1 Faauta, Ou te fai atu ia te oe, ona ua manao la’u auauna o Matini Harisi i se molimau mai lo’u lima, e faapea ua ia te oe, o la’u auauna, o Iosefa Samita, Le Itiiti, papatusi na e molimau ma tautino atu na e maua mai ia te a’u;

2 Ma o lenei, faauta, o le mea lenei ia e fai atu ia te ia—o ia o lē na fetalai mai ia te oe, na fai mai ia te oe: O A’u, o le Alii, o le Atua, ma na Ou tuu atu ia te oe, o la’u auauna o Iosefa Samita, Le Itiiti, nei mea, ma ua Ou poloaiina oe e tatau ona e tulai o se molimau o nei mea;

3 Ma sa Ou faia ia e ulu mai i se feagaiga faatasi ma a’u, o le a e lē faaalia atu ia mea vagana ai ia i latou na o tagata o e na Ou poloaiina ai oe; ma ua leai sau pule i luga o ia mea vagana ai ua Ou tuu atu ia te oe.

4 Ma ua ia te oe se meaalofa e faaliliu ai papatusi; ma o le meaalofa muamua lenei Ou te faaee atu i ou luga; ma ua Ou poloaiina ia leai se isi meaalofa e tatau ona e manatu i ai seia oo ina faataunuuina lo’u faamoemoe i lenei mea; ona e leai se isi meaalofa Ou te tuu atu ia te oe seia maea.

5 E moni, Ou te fai atu ia te oe, o le a oo mai le ōi i e o nonofo i le lalolagi pe afai latou te lē faalogo mai i a’u upu;

6 Aua a mavae nei o le a faauuina oe ma e alu atu ma avatu a’u upu i le fanauga a tagata.

7 Faauta, afai latou te lē talitonu i a’u upu, o le a latou lē talitonu ia te oe, la’u auauna e, Iosefa, e tusa pe a na mafai ona e faaali atu ia te i latou mea uma ua Ou tuu atu ia te oe.

8 E, lenei tupulaga e lē talitonu ma le ua maaa—ua sasao a’e lo’u ita e faasaga ia te i latou.

9 Faauta, e moni Ou te fai atu ia te oe, na Ou faasaoina mea na ua Ou faatuatuaina atu ia te oe, la’u auauna, Iosefa, mo se faamoemoega poto ua ia te a’u, ma o le a faailoa atu i tupulaga o lumanai;

10 Ae o le tupulaga lenei o le a latou maua la’u upu e ala atu ia te oe;

11 Ma e faaopoopo i lau molimau, le molimau a le toatolu o a’u auauna, o e o le a Ou valaaulia ma faauuina, o e o le a Ou faaali atu i ai nei mea, ma o le a latou o atu ma a’u upu e tuu atu e ala atu ia te oe.

12 Ioe, o le a latou iloa ma le mautinoa ua moni nei mea, ona o le a Ou tautinoina atu ia te i latou mai le lagi.

13 O le a Ou tuu atu ia te i latou le mana e mafai ai ona latou vaai ma tagatagai i nei mea e pei ona i ai;

14 Ma e leai ni isi i totonu o lenei tupulaga e ese mai ai o le a Ou tuu atu i ai lenei mana, ia mauaina lenei molimau, i le amataga lenei o le fanae ma le oo mai o la’u ekalesia i fafo na i le vao—ua manino e pei o le masina, ma susulu e pei o le la, ma matautia e pei o se autau ua i ai ni tagavai.

15 Ma o le a Ou auina atu le mau a molimau e toatolu e uiga i la’u upu.

16 Faauta foi, ai se e talitonu i a’u upu, o i latou ia o le a Ou asiasi atu i ai ma le faaaliga a lo’u Agaga; ma o le a fanauina i latou ia te a’u, i le vai lava ma le Agaga—

17 Ma e ao ina outou faatalitali pea laitiiti teisi, ona e lei faauuina outou—

18 Ma o le a alu atu foi la latou molimau mo le tausalaina o lenei tupulaga pe afai latou te faamaaa o latou loto e faasaga ia te i latou;

19 Ona o le a oo atu se sasa faatafunaga ia i latou o e o nonofo i le lalolagi, ma o le a faaauau ona sasaa mai lea taimi i lea taimi, pe afai latou te lē salamo, seia oo ina gaogao le lalolagi, ma ua susunuina e ua nonofo ai ma matua faaumatia lava i le pupula o lo’u oo mai.

