Benneg 36
Paltiing a naited ken ni Edward Partridge babaen ni Joseph Smith a Propeta, iti asideg ti Fayette, Nueva York, idi Disiembre 1830 (History of the Church, 1:131). (Kitaen ti paulo ti benneg 35.) Kinuna ti Propeta a “nasayaat a pagarigan ti kinarelihioso, ken maysa kadagiti naindaklan a tao ti Apo” ni Edward Partridge (History of the Church, 1:128).
1–3, Ipatay ti Apo dagiti dakulapna ken ni Edward Partridge babaen dagiti dakulap ni Sidney Rigdon; 4–8, Nasken a matudingan ti tunggal lalaki nga umawat iti ebanghelio ken iti kinasaserdote a mapan mangasaba.
1 Kastoy ti kinuna ti Apo a Dios, ti Naindaklan ti Israel: Adtoy, kunak kenka, katulongak nga Edward, a mabendisionanka, ket napakawankan kadagiti basolmo, ket matudinganka a mangikasaba iti ebangheliok a kas iti aweng ti trumpeta;
2 Ket ipatayko dagiti dakulapko kenka babaen dagiti dakulap ti katulongak a ni Sidney Rigdon, ket awatem ti Espirituk, ti Espiritu Santo, a kas iti Mangliwliwa, a mangisuro kenka kadagiti makapatalna a banag iti pagarian;
3 Ket ipakdaarmo iti napigsa a timek, a kunam: Hosanna, madaydayaw koma ti nagan ti kangatuan a Dios.
4 Ket ita itedko kenka daytoy nga akem ken bilin maipanggep iti amin a tao—
5 A kas iti kaadu ti umasideg kadagiti katulongak a da Sidney Rigdon ken Joseph Smith, Jun., a mangawat iti daytoy nga akem ken bilin, maordenan ken maibaon a mangikasaba iti agnanayon nga ebanghelio kadagiti pagilian—
6 A mangyararaw iti panagbabawi, nga agkuna: Isalakanyo ti bagbagiyo iti daytoy di mangikankano a kaputotan, ket rummuarkayo iti apuy, a makagura uray pay ti pagan-anay a namansaan iti lasag.
7 Ket maitedto daytoy a bilin kadagiti elder ti simbaanko, a tunggal tao nga umawat iti daytoy a sipupuso mabalin a maordenan ken maibaon, a kas iti nasaokon.
8 Siak ni Jesucristo, ti Anak ti Dios; gapuna, patibkerenyo dagiti lomoyo ket kellaatto nga umayak iti templok. Pudno a kasta. Amen.