Vaega 137
O se faaaliga vaaia na tuuina mai ia Iosefa Samita le Perofeta, i le malumalu i Katelani, Ohaio, i le aso 21 o Ianuari, 1836. O le mea na faia o le tuuina atu lea o sauniga e saunia ai mo le faapaiaga o le malumalu.
1–6, Ua vaaia e le Perofeta lona uso o Alevini i le malo selesitila; 7–9, Ua faaali mai le mataupu faavae o le faaolataga mo e ua maliliu; 10, E faaolaina fanau laiti uma i le malo selesitila.
1 Sa tatalaina le lagi i luga o i matou, ma sa ou vaaia le malo selesitila o le Atua, ma lona mamalu, pe i le tino po o i fafo o le tino sa lē mafai ona ou iloaina.
2 Sa ou vaaia le matagofie silisili o le faitotoa o le a ulu atu ai suli o lena malo, sa foliga mai e pei o le sasao faataaliolio o se afi;
3 Ma le nofoalii pupula foi o le Atua, sa afifio ai le Tamā ma le Alo.
4 Sa ou vaai i auala matagofie o lena malo, sa foliga mai ua paeina i auro.
5 Sa ou vaai i le Tama o Atamu ma Aperaamo; ma lo’u tamā ma lo’u tinā; lo’u uso o Alevini, o lē ua leva ona moe;
6 Ma sa ou ofo pe na faapefea ona maua e ia se tofi i lena malo, talu ai ona sa tuua e ia lenei olaga ae lei faatuina e le Alii lona aao e faapotopoto Isaraelu i le taimi lona lua, ma sa lei papatisoina o ia mo le faamagaloina o agasala.
7 Sa faapea ona oo mai o le siufofoga o le Alii ia te a’u, ua fetalai mai: O i latou uma o e na maliliu e aunoa ma se malamalama e uiga i lenei talalelei, o e semanū latou te taliaina pe a na faatagaina i latou e ola, o le a avea ma suli o le malo selesitila o le Atua;
8 O lenei foi o i latou uma o e e maliliu mai le taimi nei ma le agai i luma e aunoa ma se malamalama e uiga i le talalelei, o e semanū latou te taliaina ma o latou loto atoa, o le a avea ma suli o lena malo;
9 Aua o A’u, o le Alii, o le a faamasinoina tagata uma e tusa ma a latou galuega, e tusa ma le manaoga o o latou loto.
10 Ma sa ou vaai foi o tamaiti uma o e e maliliu a’o lei oo i latou i tausaga e tali mai ai ua faaolaina i le malo selesitila o le lagi.