Vaega 111
Faaaliga na tuuina mai e ala mai ia Iosefa Samita le Perofeta, i Salema, Massachusetts, i le aso 6 o Aokuso, 1836. O le taimi lenei sa tele ai aitalafu a taitai o le Ekalesia ona o a latou galuega i le auaunaga. Ina ua faalogo e i ai se tupe tele o le a avanoa ia i latou i Salema, o lea na malaga atu ai le Perofeta, Sini Rikitone, Ailama Samita, ma Oliva Kaotui iina mai Katelani, Ohaio, e suesue i lea tala, faatasi ma le talai atu o le talalelei. E tele ni mea o pisinisi a le Ekalesia na faia ai e le usoga ma sa faia foi ni talaiga. Ina ua aliali mai e leai se tupe o maua, sa latou toe foi atu i Katelani. E tele ni mea moni iloga i aafiaga o loo atagia mai i le faaupuga o lenei faaaliga.
1–5, E silasila le Alii i mea faaletino e manaomia e Ana auauna; 6–11, O le a feagai o ia ma Siona i le alofa mutimutivale ma fuafua mea uma mo le lelei o Ana auauna.
1 O A’U, o le Alii lo outou Atua, ou te lē o lē fiafia i lo outou o mai i lenei malaga, e ui i o outou uiga le manuia.
2 Ua ia te A’u ’oa e tele i lenei aai mo outou, mo le manuia o Siona, ma le toatele o tagata o i lenei aai, o e o le a Ou faapotopoto mai i le taimi e tatau ai mo le manuia o Siona, e ala ia te outou.
3 O lea, e tatau ona outou faia se faamasaniga ma tagata i lenei aai, e pei ona o le a taitaiina ai outou, ma e pei ona o le a tuuina atu ia te outou.
4 Ma o le a oo mai, o le a Ou tuu atu i o outou lima lenei aai i le taimi e tatau ai, o le a outou maua ai le mana i ona luga, e oo ina latou lē iloa ai o outou vaega lilo; ma o ona ’oa e faatatau i auro ma ario o le a ā outou.
5 Aua tou te popole e uiga ia outou aitalafu, aua o le a Ou tuu atu ia te outou le mana e totogi ai.
6 Aua tou te popole e uiga ia Siona, aua o le a Ou faia ia te ia ma le alofa mutimutivale.
7 Nonofo i le nofoaga lenei, ma nofoaga o faataamilo ai;
8 Ma o le nofoaga ua i ai lo’u loto e tatau ona outou nonofo ai, mo le tele, o le a faasino atu ia te outou i le filemu ma le mana o lo’u Agaga, o le a tafe atu ia te outou.
9 E mafai ona outou maua lenei nofoaga i le mautotogi. Ma ole ma le filiga e uiga i e sa nonofo ai i aso anamua ma faavaeina lenei aai;
10 Aua ua i ai ’oa e tele atu nai le tasi mo outou i lenei aai.
11 O lea, ia outou atamamai e pei o gata ma ia aunoa ma le agasala; ma o le a Ou faatulagaina mea uma mo lo outou lelei, i le vave e mafai ona outou talia ai i latou. Amene.