1 Ngai te Arebwa ao te Omeka, Kristo te Uea; eng, ae bon ngai ngaia, te moan ao te kabane, te Tia Kaboa te aonaba.

2 Ngai, i mwin kakoroan ao katiaan ana kantaninga are I nako mai irouna, are te Tama, ni kaineti nakoiu—ni karaoa aio bwa I aonga ni kaaki bwai ni kabane i au—

3 N taui mwaaka ni kabane, nakon naba kamaunaan Tatan ao ana mwakuri n tokin te aonaba, ao te kabanea ni bong ae kakannato ni motikitaeka, are N na karokoa i aoia kaaina, ni motiki taekaia aomata nako ni kaineti nakon aia mwakuri ao aroaroia are a tia ni karaoia.

4 Ao e koaua bwa aomata nako a na riai n raira nanoia ke a na karawawataki, bwa Ngai, te Atua ae akea tokina.

5 Mangaia are, I aki kamaunaa te motikitaeka are N na karokoa, ma rekenikai a na waaki, te tang, te tatakarua ao te kangenge wii, eng, nakoia naake a kuneaki n angamaingiu.

6 E ngae n anne, e aki koreaki bwa a na akea tokin te kammaraki aio, ma e koreaki bwa te kammarakaki ae aki totoki.

7 E a manga koreaki riki bwa te kabuakakaaki ae akea tokina; mangaia ae e matata riki nakon taian koroboki aika tabu ake tabeua, bwa e aonga ni kona ni mwakuri i nanoia natia aomata, ni kabane ibukin mimitongin arau.

8 Mangaia are, N na kabwarabwara nakoimi te bwai ae e raba aei, bwa e riai iroumi bwa kam na atai n ai aroia au abotoro.

9 I taetae nakoimi ake kam rineaki n te bwai aei, n aron ae tii temanna, bwa kam aonga n rin i nanon au motirawa.

10 Bwa, nooria, te bwai ae raba ae te aro n Atua, ai korakora ra! Bwa, nooria, akea tokiu, ao au katuua are I anga ni baiu bon te katuua ae e aki totoki, bwa Te Aki Totoki bon arau. Mangaia are—

11 Te katuaeaki ae akea tokina bon ana katuaa te Atua.

12 Te katuaeaki ae aki totoki bon ana katuaa te Atua.

13 Mangaia are, I tuangko bwa ko na raira nanom, ao ni kawakini tuua are ko a tia ni karekea ni bain au tia mwakuri ae Iotebwa Timiti te Ataei, n arau;

14 Ao bon man mwaakau ae moan te korakora ae ko a tia ni karekei iai;

15 Ngaia are I tuangko bwa ko na raira nanom—raira nanom, bwa mwina N na oreiko n te kai ae au taeka, ao n uniu, ao n aki kukureiu, ao e na korakora karawaawataakim—aron korakorana ko aki ataia, aron rianakona ko aki ataia, eng, aron matoana n rinanona ko aki ataia.

16 Ma nooria, Ngai, te Atua, I a tia ni karawaawataaki ni bwai aikai ibukia aomata ni kabane, bwa kam aonga n aki karawaawataaki ngkana kam raira nanomi;

17 Ma ngkana a aki raira nanoia a na riai ni karawaawataaki n ai arou;

18 Te karawaawata are e karika nakoiu, Ngai ae te Atua, te kabanea ni korakora i buakomi ni kabane, bwa N na ruru ibukin te maraki, ao ni wawanako te rara man bwangabwangan kuniu, ao n rawaawata n te rabwata ao te tamnei—ao n tangiria bwa N na aki nimma te mwangko ae e mao, ao ni keerikaaki—

19 E ngae n anne, te mimitong nakon te Tama, ao I nimma ao ni katia au katauraoi ibukia natia aomata.

20 Mangaia ae, I a manga tuangko riki bwa ko na raira nanom, bwa mwina I kananorinanoko ma mwaakau ae moan te korakora; ao bwa ko na kaoti am bure, bwa mwina ko na rawaawata n taian katuua ake I a tia n taekin, are e bon uarereke, eng, are bon te kabanea ni uarereke are ko a tia ni katoongnga ngke I anaa Tamneiu.

