Vaega 123
O le tiute o le Au Paia e faatatau i e faasauā mai ia te i latou, e pei ona sa tusia ai e Iosefa Samita le Perofeta a’o avea ma pagota i le falepuipui i Liperate, Misuri. O le vaega lenei o se fuaitau mai se tusi aloaia i le Ekalesia na tusia i le aso 20 o Mati, 1839 (tagai i le ulutala o le vaega 121).
1–6, E tatau i le Au Paia ona faaputuputu ma lomia faasalalau se tala o o latou mafatiaga ma sauaga; 7–10, O le agaga lava lea e tasi na faatuina talitonuga pepelo ua afua mai ai foi sauaga o le Au Paia; 11–17, E toatele o loo i totonu o lotu uma o le a talia le upumoni.
1 O lenei foi, matou te fautua atu mo lo outou manatunatu i ai, le tatau i le au paia uma ona faaputuputu o se malamalama e uiga i mea moni uma, ma mafatiaga ma sese na faia ia i latou e tagata o le Setete lenei;
2 Ma meatotino uma foi ma le aofai o faatama’iga na latou mafatia ai, i le loto atoa ma manu’a faaletagata lava ia, faapea foi ma meatotino moni;
3 Ma igoa foi o tagata uma na i ai se lima e fesoasoani i o latou sauaga, se’i oo ina mafai ona latou maua ai i latou ma iloa ai i latou.
4 Ma atonu e mafai ona tofia se komiti e sailia ia mea, ma maua mai faamatalaga ma tautinoga tusitusia; ma faaputuputu mai foi lomiga taufaaleaga pepelo ua feavea’i;
5 Ma mea uma o i ai i mekasini, ma tusi o auiliiliga moni, ma talafaasolopito taufaaleaga pepelo uma ua lomia, ma o loo tusia, ma o ai foi na tusia, ma tuu atu se faasologa atoa o faiga faatiapolo ma faamalosiga amioleaga ma fasioti tagata na faia i luga o lenei nuu—
6 Ina ia lē gata ina tatou faasalalau atu i le lalolagi atoa, ae tuu atu i latou i ao o le malo i lo latou tulaga pouliuli uma ma faaseoli, o se taumafaiga mulimuli ua faatonuina ai i tatou e lo tatou Tamā Faalelagi, ae lei mafai ona tatou maua uma ma atoatoa o lena folafolaga lea o le a valaauina ai o ia mai lona lafitaga; ma ina ia tuua le atunuu atoa e aunoa ma se ’alofaga ae lei auina mai e ia le mana o lona aao malosi.
7 O se tiute lē ma’alofia ua tatou nofo aitalafu ai i le Atua, i agelu, o e o le a aumaia i tatou e tutulai faatasi, ma ia i tatou lava, ia tatou avā ma fanau, o e ua faia ia ifo i lalo i le faavauvau, faanoanoa, ma le atuatuvale, i lalo o le lima e sili ona tausalaina o le fasioti tagata, pule malosi, ma le faasauā, ua lagolago ma uunaia ma sapasapaia e uunaiga a lena agaga lea na tu’ifaomauina taofi o tamā, o e ua fai mo latou tofi le pepelo, i loto o fanau, ma faatumuina le lalolagi i le fenumia’i, ma ua tupu malosi pea lava, ma ua avea nei ma puna-autu o mea eleelea uma, ma ua ōi le lalolagi atoa i lalo o le mamafa o lona amioletonu.
8 O se amo u’amea, o se maea malosi; o taofi-lima lava ia, ma filifili, ma tauvae, ma nonoa o seoli.
9 O lea o se tiute lē ma’alofia ua tatou aitalafu ai, e lē nao ia tatou lava avā ma fanau, ae i fafine foi ua oti a latou tane ma e ua aunoa ma tamā, o e o a latou tane ma tamā na fasiotia i lalo o lona lima u’amea;
10 O galuega pouliuli ma pogisa ua fai ma mea e gatete ai o seoli lava ia, ma tulai faate’ia ma sesega ai, ma galulu ma le mafai ai ona taofia le gatete o lima o le tiapolo lava ia.
11 Ma o se tiute lē ma’alofia foi ua tatou aitalafu ai i tupulaga fana’e uma, ma i e uma ua loto mamā—
12 Aua o loo i ai nei tagata e toatele i luga o le lalolagi i totonu o lotu uma, vaega, ma tapuaiga, o e ua faatauasoina i le taufaasese poto o tagata, lea ua latou taooto faapupuna ai e faasese, ma o e ua nao na taofia mai le upumoni ona ua latou lē iloa le mea e maua ai—
13 O lea, e tatau ona tatou faama’umau ai ma faaaoga ia uma o tatou ola i le aumaia i le malamalama o mea natia uma a le pogisa, i mea ua tatou iloa ai; ma ua faaalia moni mai i latou mai le lagi—
14 Ona o lea e tatau ai ona faasaga atu i le faia o ia mea ma le filiga tele.
15 Ia lē tuu atu i se tagata ia manatu i ia mea o ni mea faatauvaa; aua e tele mea o i lumanai, e faatatau i le au paia, o e ua faalagolago i luga o ia mea.
16 Ua outou silafia, uso e, e aoga tele i se vaa tele se foeuli laitiiti i le taimi o se afa, e faatautaia faasagatonu ai le folauga i le matagi ma galu.
17 O lea, le au uso pele e, ia tatou faia ai ma le fiafia mea uma ua i ai i lo tatou mana; ona mafai lea ona tatou tutulai e faatali, ma le mautinoa atoatoa, e vaai i le faaolataga a le Atua, ma lona aao o le a faaali mai.