Vaega 17
Faaaliga na tuuina mai e ala mai ia Iosefa Samita le Perofeta, ia Oliva Kaotui, Tavita Uitimera, ma Matini Harisi, i Feiete, Niu Ioka, Iuni 1829, ae latou te lei vaai i papatusi togitogia sa i ai le talafaamaumau o le Tusi a Mamona. Sa iloa e Iosefa ma lana tusiupu, o Oliva Kaotui, mai le faaliliuga o papatusi o le Tusi a Mamona, e i ai molimau faapitoa e toatolu o le a tofia (tagai i le Eteru 5:2–4; 2 Nifae 11:3; 27:12). Sa uunaia Oliva Kaotui, Tavita Uitimera, ma Matini Harisi i se manaoga musuia e avea ma molimau faapitoa e toatolu. Sa ole atu le Perofeta i le Alii, ma sa tuu mai ai le faaaliga lenei o se tali, e ala mai i le Urima ma le Tumema.
1–4, O le a vaai Molimau e Toatolu i papatusi ma isi mea paia e ala i le faatuatua; 5–9, Ua molimau mai Keriso i le paia o le Tusi a Mamona.
1 Faauta, Ou te fai atu ia te outou, e ao ina outou faalagolago i la’u upu, lea afai tou te faia ma le faamoemoe atoa o le loto, o le a outou maua se vaaiga o papatusi, ma le ufifatafata foi, le pelu a Lapana, le Urima ma le Tumema, ia na tuu atu i le uso o Iareto i luga o le mauga, i le taimi na talanoa faafesagai ai o ia ma le Alii, ma faasinoala faavavega ia na tuu atu ia Liae a’o i ai i le vao, i tuaoi o le Sami Ulaula.
2 Ma o lo outou faatuatua, lena lava faatuatua sa i ai i perofeta o anamua, o le a outou maua ai se vaaiga o ia mea.
3 Ma a uma ona outou maua o le faatuatua, ma uma ona outou vaai i ia mea i o outou lava mata, ia outou molimau atu e uiga ia i latou, i le mana o le Atua;
4 Ma ia outou faia lenei mea ina ia lē faaumatiaina la’u auauna o Iosefa Samita, Le Itiiti, ina ia mafai ona Ou faataunuuina o’u faamoemoega amiotonu i le fanauga a tagata i lenei galuega.
5 Ma ia outou molimau atu sa outou vaai i ia mea, e pei lava ona vaai i ai la’u auauna o Iosefa Samita, Le Itiiti; ona o lo’u mana na vaai ai o ia i ai, ma o le pogai ona sa ia te ia le faatuatua.
6 Ma ua ia faaliliuina le tusi, le vaega lava lea na Ou poloaiina ai o ia, ma e pei ona soifua lo outou Alii ma lo outou Atua, ua moni ia.
7 O le mea lea, ua outou maua lea lava mana, ma lea lava faatuatua, ma lea lava meaalofa e pei o ia;
8 Ma afai tou te faia a’u poloaiga mulimuli nei, ia ua Ou tuu atu ia te outou, o le a lē manumalo faitotoa o seoli ia te outou; ona ua lava lo’u alofa tunoa mo outou, ma o le a siitia a’e outou i luga i le aso gataaga.
9 Ma o A’u, o Iesu Keriso, lo outou Alii ma lo outou Atua, ua tautala atu i lenei mea ia te outou, ina ia mafai ona Ou faataunuuina o’u faamoemoega amiotonu mo le fanauga a tagata. Amene.