Vaega 41
Faaaliga na tuuina mai e ala mai ia Iosefa Samita le Perofeta, i le Ekalesia, i Katelani, Ohaio, i le aso 4 o Fepuari, 1831. O lenei faaaliga o loo faatonu mai ai le Perofeta ma toeaina o le Ekalesia ina ia tatalo mo le mauaina o “tulafono” a le Atua (tagai i le vaega 42). Ua faatoa taunuu lava Iosefa Samita i Katelani mai Niu Ioka, ma o Leman Copley, o se tagata o le Ekalesia e nofo latalata ane i Thompson, Ohaio, na “talosaga ane ia Uso Iosefa ma Sini [Rikitone] … e nonofo faatasi ma ia ma o le a ia tuuina atu mo i laua fale ma meaai.” O le faaaliga lenei ua faamanino mai ai le mea e tatau ona nonofo ai Iosefa ma Sini, ma faapea foi ona valaauina ai Eteuati Paterika e avea ma ulua’i epikopo a le Ekalesia.
1–3, Ia taitai e toeaina le Ekalesia e ala i le agaga o faaaliga; 4–6, O soo moni latou te talia ma tausia le tulafono a le Alii; 7–12, Ua tofia Eteuati Paterika o se epikopo i le Ekalesia.
1 Faalogo mai ia ma faafofoga mai, outou e o o’u tagata, ua fetalai mai ai le Alii ma lo outou Atua, outou o e ua ou fiafia e faamanuia i le faamanuiaga silisili o faamanuiaga uma, outou o e ua faalogo mai ia te a’u; ma o outou o e ua lē faalogo mai ia te a’u, i latou ia o e na latou ta’uta’u lo’u igoa, o le a Ou fetuuina, i le fetuu sili atu ona mamafa o fetuu uma.
2 Faalogo mai ia, outou e toeaina o la’u ekalesia o e ua Ou valaaulia, faauta Ou te tuu atu ia te outou se poloaiga, ia outou faapotopoto faatasi outou lava ina ia outou autasi e faatatau i la’u upu;
3 Ma o le tatalo o lo outou faatuatua o le a outou maua ai la’u tulafono, ina ia outou iloa le ala e pulea ai la’u ekalesia ma ina ia sa’o mea uma i o’u luma.
4 Ma o le a avea A’u ma o outou pule pe a Ou alu atu; ma faauta, e vave ona Ou alu atu, ma ia outou vaai ia tausia la’u tulafono.
5 O ia o lē e taliaina la’u tulafono ma faia, o ia lava lea o lo’u soo; ma o ia o lē e fai mai ua ia taliaina ae ua ia lē faia, o ia lava lea e lē o so’u soo, ma ia tuli i fafo mai totonu o outou;
6 Ona e lē tatau ona tuu atu o mea e ou e le fanau o le malo ia te i latou o e ua lē agavaa, pe i ’ulī, pe lafo atu penina i luma o meatuaolō.
7 O lenei foi, e tatau i la’u auauna o Iosefa Samita, Le Itiiti, ona maua se fale e fausia, e nofo ai ma faaliliu.
8 O lenei foi, e tatau i la’u auauna o Sini Rikitone ona ola e tusa ai ma le mea e foliga mai ua lelei ia te ia, e tusa ai ma lana tausiga o a’u poloaiga.
9 O lenei foi, ua Ou valaauina la’u auauna o Eteuati Paterika; ma Ou te tuu atu se poloaiga, e tatau ona tofia o ia i le leo o le ekalesia, ma faauu o se epikopo mo le ekalesia, e tuu ana oloa ma faaaoga lona taimi atoa i galuega a le ekalesia.
10 E vaaia mea uma e pei ona o le a tofia ia te ia i a’u tulafono i le aso Ou te tuu atu ai i latou.
11 Ma ua faia lenei mea ona ua mama lona loto i o’u luma, ona ua faapei o ia o Natanielu o anamua, o lē ua leai se pepelo o i ai.
12 O nei upu ua tuu atu ia te outou, ma ua mama i latou i o’u luma; o le mea lea, ia faaeteete i le ala tou te manatu ai i ai, ona o le a tali i latou i luga o o outou agaga i le aso o le faamasinoga. E faapea lava. Amene.