21 Ao I tuangko bwa akea ae ko na tataekinna riki ma tii te rairannano, ao ko na aki kaoti bwaai aikai nakon te aonaba ni karokoa e riai irou.

22 Bwa a aki kona n butimwaea te iriko ngkai, ma te miriki are a riai ni karekea; mangaia ae, a na riai n aki atai bwaai aikai, bwa mwiina ao a na mate.

23 Reiakina taekau, ao ongo n au taeka; nakonako ma te nimamannei n Tamneiu, ao ko na karekea te rau mai irou.

24 Boni Ngai Iesu Kristo; I roko man ana kantaninga te Tama, ao I karaoa ana kantaninga.

25 Ao I a manga tuangko riki bwa ko na tai mataiakina buun raom; ke n ukoukora maiun kaain rarikim.

26 Ao I a manga tuangko riki bwa ko na aki mataiakina bon oin am bwai, ma anga ma te tituaraoi ibukin boreetiakin Ana Boki Moomon, are kanoana te koaua ao ana taeka te Atua—

27 Are bon au taeka nakoia Tientaire, are e na waekoa n roko irouia Iutaia, are nikiraia bon tenaan Reimwanaite, bwa a aonga ni kakoaua te euangkerio, ao n aki kakaantaninga rokon te Mesia are e a kaman roko.

28 Ao I manga tuangko riki bwa ko na tataro ma bwanaam ao inanom naba; eng, i matan te aonaba ao ni karaba naba, i mataia aomata ao n tii ngkoe naba.

29 Ao ko na taekina te rongorongo ae kakukurei, eng, n taekinii i aoni maunga, ao i aon taabo aika rietata nako, ao i buakoia aomata nako aika ko na anganaki te kariaiakaki bwa ko na nooriia.

30 Ao ko na karaoia ma te nanorinano, n onimakinai, n aki kabuakaka ni kaaitaraia taan kabuakaka.

31 Ao n aki atong reirei aika a nano, ma ko na taekina te rairannano ao te onimaki iroun te Tia Kamaiu, ao kamaunaan bure n te bwabetito, ao man te ai, eng, are te Tamnei ae Raoiroi.

32 Nooria, aio te tua ae korakora ao te kabanea are N anganiko ni kaineti nakon te bwai aei; bwa e na tau ibukin nakonakom n taai nako, ni karokoa naba tokin maium.

33 Ao te karawawataaki ae ko na karekea ngkana ko kaakeai reirei aikai, eng, ao kamaunaakim naba ma am bwai.

34 Kaboonakoa mwakoron am bwai, eng, mwakoron naba abam, ao ni kabane ma tii are ibukin boutokaaia am utu.

35 Kabwaraa te taarau are ko boraraoiakinna ma te tia booretia te boki. Kabwarako man te tautoronaki.

36 Kitana am auti ma mwengam, ma tii ngkana ko tangiria n nooriia am utu;

37 Ao taetae raoi nakoia ni kabane; eng, tataekinna, kaungaia, taekina te koaua, ma te bwana ae baibati naba, ma te bwanaa ni kukurei, takaaruaea—Otanna, otanna, e na kakabwaiaaki aran te Uea ae te Atua!

38 Tataro n taai nako, ao N na nurakina Tamneiu i aom, ao e na korakora kakabwaiaam—eng, e mwaiti riki nakon are ngkana ko karekei kaubwain aon te aba ao te mka tokiia.

39 Nooria, ko kona ni wareka aio n akea te kimwareirei ao n aki tabekaarake nanom ibukin te kukurei?

40 Ke ko kona ni waaki nako n aron te tia kairi ae e mataki?

41 Ke ko kona n nanorinano ao n nimamannei, ao ni kaira maium n ae e riai i matau? Eng, nakomai nakon am Tia Kamaiu. Amen.