1 Toutotan Senyè a revele m ènmi m yo, ni nan Missouri ak nan Eta sa a, ap pousuiv mwen ankò san rezon; epi toutotan yo pousuiv mwen san rezon, epi yo pa gen yon ti lonbraj oubyen okenn koulè la jistis oubyen dwa an favè yo pou yo kanpe nan jijman kont mwen; epi toutotan pretansyon yo fonde sou foste devan je ki pi avèg la, m panse se nesesè epi se saj pou m kite zòn nan pou yon ti tan, pou pwoteksyon pa m ak pwoteksyon pèp sa a. M vle di tout moun ki an afè avèk mwen, m kite zafè mwen nan men ajan ak sekretè ki pral ranje tout tranzaksyon nan yon fason rapid ki apwopriye, epi ki pral peye tout dèt san delè, ki pral vann byen, oubyen selon sa sitiyasyon an mande, oubyen jan sikonstans yo admèt pou yo fè. Lè m aprann move tan an fin pase nèt, lè sa a, m ap retounen kote nou ankò.

2 Epi kanta anba peripesi m aple pou m pase yo, sanble se yon ti bagay tou piti pou mwen, kòm anvi ak kòlè lèzòm te toujou chatiman pa m chak jou nan vi m; epi pou ki kòz sanble se yon mistè, eksepte m te òdone depi anvan fondasyon mond lan pou kèk bon oubyen move objektif, jan nou ta chwazi rele l. Nou jije pou tèt pa nou. Bondye konnen tout bagay, ni bon ni move. Men antouka, m abitye naje nan dlo fon. Tout bagay sa yo vin tou natirèl pou mwen kounyeya; epi m santi m tankou Pòl, pou m glorifye m nan tribilasyon m yo; paske jouk jodi a menm Bondye zansèt mwen yo toujou delivre m anba yo tout, epi li pral toujou delivre m; paske gade, m ap triyonfe sou tout ènmi m yo, paske Senyè a te di sa.

3 Se poutèt sa, se pou tout sen yo rejwi, epi pou yo kontan anpil; paske Bondye Izrayèl la se Bondye yo, epi l ap mete yon rekonpans ki jis sou tèt tout opresè yo.

4 Epi ankò, an verite, Senyè a di: Se pou travay tanp mwen an, ak tout travay m ba nou yo kontinye epi pou yo pa sispann; epi Senyè tout Lame yo di se pou dilijans nou, ak pèseverans nou, ak pasyans nou ak zèv nou yo redouble, epi nou p ap pèdi rekonpans nou nan okenn fason. Epi si yo pèsekite nou, se konsa yo te pèsekite pwofèt yo ak moun ki jis yo ki te vin anvan nou yo. Pou tout bagay sa yo gen rekonpans nan syèl la.

5 Epi ankò, m ba nou yon pawòl ki gen relasyon avèk batèm pou mò yo.

6 An verite, Senyè nou an di nou konsènan mò nou yo: Lè nenpòt pami nou batize pou mò nou yo, dwe genyen yon grefye, epi li dwe sèvi temwen avèk je l pou batèm nou yo; se pou l tande avèk zòrèy li, poul kapab temwaye konsènan verite a;

7 Pou nan tout rapò nou yo sa kapab anrejistre nan syèl la; pou nenpòt bagay nou lye sou tè a, kapab lye nan syèl la; pou nenpòt bagay nou demare sou tè a, kapab demare nan syèl la;

8 Paske Senyè tout Lame yo di, m pral restore anpil bagay sou tè a, konsènan prètriz la.

9 Senyè tout Lame yo di, epi ankò se pou rejis yo nan lòd, pou yo kapab ale nan achiv tanp sen mwen an, pou moun kapab sonje yo depi nan yon jenerasyon jouk nan yon lòt jenerasyon.

10 M ap di tout sen yo, m vle, avèk yon gran volonte, pale yo konsènan sijè batèm pou mò yo, nan Saba k ap vini an. Men, toutotan m pa gen pouvwa pou m fè sa, m ap ekri pawòl Senyè yo tanzantan, sou sijè sa a, epi m ap voye l ba nou pa lapòs, ansanm avèk anpil lòt bagay.

11 M fèmen lèt mwen an pou kounyeya, paske m pa gen ase tan; paske, ènmi an kanpe, epi jan Sovè a te di a, prens mond sa a vini, men, li pa jwenn anyen nan mwen.

12 Gade, priyè m devan Bondye se pou nou tout sove. Epi m konsidere tèt mwen kòm sèvitè nou nan Senyè a, pwofèt ak vwayan Legliz Jezikri pou Sen Dènye Jou yo.