1 Lix k’anjel, ut lix k’uub’anb’il k’oxlahom, ut li rajom li Dios ink’a’ naru nasache’ xwankil, chi moko naru na’oso’.

2 Xb’aan naq li Dios ink’a’ nab’eek chiru li yokotzinb’il b’e, chi moko naxjal xb’e sa’ li nim uq’ej chi moko sa’ li tz’e, chi moko naxjal rib’ rik’in li k’a’ru xye, jo’kan naq tiik ru li ruq’ xb’e, ut lix b’e wan sa’ junaj chi sutam li wan chi junelik.

3 Chijultiko’q, chijultiko’q aawe naq maawa’ lix k’anjel li Dios li nasache’ xwankil, a’b’an lix k’anjeleb’ li winq;

4 Xb’aan naq us ta naru junaq winq chixk’ulb’al k’iila k’utb’esinb’il na’leb’, ut chi wank xwankil chixb’aanunkil k’iila xninqal ru k’anjel, wi b’an naxnima rib’ rik’in tz’aqal lix metz’ew, ut naxk’e chi yal jo’maajo’ li na’leb’ k’eeb’il xb’aan li Dios, ut naxtaaqe li naxye li rajom a’an ut li ratawom lix tib’el, tento taat’ane’q ut tixk’am chaq sa’ xb’een li eeqajuuk xb’aan jun Dios tiik xch’ool.

5 K’e reetal, k’eeb’il chaq sa’ aawuq’ li k’a’aq re ru a’in, a’ut k’a’jo’ xkawil li taqlanb’ilat wi’; ut chijultiko’q ajwi’ aawe li k’a’ru yeechi’inb’il aawe, wi ink’a’ nakaq’et.

6 Ut k’e reetal, k’a’jo’ naq kok’ aj xsa’ kaq’et lix taqlahom ut lix chaq’rab’ li Dios, ut katkana chi q’unb’esinb’il aach’ool xb’aaneb’ li winq.

7 Xb’aan naq k’e reetal, ink’a’ raj kaxuwaheb’ ru li winq wi’chik chiru li Dios. Us ta eb’ li winq neke’xk’e chi yal jo’maajo’ li na’leb’ k’eeb’il xb’aan li Dios, ut xik’ neke’ril li raatin—

8 Laa’at b’an tento raj naq tiikat chaq chi paab’ank; ut a’an kixye’ raj lix tel ut katxtenq’a raj chiru chixjunil lix lochb’il tzimaj li xik’ na’ilok aawe; ut kiwan raj aawik’in sa’ li junjunq chi rahil kutan.

9 K’e reetal, laa’at aj Jose, ut kisik’e’ aawu re xb’aanunkil lix k’anjel li Qaawa’, a’b’an sa’ xk’ab’a’ li q’etok aatin, wi ink’a’ nakawil aawib’ tatt’ane’q.

10 A’ut chijultiko’q aawe, li Dios a’an aj uxtaan; jo’kan ut, jal aak’a’uxl chirix li k’a’ru xab’aanu li moko naxk’am ta rib’ rik’in li taqlahom kink’e aawe, ut toj sik’b’il aawu, ut b’oqb’ilat wi’chik sa’ li k’anjel;

11 Wi ink’a’ nakab’aanu a’in, tatq’axtesiiq ut tatwanq jo’ chanru li jun ch’ol chik chi winq, ut maak’a’aq chik aamaatan.

12 Ut naq kaq’axtesi li k’a’ru k’eeb’il chaq aawilob’aal ut aawankil xb’aan li Dios re xjaltesinkil ru, kaq’axtesi li k’a’ru loq’ sa’ ruq’ jun li winq aj maak,

13 Li xk’ehok chi yal jo’maajo’ li na’leb’ k’eeb’il xb’aan li Dios, ut xq’et li k’a’ru q’axal loq’ li kixyeechi’i chaq chiru li Dios, ut xwan chi chapcho chiru tz’aqal lix k’oxlahom, ut xnima rib’ rik’in tz’aqal lix na’leb’.

14 Ut a’in li ajom li kisach wi’ chawu chiru jarub’aq kutan li k’eeb’il chaq aawe—

15 Xb’aan naq laa’at kakanab’ li na’leb’ k’eeb’il xb’aan laj b’eresinel aawe chi yeq’iik chalen chaq sa’ xtiklajik.

16 A’b’anan lin k’anjel taaxik chi uub’ej, xb’aan naq jo’ chanru naq li na’leb’ chirix jun aj Kolonel ak xchal sa’ li ruchich’och’, rik’in li yaal ke’xch’olob’ laj Judio, chi jo’kan ajwi’ naq taachalq li na’leb’ chirix jun aj Kolonel rik’in lin tenamit—

17 Ut rik’ineb’ laj Nefita, ut eb’ laj Jakobita, ut eb’ laj Josefita, ut eb’ laj Tzoramita, rik’in li yaal ke’xch’olob’ lix yuwa’eb’—

18 Ut li yaal a’in ke’xch’olob’ k’amb’ilaq chi nawe’k xb’aaneb’ laj Lamanita, ut eb’ laj Lemuelita, ut eb’ laj Ismaelita, li ke’laj chi maak’a’eb’ xpaab’aal xb’aan lix maa’usilaleb’ lix yuwa’eb’, li kixkanab’ li Qaawa’ chixsachb’aleb’ laj Nefita li ras riitz’ineb’, sa’ xk’ab’a’ lix maa’usilaleb’ ut lix tz’eqb’eetalileb’.

19 Ut choq’ re li ajom ajwi’ a’in ke’kole’ rix li perel ch’iich’ a’in, li wan wi’ li tz’iib’anb’il esil a’in—re naq taatz’aqloq ru lix yeechi’ihom li Qaawa’, li kixyeechi’i reheb’ lix tenamit;

20 Ut re naq eb’ laj Lamanita te’k’ame’q chixnawb’al chirixeb’ lix yuwa’eb’, ut re naq te’xnaw lix yeechi’ihom li Qaawa’, ut re naq te’xpaab’ li evangelio ut te’xkanab’ rib’ chiru lix k’ulub’ejil li Jesukristo, ut te’nimob’resiiq xloq’al rik’in xpaab’ankil lix k’ab’a’, ut re naq rik’in xjalb’aleb’ xk’a’uxl te’ruuq chi kole’k. Amen.