Benneg 66
Paltiing a naited babaen ni Joseph Smith a Propeta, iti Orange, Ohio, idi 25 ti Oktubre 1831 (History of the Church, 1:219–221). Daytoy ti immuna nga aldaw ti napateg a taripnong. Iti panangirugina iti daytoy a paltiing, insurat ti Propeta, “Iti dawat ni William E. McLellin, nagdamagak iti Apo, ket naawatko ti sumaganad” (History of the Church, 1:220).
1–4, Ti agnanayon a katulagan ti pakabuklan ti ebanghelio; 5–8, Nasken a mangikasaba, mamaneknek, ken mangikalintegan kadagiti tao dagiti elder; 9–13, Ipanamnama ti napudno a panangiwanwan a serbisio ti tawid iti agnanayon a biag.
1 Adtoy, kastoy ti kinuna ti Apo iti katulongak a ni William E. McLellin—Nagasatka, ta tinallikudamon dagiti basbasolmo, ken inawatmon dagiti kinapudnok, kinuna ti Apo a Mannubbotmo, ti Mangisalakan iti lubong, a kas iti kaadu ti mamati iti naganko.
2 Pudno kunak kenka, nagasatka iti panangawatmo iti agnanayon a katulagak, a kas iti pakabuklan ti ebangheliok, a naited kadagiti annak ti tattao, tapno maaddaanda iti biag ken makiranudda kadagiti gloria a maipalgakto kadagiti maudi nga aldaw, a kas insurat dagiti propeta ken apostol kadagiti nagkauna nga aldaw.
3 Pudno kunak kenka, katulongak a William, a nadaluska, ngem saan nga umdas; agbabawika, ngarud, kadagiti banag a saan a makaay-ayo iti imatangko, kinuna ti Apo, ta ipakitanto ida ti Apo kenka.
4 Ket ita, pudno, siak, ti Apo, ipakitakto ti pagayatak a maipanggep kenka, wenno ania ti pagayatak maipanggep kenka.
5 Adtoy, pudno kunak kenka, a pagayatak nga ipakdaarmo ti ebangheliok iti tunggal daga, ken iti tunggal siudad, wen, kadagiti lugar iti aglawlaw a saanna pay a nakaipakdaaran.
6 Saanka nga agpalabas iti adu nga aldaw iti daytoy a lugar; saanka pay a mapan iti daga ti Zion; ngem no la ketdi adda maipatulodmo, ipatulodmo; no saan, dimo pampanunoten dagiti sanikuam.
7 Mapanka kadagiti daga iti dumaya, mangiburayka iti pammaneknek iti tunggal lugar, kadagiti tunggal tao ken kadagiti sinagogada, ket ikalintegam kadagiti tao.
8 Pasurotem kenka ni katulongak a ni Samuel H. Smith, ket dimo baybay-an, ket ikkam kadagiti pangiwanwanmo; ket isu a napudno mamapigsanto iti tunggal lugar; ket siak, ti Apo, addaakto kadakayo.
9 Ipatayyo dagiti dakulapyo kadagiti masakit, ket maimbagandanto. Saankayo nga agsubli agingga a siak, ti Apo, ibaonkayonto. Agibturkayo kadagiti rigrigat. Dumawatkayo, ket umawatkayonto, agtuktokkayo, ket malukatankayonto.
10 Liklikam dagiti pakaringgoran. Tallikudam amin a saan a nalinteg. Saanka a makiabig—ti sulisog a nakaparigatam.
11 Tungpalem dagitoy a sao, ta pudnoda ken napudno; ket ipategmo ti takemmo, ket guyugoyem ti adu a tao a mapan iti Zion babaen ti kankanta ti agnanayon a rag-o kadagiti uloda.
12 Ituloymo dagitoy a banag agingga iti panungpalan, ket addanto korona ti agnanayon a biag iti makanawan ti Amak, a napno iti parabur ken kinapudno.
13 Pudno, kuna ti Apo a Diosmo, ti Mannubbotmo, nga isu ni Jesucristo. Amen.