1 Ana mwakuri, ao ana iango, ao ana waaki te Atua a aki kona n totokoaki, ke n akea bonganaia.

2 Bwa te Atua e aki nakonako ni kawai aika a bwaoua, e aki rairaki nakon te atai ke te maing, e aki bibitaki man te bwai are e a tia n taekinna, ngaia are a eti kawaina, ao kawaina aiaron te mronron ae akea tokina.

3 Uringnga, uringnga bwa tiaki ana mwakuri te Atua ae e totokoaki, bwa bon aia mwakuri aomata;

4 Bwa e ngae ngke a mwaiti kaotioti ae e karekei te aomata, ao ni iai irouna te mwaaka ni karaoi mwakuri aika mwaiti aika korakora, ma ngkana e kamoamoa n oin korakorana, ao ni kaakeai bonganan ana reirei te Atua, ao n ira ana kairiiri oin nanona ma tangiran bwain te rabwata, e na bon bwaka ao man karekea ana kabomwi te Atua ae motiraoi.

5 Noria, ko a tia n onimakinaki ni bwai aikai, ma ai matoara riki tuua ake ko anganaki; ao uringi naba taian berita ake a tia ni karaoaki nakoim, ngkana ko aki urui tuua akanne.

6 Ao noria, ai mwaitira am tai ae ko urui ana tua te Atua, ao n reitinako ni butimwaai aia kairoro aomata.

7 Bwa, nooria, ko na riai n aki maaka riki te aomata nakon te Atua. E ngae ngke aomata a kaakeai bongan ana reirei te Atua, ao n ribai ana taeka—

8 Ma ngke arona bwa ko kakaonimaki; ao e na bon arora baina ao man boutokaiko ni kaitarai nako ana kai ni katebe aika ura te kairiribai; ao e na bon raoniko n am tai ni kangaanga nako.

9 Nooria, ngkoe ae Iotebwa, ao ko a tia n rineaki bwa ko na karaoa ana mwakuri te Uea, ma ibukin riaoan te tua, ngkana ko aki taratara ao ko na bon bwaka.

10 Ma uringnga, bwa te Atua e nanoanga; ngaiare, raira nanom man te bwai ae ko a tia ni karaoia are kaitara te tua are I a tia n anganiko, ao ko bon teimatoa naba n rineaki, ao ni manga weteaki riki nakon te mwakuri;

11 Ngkana ko aki karaoa aei, ko na tiku n tii ngkoe ao n riki n aia aroia aomata tabeman, ao man akea te bwai n tituaraoi nakoim.

12 Ao ngkana ko anganako te bwai are e anganiko te Atua ni mamata ao te mwaaka n rairairi, ko anganako te bwai ae tabu nako nanon bain te aomata ae buakaka,

13 Are e kaakeai bonganan ana reirei te Atua, ao n tia n urui tenaan berita aika moan te tabu are e karaoi i matan te Atua, ao n tia ni katan i aan oin ana iango ao ni kamoamoa n oin wanawanana.

14 Ao aio bukin ae e bua ma iroum te tibwanga n te tai anne—

15 Bwa ko a tia ni kariaia ana reirei am tia kairiiri bwa a na toubekaaki mai moana.

16 E ngae n anne, e na bon waaki nako au mwakuri, n ai aekakin ae e a tia n roko ataakin te Tia Kamaiu n te aonaba, rinanon aia koaua taian Iutaia, ao aiaron naba rokon ataakin te Tia Kamaiu nakoia au aomata—

17 Ao nakoia Nibwaite, ao Iakobwaite, ao Iotebwaite, ao Tioramwaite, rinanon aia koaua tamaia—

18 Ao e na roko ataakin te koaua aei nakoia Reimwanaite, Remueraite, ao Itimaeraite, ake a kerikaaki n aia aki kakoaua bukin aia bure tamaia, are e a tia ni kariaia te Uea bwa a na kamaunaia tariia ake Nibwaite, bukin aia buakaka ao aia mwakuri aika bati n ribaki.

19 Ao aio raoi bukin ae a kaawakinaki taian bwaatua aikai, ake kanoana taian rongorongo aikai—bwa e aonga ni koro bukin ana berita te Uea, are e a tia ni karaoia nakoia ana aomata;

20 Ao bwa aonga taian Reimwanaite ni karekea ataakin taekan tamaia, ao n atai ana berita te Uea, ao bwa aonga ni kakoaua te euangkerio ao n onimakini ana mwakuri Iesu Kristo aika raoiroi, ao man kamimitongaaki rinanon te onimaki n arana, ao man rinanon aia rairannano a na bon kamaiuaki. Amen.