Mwakoro 60
Kaotioti ae kaotaki rinanon Iotebwa Timiti te Burabeti, i Independence, n te Aono ae Jackson, Missouri, n Aokati 8, 1831. N te tai aei unimwaane ake a tia ni mwananga nakon te Aono ae Jackson man ira katabuan te aba ao nnen te tembora a tangiria ni kan ataia bwa tera ae a na karaoia.
1–9, A riai unimwaane n tataekina te euangekerio n aia botaki naake a buakaka; 10–14, A riai n aki kabane tai, ke n tauni aia tarena; 15–17, A kona n irei waeia bwa te kakoaua ni kaitaraia naake a totokoa te euangkerio.
1 Nooria, e taku te Uea nakoia unimwaanen ana ekaretia, ake a riai ni kawaekoaia n oki nakon te aba are a roko mai iai: Nooria, e kakukurei irou, bwa kam a tia n nakomai ikai;
2 Ma tabeman ae I aki kukurei irouia, bwa a aki kaurei wiia, ma a karabai aia tarena are I a tia n anganiia, ibukin maakan te aomata. A na reke kaia nakanne, bwa e kauraaki uniu nakoia.
3 Ao e na koro bukina, ngkana a aki kakaonimaki riki nakoiu, e na anaaki, te bwai are iai irouia.
4 Bwa Ngai, te Uea, I tautaeka i eta i karawa, ao i buakoia taan buaka n te aonaba; ao n te bong are N na rinei au atibu aika a raneanea, a na ataia aomata ni kabane bwa tera ae kaota mwaakan te Atua.
5 Ma, e koaua, N na taetae nakoimi ni kaineti ma mwanangami nakon te aba are kam roko mai iai. E riai ni kabaaki te booti, ke ni kabooaki, n aron nooran raoiroina iroumi, e aki akaaka irou, ao katawea mwanangami nakon te tabo ae aranaki bwa St. Louis.
6 Ao man te tabo anne a riai au tia mwakuri aika Sidney Rigdon, Iotebwa Timiti te Ataei ao Oliver Cowdery ni mwananga nako Cincinnati;
7 Ao n te tabo aei a riai n tabekarake bwanaaia ao n taekina au taeka ma te bwanaa ae baibati, n akea te un ke te nanououa, n tabekirake baai aika a tabu i aoia. Bwa I kona n karaoiko bwa ko na tabu, ao a kabwaraaki am bure.
8 A riai nikiraia ni mwananga mai St. Louis, ni kakauoman, ao n tataekina te taeka, tiaki ni katawe, i buakoia aia botaki naake a buakaka, ni karokoa a okira aia mwanga are a roko mai iai.
9 Ao ni kabane aikai ibukin ae raoiroi ibukia mwanga n te ekaretia; bwa aio bukin ae I kanakoia iai.
10 Ao e riai au tia mwakuri ae Edward Partridge n anga te mwane are I a tia n anganna, mwakorona nakoia au unimwaane ake a tuangaki bwa a na oki;
11 Ao ane e kona, e riai ni kaokia rinanon te tia tei; ao ane e aki kona, e aki kainnanoaki mai rouna.
12 Ao ngkai I taetae ibukiia nikiraia ake a na roko nakon te aba aei.
13 Nooria, a tia ni kanakoaki bwa a na tataekina au euangkerio i buakoia aia botaki naake a buakaka; mangaia are, I anga nakoia te tua, ae kangai: Kam na tai kabane tai, ke n tauni ami tarena bwa e aonga n aki ataaki.
14 Ao i mwina ngkana kam roko nakon aban Tion, ao n tia n taekin au taeka, kam na waekoa n oki, n taekina au taeka i buakoia aia botaki aomata aika a buakaka, tiaki ni katawe, ke n te un ke ma te kauntaeka.
15 Ao n ioi bubun waemi ni kaitaraia naake a aki butimwaingkami, tiaki i mataia, bwa kam kaawa ni kauniia, ma ni karaba; ao irei waemi, bwa te kakoaua ni kaitaraia ni bongin te motikitaeka.
16 Nooria, e rangi n tau aio ibukimi, ao ana kantaninga teuare e kanakoingkami.
17 Ao man wiin au tia mwakuri ae Iotebwa Timiti te Ataei, e na kaotaki kaetieti ni kaineti ma Sidney Rigdon ao Oliver Cowdery. Nikirana a na kaotaki rimwi. Eng. Amen.