Vaega 125
Faaaliga na tuuina mai e ala mai ia Iosefa Samita le Perofeta, i Navu, Ilinoi, Mati 1841, e faatatau i le Au Paia i le teritori o Iowa.
1–4, Ia fausia e le Au Paia aai ma ia faapotopoto i siteki o Siona.
1 O le a le finagalo o le Alii e faatatau i le au paia i le Teritori o Iowa?
2 E moni, ua faapea ona fetalai mai o le Alii, Ou te fai atu ia te outou, afai e fia faia e i latou o e ua ta’ua i latou e i latou lava i lo’u igoa ma o loo taumafai e avea ma a’u au paia, afai latou te fia faia lo’u loto ma tausi i a’u poloaiga e faatatau ia te i latou, ia tuu atu ia te i latou e faapotopoto faatasi i latou lava i nofoaga o le a Ou tofia mo i latou e ala atu i la’u auauna o Iosefa, ma ati a’e aai i lo’u igoa, ina ia latou saunia mo mea ua faapolopoloina mo se taimi o le a oo mai.
3 Ia tuu atu ia te i latou e fausia se aai i lo’u igoa i luga o le laueleele fesaga’i ma le aai o Navu, ma ia tuu atu le igoa o Sara’emila e faaigoa ai.
4 Ma ia tuu atu ia i latou uma o e e o mai mai sasa’e, ma sisifo, ma matu, ma saute, o e e mananao e nonofo ai i totonu, e ave o latou tofi i lena lava aai, faapea foi i le aai o Nashville, po o i le aai o Navu, ma i siteki uma ua Ou tofia, ua fetalai mai ai le Alii.