Benneg 114
Paltiing a naited babaen ni Joseph Smith a Propeta, iti Far West, Missouri, idi 17 ti Abril 1838 (History of the Church, 3:23).
1–2, Maited kadagiti sabali dagiti pagakeman iti Simbaan nga iggem dagiti saan a napudno.
1 Pudno kastoy ti kinuna ti Apo: Nainsiriban iti katulongak a ni David W. Patten, nga urnosenna amin ti pakaseknanna iti kasapaan a maaramidna, ket aramidenna ti rumbeng kadagiti tagilakona, tapno makapagmision kaniak iti sumaruno a panagtutubo, a kadua dagiti sabsabali, uray sangapulo-ket-dua a pakaibilanganna, a mangipaneknek iti naganko ken mangiburay iti naimbag a damag iti intero a lubong.
2 Ta pudno kastoy ti kinuna ti Apo, nga agingga nga adda kadakayo dagiti mangilibak iti naganko, adda sabali a maimulanto a kasukatda ket awatenda ti pagobispuanda. Amen.