Vaega 47
Faaaliga na tuuina mai e ala mai ia Iosefa Samita le Perofeta, i Katelani, Ohaio, i le aso 8 o Mati, 1831. O Ioane Uitimera, o le sa auauna muamua o se failautusi i le Perofeta, na muamua tau i ai sina musu ina ua talosagaina o ia e auauna o se tusitalafaasolopito ma se tusitalafaamaumau, e suitulaga ia Oliva Kaotui. Na ia tusia faapea, “Atonu e sili lo’u faatali ae saili le finagalo o le Alii, ma afai e finagalo ai o Ia, ou te mana’o ina ia faaalia mai e ala mai ia Iosefa le Talifaaaliga.” Ina ua mae’a ona maua e Iosefa Samita lenei faaaliga, na talia ai loa ma auauna atu Ioane Uitimera i lona tofiga na faauu ai o ia.
1–4, Ua tofia Ioane Uitimera e tausia le talafaasolopito o le Ekalesia ma ia tusi mo le Perofeta.
1 Faauta, ua ao ia te a’u ona tusi ma tausia e la’u auauna o Ioane se talafaasolopito faia pea, ma fesoasoani ia te oe, la’u auauna, Iosefa, i le tusia o mea uma o le a tuu atu ia te oe, seia oo ina valaauina o ia i ni isi tiute.
2 O lenei foi, e moni Ou te fai atu ia te oe, e mafai foi ona ia siitia a’e lona leo i sauniga-lotu, i soo se taimi e tatau ai.
3 O lenei foi, Ou te fai atu ia te oe ia tofia o ia na te tausia e lē aunoa le talafaamaumau ma le talafaasolopito o le ekalesia; aua ua Ou tofia Oliva Kaotui i se isi tofi.
4 O le mea lea, o le a tuu atu ai ia te ia, e tusa ai ma lona faamaoni, e le Fesoasoani, na te tusia nei mea. Ia faapea lava. Amene.