, sakanto malaglagip kadagiti umuna nga elderko, ket maawatkanto nga awan duadua babaen ti pannakaorden dagiti dadduma pay nga elderko a pinilik.
5 Adtoy, daytoy ti kari ti Ama kenka no ituloymo ti kinapudnom.
6 Ket matungpalto kenka iti dayta nga aldaw tapno adda kalintegam a mangikasaba iti ebangheliok iti sadino man a pangibaonak kenka, manipud ditoy iti ania man nga oras.
7 Ngarud, patibkerem dagiti kabsatmo iti pannakisarsaritam, iti amin a kararagmo, iti amin a panangigunamgunammo, ken iti amin nga aramidmo.
8 Ket adtoy, ken imutektekam, addaak a mangbendision ken mangisalakan kenka iti agnanayon. Amen.