Benneg 32
Paltiing a naited kada Parley P. Pratt ken Ziba Peterson babaen ni Joseph Smith a Propeta, idi Oktubre 1830 (History of the Church, 1:118–120). Nakarikna dagiti elder iti nalaus a panagessem ken panagtarigagay kadagiti Lamanite, a nakaipadlesan dagiti bendision ti Simbaan a naadal iti Libro ni Mormon. Nagbanaganna, naaramid ti panagunnoy tapno ipakita ti Apo ti pagayatanna no nasken a maibaon dagiti elder iti dayta a panawen kadagiti tribu ti Indian iti Laud. Simmaruno ti paltiing.
1–3, Natudingan da Parley P. Pratt ken Ziba Peterson a mangasaba kadagiti Lamanite ken mangkuyog kada Oliver Cowdery ken Peter Whitmer, Jr.; 4–5, Nasken nga agkararagda tapno maawatanda dagiti nasantuan a kasuratan.
1 Ket ita maipanggep iti katulongak a ni Parley P. Pratt, adtoy, kunak kenkuana a bayat ti kaaddak pagayatak nga ipakdaarnanto ti ebangheliok ken adalennak, ken agbalin a naemma ken napakumbaba ti panagpuspusona.
2 Ket dayta nga intudingko kenkuana a sumurot kadagiti katulongak, a da Oliver Cowdery ken Peter Whitmer, Jun., a mapan kadagiti Lamanite iti langalang.
3 Ket sumurotto met kadakuada ni Ziba Peterson; ken sumurotakto met kadakuada ket addaak iti tengngada; ket siak ti mangibabaet kadakuada iti Ama, ket awanto ti agballigi a bumusor kadakuada.
4 Ket imutektekandanto dayta a naisurat, ket agpammarangdanto nga awan ti sabali a paltiing; ket kanayonto nga agkararagda tapno ipakitak ti isu met laeng para iti pannakaawatda.
5 Ket imutektekandanto dagitoy a balikas ket saanda a pagduaduaan, ket bendisionakto ida. Amen.