Vaega 31
Faaaliga na tuuina mai e ala mai ia Iosefa Samita le Perofeta, ia Thomas B. Marsh, Setema 1830. O le taimi lea faatoa mavae atu ai lava se konafesi a le Ekalesia (tagai i le ulutala o le vaega 30). Sa uma ona papatisoina o Thomas B. Marsh i le amataga o le masina ma sa faauuina o se toeaina i le Ekalesia ae lei tuuina mai le faaaliga lenei.
1–6, Ua valaaulia Thomas B. Marsh e talai atu le talalelei ma ua tautino mai ia te ia le manuia o lona aiga; 7–13, Ua fautuaina o ia ia onosai, tatalo e lē aunoa, ma mulimuli i le Fesoasoani.
1 Tomasi, lo’u atalii e, amuia oe ona o lou faatuatua i la’u galuega.
2 Faauta, e tele puapuaga ua oo ia te oe ona o lou aiga; ae ui i lea, o le a Ou faamanuiaina oe ma lou aiga, ioe, au fanau laiti; ma e oo mai le aso o le a latou talitonu ma iloa ai le upumoni ma faatasi ai ma oe i la’u ekalesia.
3 Ia siitia a’e lou loto ma olioli, ona ua oo mai le itula o lau misiona; ma o le a tatala lou laulaufaiva, ma ia e folafola atu tala fiafia o le olioli tele i lenei tupulaga.
4 Ia e folafola atu mea ua faaali atu i la’u auauna, o Iosefa Samita, Le Itiiti. Ia amata ona e talai atu mai le taimi nei e agai i luma, ioe, e selesele i le fanua ua matua ua saunia e susunuina.
5 O lea, sasau atu lau selesaito ma lou agaga atoa, ma ua faamagaloina oe i au agasala, ma o le a faaee ia te oe fusisaito e tele i luga o lou tua, ona e agavaa lē e galue mo lona totogi. O le mea lea, o le a ola ai lou aiga.
6 Faauta, e moni Ou te fai atu ia te oe, alu ese mai ia te i latou mo nao se taimi itiiti, ma folafola atu la’u upu, ma o le a Ou saunia se nofoaga mo i latou.
7 Ioe, o le a Ou tatalaina loto o tagata, ma o le a latou talia oe. Ma o le a Ou faatuina se aulotu e ala i lou lima;
8 Ma ia e faamalosia i latou ma saunia i latou aua le taimi o le a faapotopotoina ai i latou.
9 Onosai i puapuaga, aua le faifai atu ia te i latou o e e faifai mai. Ia pulea lou aiga i le agamalu, ma ia tumau.
10 Faauta, Ou te fai atu ia te oe, ia avea oe ma fofo i le ekalesia, ae lē o le lalolagi, ona o le a latou lē talia oe.
11 Alu i lou ala i soo se mea Ou te loto i ai, ma o le a tuu atu ia te oe e le Fesoasoani le mea e te faia ma le mea e te alu i ai.
12 Tatalo e lē aunoa, ne’i e ulu atu i faaosoosoga ma aveesea ai lou taui.
13 Ia faamaoni e oo i le iuga, ma faauta, ua Ou faatasi ma oe. O nei upu ua lē a se tagata pe a ni tagata, ae ua a a’u, o Iesu Keriso lava, lou Togiola, e ala i le finagalo o le Tamā. Amene.