Mwakoro 55
Kaotioti ae kaotaki rinanon Iotebwa Timiti te Burabeti nakon William W. Phelps, i Kirtland, Ohio, n Tuun 14, 1831. William W. Phelps, te tia booretia te boki, ao ana utu a tibwa roko i Kirtland, ao te Burabeti e ukoukora te Uea ibukin rongorongona.
1–3, William W. Phelps e weteaki ao n rineaki bwa e na bwabwetitoaki, bwa e na katabuaki bwa te unimwaane, ao e na tataekina te euangkerio; 4, E na korei naba booki ibukiia ataei n ana reirei te Ekaretia; 5–6, E na mwananga nako Missouri, are ana aono ni mwakuri.
1 Nooria, e taku te Uea nakoim, au tia mwakuri ae William, eng, are Uean te aonaba ni kabuta, ko a weteaki ao n rineaki; ao i mwin bwabetitoakim n te ran, are ngkana ko karaoia ni mata teuana nakon mimitongiu, ko na karekea kamaunan am bure ao butimwaean te Tamnei ae Tabu man te katoka bai;
2 Ao i mwina ko na katabuaki ni bain au tia mwakuri ae Iotebwa Timiti te Ataei bwa te unimwaane n te ekaretia aei, n tataekina te rairannano ao kamaunaan bure man te bwabetito n aran Iesu Kristo, Natin te Atua ae maiu.
3 Ao ane ko na katoka baim i aoia, ngkana a raraoma imatau, ko na karekea te mwaaka n anganiia te Tamnei ae Tabu.
4 Ao teuana riki, ko na katabuaki bwa ko na buoka au tia mwakuri ae Oliver Cowdery ni karaoa te mwakuri ni booreeti, ao n rinei ao ni korei booki ibukin reirei n te ekaretia aei, bwa aonga naba ataei aika uarereke ni karekei reirei imatau are e kakukurei irou.
5 Ao e koaua ae I a manga tuangko, bwa ibukin aio ko na mwananga ma au tia mwakuri aika Iotebwa Timiti te Ataei ao Sidney Rigdon bwa ko aonga ni kateitei n abam ni bwaibwai ni karaoa te mwakuri aei.
6 Ao teuana riki, e riai au tia mwakuri ae Joseph Coe ni mwananga naba ma ngaiia. Nikirana a na kaotaki rimwi, ni kaineti ma au kantaninga. Amen.