Tasal 113
Xsumenkil junjunq li patz’om chirix lix tz’iib’ahom laj Isaias, k’eeb’il xb’aan laj Jose Smith li Profeet, sa’ Far West, Missouri, malaj nach’ rik’in, sa’ Marzo 1838.
1–6, Nayeeman k’a’ru lix Toonal laj Isai, li ru’uj li nachal chaq rik’in, ut lix xe’ laj Isai; 7–10, Eb’ li rela’ Sion li jek’inb’ileb’, xk’ulub’eb’ li tijonelil, ut b’oqb’ileb’ chi sutq’iik rik’in li Qaawa’.
1 Ani lix Toonal laj Isai li yeeb’il resil sa’ li xb’een, xkab’, rox, xkaa, ut ro’ raqal re li xjunlaju ch’ol re Isaias?
2 Chi yaal jo’ka’in naxye li Qaawa’: A’an li Kristo.
3 K’a’ru li ru’uj yeeb’il resil sa’ li xb’een raqal re li xjunlaju ch’ol re Isaias, li taatuxmeq chaq sa’ Xtoonal laj Isai?
4 K’ehomaq reetal, jo’ka’in naxye li Qaawa’: A’an jun moos sa’ ruq’ li Kristo, ralal xk’ajol laj Isai chi jun raqal, jo’ ajwi’ laj Efrain, malaj lix junkab’al laj Jose, sa’ xb’een li k’ojob’anb’il wi’ naab’al li wankilal.
5 K’a’ru lix xe’ laj Isai yeeb’il resil sa’ li xlaje raqal re li xjunlaju ch’ol?
6 K’ehomaq reetal, jo’ka’in naxye li Qaawa’, a’an jun ralal xk’ajol laj Isai, jo’ ajwi’ laj Jose, li tz’aqal aj eechanihom re li tijonelil, ut lix laawil li awa’b’ejihom, choq’ jun eetalil, ut choq’ re lix ch’utub’ankil lin tenamit sa’ roso’jikeb’ li kutan.
7 Eb’ lix patz’om laj Elias Higbee: K’a’ru xyaalalil li taqlahom sa’ Isaias, ch’ol 52, xb’een raqal, li naxye: K’e chawix laa metz’ew, at Sion—ut k’a’ru chi tenamit yoo chaq chixyeeb’al laj Isaias?
8 Yoo chixyeeb’al eb’ li te’b’oqe’q xb’aan li Dios sa’ roso’jikeb’ li kutan, li te’k’amoq re li wankilal re tijonelil re xk’amb’al chaq wi’chik Sion, ut re taatojmanq rix Israel; ut lix k’eeb’al lix metz’ew chirix, a’an xk’eeb’al chirix lix wankil li tijonelil, li ak xk’ulub’ a’an, Sion, xb’aan lix xe’toonil; jo’kan ajwi’ naq taasutq’iiq rik’in li wankilal a’an li kisach chaq chiru.
9 K’a’ru tento taqataw ru chirix naq Sion taarisi chaq li b’ak’leb’ wan chixkux; xkab’ raqal?
10 Tento taqataw ru naq elajinb’il chiruheb’ li rela’ li jek’inb’ileb’ naq te’sutq’iiq rik’in li Qaawa’, sa’ li ke’t’ane’ wi’ chaq; wi ut neke’xb’aanu, lix yeechi’ihom li Qaawa’ a’an naq a’an taaraatinaheb’, malaj tixk’e li na’leb’ reheb’ chi k’utb’esinb’il. Chi’ilmanq li xwaq, xwuq, ut xwaqxaq raqal. Li b’ak’leb’ wan chixkux a’an lix majewahom li Dios sa’ xb’een, malaj sa’ xb’een li rela’ laj Israel naq wankeb’ chi jek’inb’il sa’ xyanqeb’ laj Gentil.