Mwakoro 47
Kaotioti ae kaotaki rinanon Iotebwa Timiti te Burabeti, i Kirtland, Ohio, ni Maati 8, 1831. John Whitmer, are e tia ni beku bwa te kiraka nakon te Burabeti, e iremwe ni kaeka ngke e moan tuangaki bwa e na beku bwa te tia koroi rongorongon te Ekaretia ao te tia tau mwin rongorongo, n onea mwin Oliver Cowdery. E korea ae kangai, “I aki kan karaoia ma I ataia bwa e na karaoaki nanon te Uea, ao ngkana e tangiria, I kantaningaia bwa e na kaotaki rinanon Iotebwa te Tia Mamata.” I mwin reken te kaotioti aei iroun Iotebwa Timiti, John Whitmer e butimwaia ao e beku n nakoana are rineaki nako iai.
1–4, E rineaki John Whitmer bwa e na korei rongorongon te Ekaretia ao ni koroboki ibukin te Burabeti.
1 Nooria, e riai irou bwa au tia mwakuri ae John e na teimatoa ni korei ao ni kawakini taian rongorongo, ao ni buokiko, au tia mwakuri ae Iotebwa, ni korei bwaai ni kabane ake ko na anganaki, ni karokoa e weteaki nakon mwakuri tabeua.
2 E koaua ae I a manga tuangko bwa e kona naba n tabekarake bwanaana n taian botaki, n taai aika a riai.
3 Ao I a manga tuangko bwa e na rineaki bwa e na kawakini rongorongon te ekaretia n taai nako; bwa I a tia n rinea Oliver Cowdery nakon te nakoa teuana.
4 Mangaia are, e na anganaki, ngkana e teimatoa ni kakaonimaki, mai iroun te Tia Karaunano, bwa e na korei bwai aikai. Eng. Amen.