Benneg 15
Paltiing a naited ken ni John Whitmer babaen ni Joseph Smith a Propeta, iti Fayette, Nueva York, idi Hunio 1829 (History of the Church, 1:50). (Kitaen met ti paulo ti benneg 14.) Nasinged ken makaawis ti kinadekket ti mensahe, a pangibagaan ti Apo iti naipakaammo laeng kenkuana ken ni John Whitmer. Iti saan a nabayag nagbalin ni John Whitmer a maysa kadagiti Walo a Saksi iti Libro ni Mormon.
1–2, Adda ti takiag ti Apo iti intero a daga; 3–6, Banag a kapatgan ti panangikasaba iti ebanghelio ken panangisalakan iti kararua.
1 Dumngegka, katulongak a John, ket denggem dagiti balikas ni Jesucristo, ti Apo ken ti Mannubbotmo.
2 Ta adtoy, agsaoak kenka a silalawag ken sibibileg, ta adda ti takiagko iti intero a daga.
3 Ket ibagak kenka nga awan ti tao a makaammo malaksid kaniak ken sika laeng—
4 Ta namin-adun a daras a tinarigagayam kaniak nga ammuen no ania ti kapatgan kenka.
5 Adtoy, mabendisionanka iti daytoy a banag, ken iti panagsaom kadagiti balikasko nga intedko kenka maipanggep kadagiti bilinko.
6 Ket ita, adtoy, kunak kenka, a ti panangipakdaarmo kadagiti tao ti panagbabawi ti kapatganto kenka, tapno makayegka kaniak iti kararua, tapno kaduamto ida nga aginana iti pagarian ti Amak. Amen.