1 Faauta, ma faalogo mai i le leo o ia o lē ua i ai le mana uma, o lē ua mai le faavavau-tumau i le faavavau-tumau, o le Alefa ma le Omeka lava, o le amataga ma le gataaga.

2 Faauta, e moni ua faapea ona fetalai mai o le Alii ia te outou, o toeaina e o la’u ekalesia, o e ua potopoto i luga o lenei laufanua, o e o a latou agasala ua faamagaloina nei, ona o A’u, o le Alii, e faamagaloina agasala, ma ua Ou alofa mutimutivale ia te i latou o e e ta’uta’u mai a latou agasala ma loto maualalalo;

3 Peitai e moni Ou te fai atu ia te outou, ua lē manaomia ona o atu faavavevave le vaega atoa lenei o a’u toeaina i luga o vai, ae o loo fano i le lē talitonu tagata o loo nonofo ai i le tasi itu ma le isi itu.

4 Ae ui i lea, na Ou tuuina atu ina ia mafai ona outou molimauina; faauta, e tele mea e lamatia ai le ola o loo i ai i luga o vai, ma aemaise lava pe a mavae le taimi nei;

5 Aua o A’u, o le Alii, ua Ou poloaiina i lo’u ita faafanoga e tele i luga o vai; ioe, ma aemaise lava i luga o nei vai.

6 Ae ui i lea, ua i ai tagata uma i lo’u lima, ma o lē o i totonu o outou ua faamaoni o le a lē fano i vai.

7 O le mea lea, ua tatau ai lava i la’u auauna o Sini Gilbert ma la’u auauna o Viliamu W. Phelps ona faanatinati atu i la laua fe’au ma le misiona.

8 Ae ui i lea, Ou te lē tuuina atu ia outou taapeape seia aoaiina outou ona o a outou agasala uma, ina ia tasi outou, ina ia outou lē fano i le amioleaga;

9 Ae o nei, e moni Ou te fai atu, ua Ou loto ina ia outou o atu. O lea ia tuu atu i a’u auauna o Sini Gilbert ma Viliamu W. Phelps e ave la laua aumalaga muamua, ma tuu atu ia te i latou e alu faanatinati la latou malaga ina ia mafai ona latou faataunuu la latou misiona, ma o le a latou manumalo e ala i le faatuatua;

10 Ma e tusa ai ma lo latou faamaoni o le a faasaoina i latou, ma o A’u, o le Alii, o le a faatasi ma i latou.

11 Ma ia tuu atu i toeaina e totoe latou te ave mea e manaomia mo lavalava.

12 Ia tuu atu i la’u auauna o Sini Gilbert na te ave faatasi ma ia mea e lē manaomia, e pei ona o le a outou malilie i ai.

13 Ma o lenei, faauta, e mo lo outou lelei na Ou tuu atu ai ia te outou se poloaiga e faatatau i nei mea; ma o A’u, o le Alii, o le a talatala faatasi ma outou e pei ona sa faia ma tagata i aso anamua.

14 Faauta, o A’u, o le Alii, na faamanuiaina vai i le amataga; ae i aso e gata ai, ua Ou fetuu ai vai, e ala i le fofoga o la’u auauna o Ioane.

15 O le mea lea, e oo mai aso o le a lē saogalemu ai se tasi i luga o vai.

16 Ma o le a fai ane faapea i aso e oo mai, e leai se tasi e mafai ona alu a’e i le laueleele o Siona i luga o vai, na’o ia o lē ua sa’o i le loto.

17 Ma, e pei ona fetuu, e A’u, o le Alii, le laueleele i le amataga, ua faapea foi ona Ou faamanuiaina i aso e gata ai, i lona taimi, mo le faaaogaina e la’u au paia, ina ia latou aai i lona tamaoaiga.

18 Ma o lenei Ou te tuu atu ia te outou se poloaiga, o mea Ou te fai atu ai i le toatasi Ou te fai atu ai i tagata uma, ia outou muai lapataia o outou uso e faatatau i vai nei, ina ia latou lē malaga mai ai i luga o nei vai, ne’i leai so o latou faatuatua ma maua ai i latou i mailei;

19 O A’u, o le Alii, ua Ou poloaiina, ma ua tietie lē faaumatiaina i luga o vai, ma Ou te lē aveesea le poloaiga.

20 O A’u, o le Alii, sa Ou ita ia te outou ananafi, ae o le asō ua liliuese lo’u ita.

21 O le mea lea, ia tuu atu ia te i latou o e na Ou tautala atu ai, e tatau ona faanatinati la latou malaga—Ou te toe fai atu ia te outou, ia tuu atu ia te i latou ia faanatinati la latou malaga.

