Mwakoro 131
Kaetieti mai iroun Iotebwa Timiti te Burabeti, a kaotaki i Ramus, Illinois, ni Meei 16 ao 17, 1843.
1–4, Te mare ae tiretio e riai ibukin te karietataki i karawa are te kabane n rietata; 5–6, E kabwarabwaraaki aron kabaeakiia aomata nakon te maiu ae akea tokina; 7–8, Tamnei ni kabane bon te bwai.
1 Ni mimitongin te tiretio iai teniua karawa iai ke rinanna;
2 Ao bwa e aonga ni karekea te kabanea n rietata, te aomata e riai n rin n te karinan n nakoanibonga aio [are nanona te berita ae tabu ae boou ae akea tokina n te mare];
3 Ao ngkana e aki, e aki kona ni karekea.
4 E kona n rin n are teuana, ma bon anne tokin ueana; e aki kona n rikirake.
5 (Meei 17, 1843.) Te taeka ni burabeti ae kamatoaki riki koauana e nanonaki bwa e ataaki iroun te aomata ae e kabaeaki nakon te maiu ae akea tokina, man te kaotioti ao tamnein te taeka ni burabeti, rinanon mwaakan te Nakoanibonga ae Tabu.
6 E bon aki kona ni kamaiuaki te aomata ngkana e aki ataibwai.
7 Bon akea te bwai ae riki man te aakea. Ni kabane tamnei bon te bwai, ma e tamaroa riki ke e itiaki riki, ao e ti kona n nooraki ni maata aika itiaki riki;
8 Ti aki kona n nooria, ma ngkana a kaitiakaki rabwatara ti na nooria bwa bon te bwai.