1 Ni kamatoaan te kakoaua ibukin te boki aei ao Ana Boki Moomon, ti katanoata tiringakiia ibukin aia koaua Iotebwa Timiti te Burabeti, ao Hyrum Smith are te Tamanuea. A katiiaki n te umwa ni kaikain i Carthage, n 27 n Tuun, 1844, tao n te aoa nimaua n te bwakantaai, irouia taan iowaawa aika iai aia bwai ni buaka—a benia ubuia n te roro—ae kania 150 nakon 200 aomata. E moan katiiaki Hyrum ao e karaurau ni bwaka, n takarua: I a boni mate! Iotebwa e kiba man te winto, ao e bon katiiaki ngke e kataia ni kiba, n takarua: O te Uea ae Atuau! A uaia ni katiiaki i mwin mateia, n te aro ni iowaawa, ao a uaia ni katiiaki aua te tai.

2 John Taylor ao Willard Richards, uoman man te Tengun ma Uoman, bon ti ngaia kaain te ruu n te tai arei; are te moan e ikoaki n te aro ni kaikoaki ae korakora ma aua katiiana, ma e a tia ni marurung i mwin rikin aei; are te kauoman, rinanon ana ibuobuoki te Atua, e birinako, n akea naba teuana te bwangabwanga ni kunikaina.

3 Iotebwa Timiti, ana Burabeti ao ana Tia Mamata te Uea, e a tia ni karaoa ae mwaiti riki, ibukin kamaiuaia aomata n te aonaba aei, nakoia aomata nako ake a tia ni maeka iai, ma ti Iesu. I nanon te tai ae uarereke ae uabwi te ririki, e a tia ni kaotinakoa Ana Boki Moomon, are e rairia man ana bwaintituaraoi ao mwaakan te Atua, ao n riki bwa te tia karika boretiakina ni kontenanti aika uoua; e a tia ni karokoa bwaninin te euangkerio ae akea tokina, are bon kanoana, nakon mwakoron te aonaba ake aua; e a tia ni kaoti kaotioti ao tuua ake bon kanoan te boki aei ae Reirei ao Berita aika Tabu; ao a mwaiti riki rongorongo ao kaetieti aika wanawana ibukin kabwaiaia natia aomata; e bobotia nga aika mwaiti Aomata aika Itiaki ni Bong aika Kaitira, e katea te kaawa ae korakora, ao e katuka kinaakina ao arana ae aki kona ni kamaunaki. E kakannato maiuna, ao e kakannato matena i matan te Atua ao ana botanaomata; ao n ai aroia ana aomata te Uea aika kabiraki n tai ake ngkoa, e a tia ni kamatoa ana mition ao ana mwakuri ma oin raraana, ao ai aron naba tarina ae Hyrum. Ni maiuia a bon aki karaurenakoaki, ao n te mate a bon aki kamaenakoaki!

4 Ngke e nako Iotebwa nako Carthage bwa e na bon anga ngaia ibukin ae aongkoa e kainnanoaki i an te tua, uabong ke tenibong i mwaain tiringana, e taku: “N na nako n ai aron te tiibu te teei nakon te kamateaki; ma I bon rau n ai aron te ingabong n tain te kabuebue; iai au iango ae akea kairuana nakon te Atua, ao nakoia aomata ni kabaneia. N na mate n akea au bure, ao e na bon taekinaki aei ibukiu—e bon tiringaki n te aro ae karauaki ni baireaki.”—N te ingabong naba arei, i mwina ngke e a katauraoi n nako Hyrum—tao e na taekinaki bwa nakon te kamateaki? eng, bwa bon ngaia aei—e wareka te barakaraba aei, ae uakaan ma tokin te katebwi ma uauo ni mwakoro n Ita, n Ana Boki Moomon, ao e otea tabon baana i aona.

5 Ao e koro bukina bwa I tataro nakon te Uea bwa e na angania Tientaire te akoaki, bwa aonga ni karekea te tangira ae kororaoi irouia. Ao e koro bukina bwa e taku te Uea nakoiu: Ngkana akea te tangira ae kororaoi irouia ao e aki bongana nakoim, ko a tia ni kakaonimaki, ngaia are a na kaitiakaki kunnikaim. Ao ibukina bwa ko a tia n noora mamaaram ko na kakorakoraki bwa ko na tekateka n te tabo are I a tia ni katauraoia n ana nne ni maeka Tamau. Ao ngkai ngai … I kabo nakoia Tientaire; eng, ao nakoia naba tariu aika I tangiriia, ni karokoa ti na kaitibo i matan ana kaintekateka ni motikitaeka Kristo, are a na bane aomata n ataia bwa aki memea kunikaiu n raraami. Taan kakoaua a mate ngkai, ao aia koaua a teimatoa.

6 Hyrum Timiti bon abwi ma aua ana riki ni Beberuare, 1844, ao Iotebwa Timiti bon tenibwi ma waniua n Ritembwa, 1843, ao man te tai aei araia a mena i buakoia naake a tiringaki ibukin te aro; ao te tia wareware n aba nako a na kauringaki bwa Ana Boki Moomon, ao te boki aei ae Reirei ao Berita aika Tabu n te ekaretia, a kabooaki n te raraa ae te kabanea n tamaroa n te katebwi ma ruaiua n tienture bwa a na kaotinakoaki ibukin kamaiuan te aonaba ae uruakaki; ao bwa ngkana te ai e kona n urua te aroka ae maiu ibukin mimitongin te Atua, ai bebetera bwa e na kabuoki aroka aika mauteretere ni kaitiaka te nne ni kurebe man te buakaka. A maiu ibukin te mimitong, a mate ibukin te mimitong; ao te mimitong bon kaniwangaia ae akea tokina. Man te roro teuana nakon teuana araia a na uotaki rikaki nakoia kanoaia n ai aron te atibu ae kakawaki ibukia aika a katabuaki.

7 A itiaki man taian bure, n aron ae e aki toki ni kakoauaaki mai mwaina, ao a tauaki n te umwa ni kaikain man aia babaire taan kamwaamwane ao aomata aika buakaka; ao raraaia ae akea burena i aontano n te umwa ni kaikain i Carthage bon te kanikina ae korakora ae kaairaki ma te Aro ni Moomon ae aki kona ni kaakeaaki ni boowin nako te aonaba, ao raraaia ae akea burena i aon ana kanikina te Mwakoro n Aba ae Illinois, ma uruan onimakinan te Mwakoro n Aba n aron ana berita te koowana, bon te kakoaua ibukin koauan te euangkerio ae akea tokina ae aki kona ni kabureaki n te aonaba ni kabane; ao raraaia ae akea burena i aon te buraeki ni inaomata, ao i aon te tua ae maungatabu n te United States, bon te tia tei ibukin ana aro Iesu Kristo, are e na riinga nanoia aomata aia kokoaua i buakoia botanaomata nako; ao raraaia ae akea burena, ma raraaia ae akea burena ni kabane ake a tiringaki ibukin aia koaua are e nooria Ioane i aan te baonikarea, e na takarua nakon aia Uea Taanga ni Buaka ni karokoa e kataea kain te rara anne i aon te aonaba. Amen.