Benneg 111
Paltiing a naited babaen ni Joseph Smith a Propeta, iti Salem, Massachusetts, idi 6 ti Agosto 1836 (History of the Church, 2:465–466). Nailumlom dagiti dadaulo ti Simbaan iti utang iti daytoy a panawen gapu iti panagtrabahoda iti panagserbi. Iti pannakangngegda nga adda dakkel a kantidad ti kuarta a sisasagana kadakuada iti Salem, nagdaliasat a napan ti Propeta, da Sidney Rigdon, Hyrum Smith, ken Oliver Cowdery manipud iti Kirtland, Ohio, a mangpennek iti damag, nga isamirada metten nga ikasaba ti ebanghelio. Sumagmamano a banag a pakaseknan ti inasikasoda ken nangasabada pay. Idi nalawagen nga awan ti manamnama a kuarta, nagsublida iti Kirtland. Sumagmamano a nabatad a gapu ti pasamak ti maanninawan kadagiti balikas a naaramat iti daytoy a paltiing.
1–5, Kitaen ti Apo ti naindagaan a kasapulan dagiti katulonganna; 6–11, Makiinnusayto a siaasi iti Zion ket urnosenna amin dagiti banag a para iti pagimbagan dagiti katulonganna.
1 Siak, ti Apo a Diosyo, saanak a makagura iti panagdaliasatyo, iti laksid ti kinamaagyo.
2 Adda dakkel a kinabaknangko iti daytoy a siudad a para kadakayo, para iti pagimbagan ti Zion, ken adu a tao iti daytoy a siudad, nga ummongekto iti naituding a kanito para iti pagimbagan ti Zion, babaen kadakayo.
3 Ngarud, nasken unay a makipulapolkayo kadagiti tao iti daytoy a siudad, a kas iti pannakaiturongyo, ken kas maitedto kadakayo.
4 Ket mapasamakto iti umno a panawen nga itedko daytoy a siudad kadakayo, tapno maaddaankayo iti bileg iti daytoy, no la ketdi dida matakuatan ti nalimed a pasetyo; ket kukuayonto ti kinabaknang a maipapan iti balitok ken pirak.
5 Diyo pakaseknan dagiti utangyo, ta ikkankayonto iti bileg a mangbayad kadakuada.
6 Diyo pakaseknan ti Zion, ta siakto ti makiinnusay a siaasi kenkuana.
7 Agtalinaedkayo iti daytoy a lugar, ken iti luglugar iti aglawlawna;
8 Ket iti lugar a pagayatak a nasken a pagtalinaedanyo, iti kangrunaan, maipalnaadto kadakayo babaen ti kappia ken bileg ti Espirituk, nga agayusto kadakayo.
9 Mabalin a magun-odyo daytoy a lugar babaen ti panangupayo. Ket agsaludsodkayo a sireregta maipanggep kadagiti nagkauna nga agindeg ken nangbangon iti daytoy a siudad;
10 Ta ad-adu ti kinabaknang ngem iti maysa a para kadakayo iti daytoy a siudad.
11 Ngarud, agbalinkayo koma a masirib a kas iti uleg ngem awanan ketdi iti basol; ket ibilinkonto amin a banag a para iti pagimbaganyo, a kas iti kapardas ti kabaelanyo a mangawat kadakuada. Amen.