Vaega 16
Faaaliga na tuuina mai e ala mai ia Iosefa Samita le Perofeta, ia Peter Uitimera Le Itiiti, i Feiete, Niu Ioka, Iuni 1829. (tagai i le ulutala o le vaega 14). Sa avea Peter Uitimera Le Itiiti mulimuli ane, o se tasi o Molimau e Toavalu o le Tusi a Mamona.
1–2, Ua i luga o le fogaeleele atoa le aao o le Alii; 3–6, O le talai atu o le talalelei ma le laveaiina o agaga o le mea sili lea ona taua.
1 Faalogo mai ia, la’u auauna Peteru, ma faalogo mai i upu a Iesu Keriso, lou Alii ma lou Togiola.
2 Aua faauta, Ou te tautala atu ia te oe ma le aoaiga tuusao ma le mana, ona o lo’u lima ua i luga o le lalolagi atoa.
3 Ma o le a Ou tau atu ia te oe le mea ua leai se tagata na te iloaina vagana ai na o a’u lava ma oe—
4 Aua e tele taimi na e manao mai ai ia te a’u ia e iloa le mea ua sili ona taua mo oe.
5 Faauta, amuia oe ona o lenei mea, ma ona o lou tautala atu o a’u upu na Ou tuu atu ia te oe e tusa ai ma a’u poloaiga.
6 Ma o lenei, faauta, Ou te fai atu ia te oe, o le mea e sili ona taua ia te oe o le alaga atu lea o le salamo i lenei nuu, ina ia mafai ona e aumai o agaga ia te a’u, ina ia mafai ona e mapu faatasi ma i latou i le malo o lo’u Tamā. Amene.