1 Ket manen, isingasingmi ti panangamirismo iti mainugot kadagiti amin a santo a mangurnong kadagiti amin a napagteng, ken panagsagaba ken pannakaidadanes a naaramid kadakuada dagiti tao daytoy nga Estado;

2 Ken kasta met kadagiti amin a sanikua ken dagup dagiti nadadael a sinagrapda, babaen ti pannakadangran ti dayaw ken iti bagi, kasta met dagiti pudno a sanikua;

3 Ken kasta met ti nagnagan dagiti amin a tao a nangimameg kadakuada, agingga a masarakan ken matiliwda ida.

4 Ket mabalin a mabukel ti komiti a mangduktal kadagitoy a banag, ken agala iti palawag ken apidabit; ken kasta met a mangurnong kadagiti agwarwaras a pamadpadakes a pablaak;

5 Ken amin dagiti adda kadagiti magasin, ken kadagiti ensayklopedia, ken amin dagiti naipablaak a pamadpadakes a pakasaritaan, ken sinurat, nga inaramidda, ken mangiparang iti sapasap a panamagsasaip ti nasairuan a kinadakes ken kinadangkes ken makapatay a panagipatungpal a naaramid kadagitoy a tao—

6 Tapno saanmi laeng nga ipablaak iti sangalubongan, ngem idatagmi pay ida kadagiti pangulo ti gobierno iti kinangisit ken kinaayup ti aramidda, kas kakaisunan a pangikamangtayo iti Nailangitan nga Ama, sakbay a naan-anay ken awanen ti pagkurangan ti pannakatuntontayo iti dayta kari a panangawag kenkuana iti lugar a paglemlemmenganna; ken tapno awan ti pakapakawanan ti sangabukel a pagilian sakbay nga idissona ti bileg ti naindaklan a takiagna.

7 Nasken unay daytoy a pagrebbengan nga utangtayo iti Dios, kadagiti anghel, a pakaisaklangantayonto, ken iti bagbagitayo, kadagiti assawa ken annaktayo, a napagtamed a silaladingit, sileleddaang, ken panangisakit, iti babaen ti kadangkokan nga ima ti pammapatay, panangilupitlupit, ken panangirurumen, a tinarabay ken pinaregta ken intag-ay ti pangaring dayta espiritu a sibibileg a nangirematse kadagiti pagannurotan dagiti amma, a nangipatawid iti inuulbod, iti puspuso dagiti ubbing, ken nangpunno iti lubong iti pannakatikaw, ken pimmigsa a pimmigsa, ket isu itan ti kangrunaan a paratignay ti kinadakes, ket agas-asug ti intero a daga iti kinadagsen ti kinamanagbasolna.

8 Isu daytoy ti landok a sangol, nalagda a pamungo; isuda ti posas, ken kawar, ken kadena, ken pammalud ti impierno.

9 Ngarud nasken unay a pagrebbengan nga utangtayo, saan la a kadagiti assawa ken annaktayo, ngem kadagiti pay balo ken awanan amma, a napapatay dagiti assawa a lallaki ken amma kadagiti landok nga ima;

10 A dagiti nasipnget ken nangisit a gagem umdasen a mamagkintayeg uray pay ti mismo nga impierno, ken tumakder nga agkinkintayeg ken bumbumsag, ken mamagtigerger ken mamagkissiw kadagiti ima ti mismo a sairo.

11 Ken kasta met a nasken unay a pagrebbengan nga utangtayo kadagiti amin a tumanor a kaputotan, ken kadagiti amin a natarnaw ti panagpuspusona—

12 Ta adu pay laeng iti daga kadagiti amin a sekta, partido, ken pammati, ti nabulsek kadagiti nasikap nga aramid dagiti tao, nga inyappanda a pangallilaw, ken mailiklik laeng iti kinapudno gapu ta dida ammo ti pangsapulanda—

13 Ngarud, tapno bubosen ken aramatentayo ti biagtayo a pangitunda iti lawag kadagiti amin a banag a nailemmeng iti kasipngetan, nga ammotayo no sadino; ket pudpudno a naipakitada manipud iti langit—

14 Maasikaso koma ngarud dagitoy a sigaganetget.

15 Awan koma ti tao a mangibilang kadagitoy a babassit a bambanag; ta adu pay ti maidatagto iti masakbayan, a maipanggep kadagiti santo, nga agpannuray kadagitoy a banag.

16 Ammoyo, kakabsat, a dakkel ti pakairanudan ti dakkel a bapor iti nakabasbassit a timon iti panawen ti bagyo, babaen ti panangtribisia iti turong ti angin ken dagiti dalluyon.

17 Ngarud, patpatgen unay a kakabsat, agragsaktayo koma nga aramiden amin dagiti naipakumit iti bilegtayo; kalpasanna agtakdertayo, a sililinteg, a sinanama, a makaimatang iti panangisalakan ti Dios, nga ipalgak ti takiagna.