22 Ma e lē afaina ia te a’u, pe a mavae se taimi itiiti, pe afai latou te faataunuu la latou misiona, pe latou te malaga atu i le vai po o le laueleele; ia tuu lenei mea ia faia e pei ona faailoa atu ia te i latou e tusa ma a latou filifiliga pe a mavae le taimi nei.

23 Ma o lenei, e faatatau i a’u auauna, o Sini Rikitone, Iosefa Samita, Le Itiiti, ma Oliva Kaotui, ia tuu atu ia te i latou ia aua ne’i toe o mai i luga o vai, vagana i luga o le alavaa vaiti, a’o malaga atu i o latou aiga; po o faapea, aua ne’i o latou o mai i luga o vai e malaga atu ai, vagana ai i luga o le alavaa vaiti.

24 Faauta, o A’u, o le Alii, ua ’Ou tofia se ala mo le malaga a la’u au paia; ma faauta, o le ala lenei—a mavae ona latou tuua le alavaa vaiti, ia latou malaga e ala atu i le laueleele, talu ai ona ua poloaiina i latou e malaga atu ma o atu i luga i le laueleele o Siona;

25 Ma ia latou faia e pei ona sa faia e le fanauga a Isaraelu, e faatutu o latou faleie i tafatafa o le ala.

26 Ma, faauta, o lenei poloaiga ia outou tuu atu i o outou uso uma.

27 Ae ui i lea, o lē ua tuuina atu i ai le mana e poloaiina ai vai, ua tuuina atu ia te ia e le Agaga ia iloa e ia ona ala uma;

28 O le mea lea, ia tuu atu ia te ia e fai e pei ona poloaiina ai o ia e le Agaga o le Atua soifua, pe i luga o le laueleele po o luga o vai, e pei ona tumau ai pea ia te a’u e fai pe a mavae atu nei.

29 Ma ua tuu atu ia te outou le ala mo le au paia, po o le ala mo le au paia o le tolauapiga a le Alii, e malaga ai.

30 O lenei foi, e moni Ou te fai atu ia te outou, a’u auauna o Sini Rikitone, Iosefa Samita, Le Itiiti, ma Oliva Kaotui, ia aua le tatalaina o latou fofoga i faapotopotoga a e amioleaga seia latou taunuu i Sinisinati;

31 Ma i le nofoaga lena, ia siitia a’e i luga o latou leo i le Atua e faasaga i lena nuu, ioe, ia te Ia o lē o lona toasa ua sasao faasaga i lo latou amioleaga, o ni tagata o e ua lata ona matua mo le faafanoga.

32 Ma mai iina, ia tuu atu ia te i latou e malaga atu i faapotopotoga a o latou uso, ona ua manaomia tele i le taimi nei lava a latou galuega i totonu o i latou, nai lo totonu o faapotopotoga a e amioleaga.

33 Ma o lenei, e faatatau i toeaina o totoe, ia tuu atu ia te i latou e malaga atu ma talai atu le afioga i totonu o faapotopotoga a e amioleaga, e pei ona tuuina mai ai;

34 Ma e tusa ai ma lo latou faia o lenei mea o le a latou tafi ai o latou ofu, ma o le a latou lē pōnā ai i o’u luma.

35 Ma ia tuu atu ia te i latou e malaga faatasi, pe taitoalua, e pei ona lelei ia te i latou, tau ina tuu atu i la’u auauna o Reynolds Cahoon, ma la’u auauna o Samuel H. Samita, o e ua Ou fiafia tele i ai, ia aua ne’i o eseese seia toe foi atu i o laua aiga, ma o lenei mea ua mo se faamoemoega poto ua ia te a’u.

36 Ma o lenei, e moni Ou te fai atu ia te outou, ma o le mea Ou te fai atu ai i le toatasi ua Ou fai atu ai i tagata uma, ia fiafia, le fanau iti e; ona ua Ou i ai i lo outou lotolotoi, ma Ou te lei tuulafoaia outou;

37 Ma e tusa ai ma lo outou faamaualaloina o outou lava i o’u luma, o faamanuiaga o le malo o a outou ia.

38 Fusi i o outou sulugatiti ma mataala ma faamamalu, ma tulimatai i luma mo le afio mai o le Atalii o le Tagata, ona e afio mai o ia i le itula tou te lē manatu i ai.

39 Tatalo e lē aunoa ina ia outou lē ulu atu i faaosoosoga, ina ia mafai ona outou gafatia le aso o lona afio mai, pe i le ola po o le oti. E faapea lava. Amene.