Benneg 41
Paltiing a naited iti Simbaan babaen ni Joseph Smith a Propeta, iti Kirtland, Ohio, idi 4 ti Pebrero 1831 (History of the Church, 1:146–147). Napartak ti yaadu dagiti kameng iti Sanga ti Simbaan iti Kirtland iti daytoy a panawen. Kas panangirugina iti daytoy a paltiing insurat ti Propeta, “Sigaganetget dagiti kameng a mangaramid iti pagayatan ti Dios, iti pannakaammoda, nupay adda dagiti karkarna a tignay ken sinsinan nga espiritu a nangserrek kadakuada…[ket] inted ti Apo iti Simbaan ti sumaganad” (History of the Church, 1:146–147).
1–3, Iturong dagiti elder ti Simbaan babaen ti espiritu ti pammaltiing; 4–6, Awaten ken salimetmetanto dagiti pudno a disipulo ti paglintegan ti Apo; 7–12, Nainaganan ni Edward Partridge nga obispo iti Simbaan.
1 Imdengan ken denggenyo, O tattaok, kinuna ti Apo ken Diosyo, dakayo a pakaragsakak a bendisionan iti kaindaklanan amin a bendision, dakayo a dumngeg kaniak; ket ilunodko dagiti di dumngeg kaniak, a nangibaga a mamati iti naganko, iti kadagsenan iti amin a lunod.
2 Imdenganyo, O dakayo nga elder ti simbaanko a tinudingak, adtoy, itedko kadakayo ti bilin, nga ummongenyo ti bagbagiyo nga agkaykaysa iti balikasko;
3 Ket babaen ti kararag ti pammatiyo awatenyonto ti paglintegak, tapno ammoyo ti mangituray iti simbaanko ket adda ti amin nga umno iti imatangko.
4 Ket siakto ti agturayyo no umayak; ket adtoy, umayak a di agtaktak, ket makitayonto ti pannakaitalimeng ti paglintegak.
5 Isu a mangawat iti paglintegak ken mangaramid, isu ti disipulok; ket isu nga agkuna nga immawat ngem dina aramiden, isu ti diak disipulo, ket mapapanawto kadakayo;
6 Ta saan nga umno a maited dagiti banag nga agpaay kadagiti ubbing ti pagarian kadagiti saan a maikari, wenno kadagiti aso, wenno dagiti perlas a maipuruak kadagiti baboy.
7 Ket manen, umno a ti katulongak a ni Joseph Smith, Jun., maibangonan iti balay, a pagyanan ken pagipatarusanna.
8 Ket manen, umno nga agyan ti katulongak a ni Sidney Rigdon no ipapanna a pagsayaatanna, no la ketdi ta tungpalenna dagiti bilinko.
9 Ket manen, tinudingak ti katulongak a ni Edward Partridge; ket itedko ti bilin, a nasken a matudingan babaen ti timek ti simbaan, ket maordenan nga obispo iti simbaan, a mangpanaw iti pamastrekanna ket ibubosna ti amin a panawenna nga agtrabaho iti simbaan;
10 A mangkita iti amin a banag kas ituding kenkuana dagiti paglintegak iti aldaw a pannangtedko kadakuada.
11 Ket gapu daytoy iti kinatarnaw ti pusona kaniak, ta kasla iti daydi nagkauna a Natanael, nga awan kenkuana ti kinasikap.
12 Naited kadakayo dagitoy a balikas, ket natarnawda kaniak; gapuna, agannadkayo iti panangimetyo, ta sungbatanto ida dagiti kararuayo iti aldaw a panangukom. Pudno a kasta. Amen.