Benneg 25
Paltiing a naited babaen ken ni Joseph Smith a Propeta, iti Harmony, Pennsylvania, idi Hulio 1830 (History of the Church, 1:103–104). (Kitaen met ti paulo ti benneg 24.) Ipakita daytoy a paltiing ti pagayatan ti Apo nga aramiden ni Emma Smith, ti asawa ti Propeta.
1–6, Natudingan ni Emma Smith, ti napili a babai, a mangtarabay ken mangliwliwa iti asawana; 7–11, Natudingan pay nga agsurat, a mangilawlawag kadagiti nasantuan a kasuratan, ken mangpili kadagiti himno; 12–14, Kararag iti Apo ti kanta dagiti nalinteg; 15–16, Mayannatup iti amin dagiti pagbatayan ti kinatulnog iti daytoy a paltiing.
1 Dumngegka iti timek ti Apo a Diosmo, bayat ti panagsaok kenka, Emma Smith, anakko; ta pudno kunak kenka, annak a lallaki ken babbai iti pagariak amin dagiti umawat iti ebangheliok.
2 Ikkanka iti paltiing maipanggep iti pagayatak; ket no napudnoka ken magnaka kadagiti dana ti saguday iti sangok, taginayonek ti biagmo, ken umawatka iti tawid iti Zion.
3 Adtoy, pinakawannan dagiti basolmo, ket sika ti napili a babai, a tinudingak.
4 Dika agdayamudom gapu kadagiti banag a dimo nakita, gapu ta di naipakita kenka ken iti lubong, gapu ta nakemko para iti dumteng a panawen.
5 Ket naituding kenka a takem ti mangliwliwa iti katulongak a ni Joseph Smith, Jun., nga asawam, iti rigrigatna, babaen dagiti makaliwliwa a balikas, iti espiritu ti kinaemma.
6 Ket sumurotka kenkuana iti panawen a papanna, ket agbalinka a para suratna, bayat ti kaawan ti para suratna, tapno mabalin nga ibaonko ti katulongak, ni Oliver Cowdery, iti kaano man a pagayatak.
7 Ket maordenankanto babaen ti imana a mangilawlawag kadagiti nasantuan a kasuratan, ken mangigunamgunam iti simbaan, a maibatay iti maited kenka babaen ti Espirituk.
8 Ta ipataynanto dagiti dakulapna kenka, ket awatemto ti Espiritu Santo, ket maitedto ti panawenmo nga agsurat, ken agadal iti adu.
9 Ket saan a nasken nga agbutengka, ta tarabayennakanto ti asawam iti simbaan; ta para kadakuadanto ti nakaitudinganna, ta mabalin a maipalgakto amin a banag kadakuada, ania man a pagayatak, a maibatay iti pammatida.
10 Ket pudno kunak kenka nga iwaksimto dagiti banag a nailubongan, ket sapulem dagiti banag a nasaysayaat.
11 Ket maitedto kenka, met, ti panagpili kadagiti sagrado a himno, a kas iti pannakaitedto kenka, a makaay-ayo kaniak, nga addanto iti simbaanko.
12 Ta maragsakan ti kararuak iti kanta ti puso; wen, kararag kaniak ti kanta dagiti nalinteg, ket masungbatanto babaen ti bendision kadagiti uloda.
13 Gapuna, itag-ayyo ti pusoyo ket agrag-okayo, ket kumpetkayo kadagiti katulagan nga inaramidyo.
14 Ituloymo ti espiritu ti kinaemma, ket agannadka iti kinapalangguad. Paragsakem ti kararuam iti asawam, ken iti dayag a dumtengto kenkuana.
15 Ituloymo ti agtungpal kadagiti bilinko, ket umawatkanto iti korona ti kinalinteg. Ket malaksid no aramidem daytoy, iti yanko dikanto makaumay.
16 Ket pudno, pudno, kunak kenka, a daytoy ti timekko nga agpaay iti amin. Amen.