Vaega 119
Faaaliga na tuuina mai e ala mai ia Iosefa Samita le Perofeta, i Far West, Misuri, i le aso 8 o Iulai, 1838, i le tali mai i lana talosaga: “Le Alii e! Faaali mai i au auauna po o le a le tele o le mea e te manaomia mai meatotino a lou nuu mo sefuluai.” O le tulafono o le sefuluai, e pei ona malamalama i ai i ona po nei, sa lei tuuina mai i le Ekalesia i luma atu o lenei faaaliga. O le upu o le sefuluai o loo i le tatalo faatoa sii mai nei ma i faaaliga muamua atu (64:23; 85:3; 97:11), sa lē na’o le tasi-vaesefulu sa faatatau i ai, ae o taulaga uma e faia i le loto-malie, po o foai, e tuu atu i tupe a le Ekalesia. Sa tuu mai muamua e le Alii i le Ekalesia le tulafono o le faapaiaga ma le mea-tausi o meatotino, ia sa ulu atu i ai tagata o le Ekalesia (aemaise lava toeaina taitai), i se feagaiga sa faamoemoe e faavavau. Ona o le lē tumau o le vaega o le toatele i lenei feagaiga, o lea na aveese ai e le Alii lea feagaiga mo se taimi ae tuu mai le tulafono o le sefuluai i le Ekalesia atoa e sui ai. Sa ole atu le Perofeta i le Alii po o le a le tele o a latou meatotino ua manaomia e Ia mo faamoemoega paia. O le tali o le faaaliga lenei.
1–5, E tatau i le Au Paia ona totogi atu a latou meatotino lē manaomia ma tuu atu lea, o se sefuluai, le tasi-vaesefulu o a latou faasiliga o tausaga taitasi; 6–7, O le ala faapena o le a faapaia ai le laueleele o Siona.
1 E moni, ua faapea ona fetalai mai o le Alii, Ou te manaomia a latou mea faasili uma o meatotino uma ua lē manaomia ia tuu atu i lima o le epikopo o la’u ekalesia i Siona,
2 Mo le fausiaina o lo’u fale, ma le faataatiaina o le faavae o Siona ma mo le perisitua, ma mo aitalafu a le Au Peresitene o la’u Ekalesia.
3 Ma o le a avea lenei ma amataga o le sefuluai a lo’u nuu.
4 Ma a mavae lena, o i latou o e ua faapea ona faasefuluaiina, ia totogi atu le tasi-vaesefulu o a latou faasiliga uma i tausaga taitasi; ma ia avea lenei ma tulafono tumau ia te i latou e faavavau, mo la’u perisitua paia, ua faapea ona fetalai mai ai le Alii.
5 E moni Ou te fai atu ia te outou, o le a oo mai o i latou uma o e potopoto atu i le laueleele o Siona, ia faasefuluaiina a latou meatotino faasili, ma ia latou tausia lenei tulafono, po ua le agavaa i latou e mau i totonu o outou.
6 Ma Ou te fai atu ia te outou, afai e lē tausia e lo’u nuu lenei tulafono, ia tausia le paia, ma faapaia le laueleele o Siona mo a’u e ala i lenei tulafono, ina ia tausia ai i ona luga a’u tulafono ma a’u faamasinoga, ina ia silisili ona paia, faauta, e moni Ou te fai atu ia te outou, o le a lē avea ma laueleele o Siona ia te outou.
7 Ma o le a avea lenei o se faataitaiga i siteki uma o Siona. E faapea lava. Amene.