Vaega 56
Faaaliga na tuuina mai e ala mai ia Iosefa Samita le Perofeta, i Katelani, Ohaio, i le aso 15 o Iuni, 1831. O lenei faaaliga ua aoaiina ai Ezra Thayre ona o le lē usitaiaina o se faaaliga na tuuina mai muamua (o le “poloaiga” o loo faasino i ai i le fuaiupu e 8), lea na maua e Iosefa Samita mo ia, o loo faatonuina ai Thayre e tusa ma ona tiute faatatau i le faatoaga a Frederick G. Williams lea sa nofo ai o ia. O lea faaaliga ua aveesea ai foi le valaauga o Thayre ina ia malaga atu i Misuri faatasi ma Thomas B. Marsh (tagai i le vaega 52:22).
1–2, E tatau i le Au Paia ona ave i luga a latou satauro ma mulimuli i le Alii ina ia latou maua le faaolataga; 3–13, O le Alii e poloaia ma aveesea, ma o e e lē usiusitai e lafo ese; 14–17, Oi talofa i e e mauoa o e latou te lē fesoasoani i e ua matitiva, ma oi talofa i e ua matitiva o e e lē momomo o latou loto; 18–20, Amuia e ua matitiva o e ua mama i le loto, ona o le a fai mo latou tofi le lalolagi.
1 Faalogo mai ia, outou e tagata o e ua ta’ua lo’u igoa, ua fetalai mai ai le Alii lo outou Atua; aua faauta, ua mumū a’e lo’u ita e faasaga i e e fouvale, ma o le a latou iloa lo’u lima ma lo’u ita, i le aso o le oo atu ma le sauā i luga o atunuu.
2 Ma o ia o lē na te lē ave i luga lana satauro ma mulimuli mai ia te a’u, ma tausi i a’u poloaiga, o ia lava lea o le a lē faaolaina.
3 Faauta, o A’u, o le Alii, e poloai atu; ma o ia o lē e lē usiusitai o le a vavae ese i lo’u lava taimi e tatau ai, pe a uma ona Ou poloai atu ae ua soli le poloaiga.
4 O le mea lea, o A’u, o le Alii, e poloaia ma aveesea, e pei ona lelei ia te a’u; ma o nei mea uma o le a pa’ū i luga o ulu o e e fouvale, ua fetalai mai ai le Alii.
5 O le mea lea, Ou te aveesea ai le poloaiga na tuu atu i a’u auauna o Thomas B. Marsh ma Ezra Thayre, ma tuu atu se poloaiga fou i la’u auauna o Thomas, ia alu vave atu lana malaga i le laueleele o Misuri, ma ia alu atu foi la’u auauna o Selah J. Griffin faatasi ma ia.
6 Aua faauta, ua Ou aveesea le poloaiga na tuu atu i a’u auauna o Selah J. Griffin ma Newel Knight, ona o le ua maaa o lo’u nuu o loo i Tomasone, ma a latou fouvalega.
7 O le mea lea, ia tuu atu i la’u auauna o Newel Knight e nofo pea faatasi ma i latou; ma o le toatele o i latou o e ua agasalamo i o’u luma e fia o, e mafai ona o, ma taitai atu e ia i le laueleele ua Ou tofia.
8 O lenei foi, e moni Ou te fai atu ia te outou, e ao i la’u auauna o Ezra Thayre ona salamo i lona faamaualuga, ma i lona manatu faapito, ma ia usiusitai i le muai poloaiga na Ou tuuina atu ia te ia e uiga i le nofoaga o loo nofo ai o ia.
9 Ma afai e faia e ia lenei mea, ona o le a leai ni vaevaega e faia i le laueleele, o le a tofia pea o ia e alu i le laueleele o Misuri;
10 A lē o lea, ia tuu atu ia te ia le tupe na ia totogi mai, ma alu ese mai le nofoaga, ma ia vavae ese o ia mai la’u ekalesia, ua fetalai mai ai le Alii le Atua o ’au;
11 Ma e ui ina mavae atu le lagi ma le lalolagi, o le a lē mavae atu lava nei upu, ae o le a faataunuuina.
12 Ma afai e tatau ai i la’u auauna o Iosefa Samita, Le Itiiti, ona ia totogi atu le tupe, faauta, o A’u, o le Alii, o le a Ou toe totogi atu ia te ia i le laueleele o Misuri, ina ia mafai ona toe tauia i latou o e na ia maua mai ai, e tusa ma mea ua latou faia;
13 Aua o le a latou maua e tusa ma mea ua latou faia, i laueleele lava ua fai mo o latou tofi.
14 Faauta, ua faapea ona fetalai mai o le Alii i lo’u nuu—atonu e tele mea ua ia te outou e fai ma salamo ai; aua faauta, ua oo mai i luga ia te a’u a outou agasala, ma ua lē faamagaloina, ona ua outou saili e taupulepule i o outou lava ala.
15 Ma ua lē faamalieina o outou loto. Ma ua outou lē usiusitai i le upumoni, ae ua outou fiafia i le amiolētonu.
16 Oi talofa ia te outou tagata mauoa, o e ua outou lē tuu atu ni a outou mea i e ua matitiva, ona o le a faaeleeleaina o outou agaga ia outou oa; ma o la outou auega lenei i le aso e asiasi mai ai, ma le aso o le faamasinoga, ma le aso o le toatamai: Ua mavae le seleselega, ua iu le tautaumafanafana, ae ua lē faaolaina lo’u agaga!
17 Oi talofa ia te outou tagata matitiva, o e ua lē momomo o latou loto, o e ua lē agasalamo o latou agaga, ma e ua lē maoona o latou manava, ma o e ua lē taofia o latou lima mai le fetagofi atu i mea a isi tagata, o e o o latou mata ua tumu i le matape’ape’a, ma o e ua mumusu e galulue i o latou lava lima!
18 Ae amuia e ua matitiva ua mama i le loto, o e ua momomo o latou loto, ma e ua agasalamo o latou agaga, ona o le a latou vaai i le oo mai o le malo o le Atua i le mana ma le mamalu tele mo lo latou laveaiina; ona o le a mo i latou le tamaoaiga o le lalolagi.
19 Aua faauta, o le a afio mai le Alii, ma o le a faatasi ma ia lana taui, ma o le a ia tauia tagata uma taitoatasi, ma o le a olioli e ua matitiva;
20 Ma o le a fai ma tofi o a latou tupulaga le lalolagi mai lea tupulaga i lea tupulaga, e faavavau ma faavavau lava. Ma o lenei Ou te faaiu le tautala atu ia te outou. E faapea lava. Amene.