20 Faauta, Ou te tau atu ia te oe nei mea, e pei lava foi ona sa Ou tau atu i tagata e uiga i le faafanoga o Ierusalema; ma o le a faamaonia la’u ’upu i le taimi nei e pei lava ona sa faamaonia e oo mai i le taimi nei.

21 Ma o lenei Ou te poloai atu ia te oe, la’u auauna Iosefa, ia e salamo ma savali sao atili i o’u luma, ma ia e lē toe tuu atu i faatauanauga a tagata;

22 Ma ia e tumau i le tausiga o poloaiga ua Ou poloaiina ai oe; ma afai e te faia lenei mea, faauta Ou te tuu atu ia te oe le ola e faavavau, e tusa pe fasiotia oe.

23 Ma o lenei, Ou te toe tautala atu ia te oe, la’u auauna Iosefa, e uiga i le tagata o lē ua manao i le molimau—

24 Faauta, Ou te fai atu ia te ia, ua ia faamaualugaina o ia lava ma ua lē lava ona ia faamaualalo o ia lava i o’u luma; ae afai e ifo o ia i lalo i o’u luma, ma faamaualalo o ia lava i le tatalo malosi ma le faatuatua, i le faamaoni o lona loto, ona Ou tuu atu lea ia te ia se vaaiga o mea ua manao o ia e vaai i ai.

25 Ma ona ia fai atu lea i tagata o lenei tupulaga: Faauta, ua Ou vaai i mea na faaali mai e le Alii ia Iosefa Samita, Le Itiiti, ma ua Ou iloa ma le mautinoa ua moni i latou, aua ua Ou vaai i ai, ona sa faaali mai i latou ia te a’u i le mana o le Atua a e lē o le tagata.

26 Ma o A’u o le Alii Ou te poloai atu ia te ia, la’u auauna lea o Matini Harisi, ia lē toe fai atu e ia ni isi upu ia te i latou e uiga i ia mea, vagana ai le fai atu o ia: Ua Ou vaai i ia mea, ma sa faaali mai i latou ia te a’u i le mana o le Atua; ma o upu ia ia fai atu e ia.

27 Ae afai e faafiti e ia lenei mea o le a soli e ia le feagaiga na ia osifeagaiga muamua ai ma a’u, faauta foi, o le a tausalaina o ia.

28 Ma o lenei, vagana ai ua faalotomaualalo e ia o ia lava ma tautau mai ia te a’u mea sese na ia faia, ma osifeagaiga ma a’u o le a ia tausia a’u poloaiga, ma faatino le faatuatua mai ia te a’u, faauta, Ou te fai atu ia te ia, o le a lē maua e ia ni vaaiga faapena, ona o le a Ou lē tuuina atu ia te ia ni vaaiga o mea ua Ou tautala atu ai.

29 Ma afai o le tulaga lea e i ai, Ou te poloai atu ia te oe, la’u auauna Iosefa, ia e fai atu ia te ia, ia lē toe faia e ia se mea, pe toe faalavelave mai ia te a’u e uiga i lenei mataupu.

30 Ma afai o le tulaga lea e i ai, faauta, Ou te fai atu ia te oe Iosefa, a uma ona e faaliliu o ni isi itulau itiiti, ona e taofi lea mo se vaitau, seia oo ina Ou toe poloaiina oe; ona mafai ai lea ona e toe faaliliu.

31 Ma vagana ai ua e faia lenei mea, faauta, o le a e lē toe mauaina se meaalofa, ma o le a Ou aveese mea na Ou faatuatuaina atu ia te oe.

32 Ma o lenei, ona ua Ou muai iloa le lamalamaga o faatalitali mai e faaumatia oe, ioe, ua Ou muai iloa afai e lē faalotomaualaloina e la’u auauna o Matini Harisi o ia lava ma maua se molimau mai lo’u lima, o le a pa’ū atu o ia i le solitulafono;

33 Ma e toatele o loo faapupuna faatalitali mai e faaumatia ese oe mai luga o le fogaeleele; ma o le pogai lenei, ina ia mafai ona faalevalevaina o ou aso, ua Ou tuu atu ai ia te oe nei poloaiga.

34 Ioe, o le pogai lenei na Ou fai atu ai: Ia taofi, ma tu lē gaoioi, seia Ou poloaiina oe, ma o le a Ou saunia ala e mafai ai ona e faataunuu o le mea ua Ou poloaiina ai oe.

35 Ma afai e te faamaoni i le tausiga o a’u poloaiga, o le a siitia a’e oe i luga i le aso gataaga. Amene.